បន្ទាប់ពីទាមទារខាងនយោបាយបានសំរេច ហើយឥឡូវទាមទារខាងសង្គមកិច្ចវិញ
នៅពេល ដែលកងទ័ព ចាត់តាំងអន្តរកាលរហូតដល់ការបោះឆ្នោតសភា និងប្រធានាធិបតីក្នុងអំឡុងពេល ៦ខែទៀត និង ខ្លួនឯងមានសិទ្ធិអំណាចពេញលេញ សង្គមស៊ីវិល នៅតែធ្វើបាតុកម្មជានិច្ច ប៉ុន្តែលើកនេះ ទាមទារខាងផ្នែកសង្គមកិច្ច។ នៅទីលានសេរីភាព Tahrir ពួកបាតុករ ទាមទារការដំឡើងប្រាក់ខែ។ ស្របតាមទីភ្នាក់ងារព័ត៌មានអង់គ្លេស Reuters នៅថ្ងៃចន្ទ ១៤កុម្ភៈនេះ កងទ័ព ប្រហែលត្រូវហាមប្រាមកូដកម្ម ដើម្បីបង្ការជាមុនគ្រោះថ្នាក់អាចកើតមាន “ការវឹកវរនិងការច្របូកច្របល់”។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់Alexandre Buccianti ប្រែសម្រួលដោយវីនស្តុន រតនា
ធនាគារត្រូវបិទទ្វារ ដោយហេតុមានចលនាតវ៉ាប្រឆាំងទាមទាររបស់ពួកអ្នករដ្ឋការផ្នែកធនាគារ។ National Bankជាធនាគារធំបំផុតនៅអេហ្ស៊ីប នៅថ្ងៃអាទិត្យម្សិលមិញបានស្គាល់ការច្របូកច្របល់ខ្លាំង ដោយហេតុមាននិយោជិតរាប់រយនាក់បានធ្វើបាតុកម្ម នៅពីមុខទីស្នាក់ការធំនៃធនាគាររដ្ឋ នៅកណ្តាលទីក្រុងគែរ។ និយោជិតទាមទារការដំឡើងប្រាក់ខែ និងបរិហារប្រាក់រង្វាន់ច្រើនសំបើមរបស់ពួកអ្នកទទួលខុសត្រូវជាន់ខ្ពស់នៃធនាគារ។
មធ្យោបាយឃោសនាមហាជនរបស់រដ្ឋក៏ធ្វើការតវ៉ាទាមទារដែរ។មានបាតុកម្មកើតមាននៅពីមុខទីស្នាក់ការវិទ្យុទូរទស្សន៍ កាសែតAl Ahram និងទស្សនាវដ្តីប្រចាំសប្តាហ៍Octobar។ គេទាមទារការដំឡើងប្រាក់ខែ និងសុំឱ្យមានអំពើពុករលួយតិចជាងមុន។
សូម្បីតែប៉ូលិសក៏ធ្វើបាតុកម្មតវ៉ាទាមទារដែរ។នាយប៉ូលិសរងរាប់រយនាក់បានធ្វើបាតុកម្មនៅពីមុខក្រសួងមហាផ្ទៃ។ គេទាមទារចង់បានការដំឡើងប្រាក់ខែ ការកាត់បន្ថយរយៈពេលធ្វើការ និងប្រាក់រង្វាន់ហានិភ័យ។ ពួកប៉ូលិសបានទៅកាន់ទីលានសេរីភាពTahrir។ ប្រសិនបើនៅប្រទេសផ្សេងពីអេហ្ស៊ីបវិញ នោះប៉ូលិសដែលបានបាញ់ទៅលើពួកបាតុករ នៅទីលានដដែលនេះប្រហែលជាត្រូវបានហ្វូងពួកបាតុករព្រួតគ្នាចោមរោមវាយតប-តសម្លាប់វិញ។ ប៉ុន្តែហ្វូងពួកបាតុករគ្រាន់តែបានស្រែកសង្ឃកដាក់គេប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ