ក្រោយពីមូបារ៉ាក់លាលែង នយោបាយការបរទេសអាមេរិកនៅដើមបូព៌ាស្ថិតក្នុងភាពស្រពិចស្រពិល
នៅពេលនេះ ប្រជាជនអេហ្ស៊ីព្ទកំពុងតែសប្បាយនឹងសេរីភាព ដែលបានរួចពីកណ្តាប់ដៃដែករបស់លោកមូបារ៉ាក់។ ក៏ប៉ុន្តែ សម្រាប់សហរដ្ឋអាមេរិក ការលាលែងពីអំណាចរបស់លោកមូបារ៉ាក់ ដែលជាសម្ព័ន្ធមិត្តរយៈពេល ៣០ឆ្នាំមកហើយនោះ កំពុងតែធ្វើឲ្យសំណួរជាច្រើនត្រូវចោទឡើង ទាក់ទងនឹងអនាគតនៃនយោបាយការបរទេសអាមេរិក នៅក្នុងតំបន់ដើមបូព៌ា។
ចុះផ្សាយនៅថ្ងៃ៖ កែប្រែថ្ងៃទី៖
បទវិភាគរបស់ សេង ឌីណា
ក្រោមការដឹកនាំរបស់លោកមូបារ៉ាក់ ក្នុងរយៈពេល ៣០ឆ្នាំកន្លងទៅនេះ អេហ្ស៊ីព្ទបានស្ថិតក្រោមរបបផ្តាច់ការ ពោរពេញទៅដោយការរំលោភសិទ្ធិមនុស្ស និងអំពើពុករលួយ។ ក៏ប៉ុន្តែ អេហ្ស៊ីព្ទ គឺជាមូលដ្ឋានគ្រឹះដ៏សំខាន់ នៃនយោបាយការបរទេសអាមេរិក នៅដើមបូព៌ា។
ក្រោយពីសង្រ្គាមជាច្រើនលើករវាងអារ៉ាប់ និងអ៊ីស្រាអែល អេហ្ស៊ីព្ទបានចុះកិច្ចព្រមព្រៀងសន្តិភាពជាមួយអ៊ីស្រាអែល នៅឆ្នាំ១៩៧៩ ក្រោមការសម្របសម្រួលរបស់អាមេរិក។ អេហ្ស៊ីព្ទក៏បានទទួលស្គាល់រដ្ឋអ៊ីស្រាអែលផងដែរ។ កិច្ចព្រមព្រៀងសន្តិភាពអេហ្ស៊ីព្ទ-អ៊ីស្រាអែល គឺជាគ្រឹះដ៏សំខាន់បំផុតនៃស្ថិរភាពនៅដើមបូព៌ា។ អេហ្ស៊ីព្ទ គឺជាស្ពានចម្លងរវាងអ៊ីស្រាអែល និងប្រទេសអារ៉ាប់។ ម្យ៉ាងទៀត រដ្ឋាភិបាលរបស់លោកមូបារ៉ាក់បានជួយអាមេរិកច្រើនណាស់ ក្នុងការប្រយុទ្ធប្រឆាំងនឹងពួកភេរវជនអ៊ីស្លាមជ្រុលនិយម។
ថ្វីដ្បិតតែ លោកអូបាម៉ាបានគាំទ្រចលនាប្រជាជនអេហ្ស៊ីព្ទ ហើយបានទទូចឲ្យអេហ្ស៊ីព្ទធ្វើកំណែទម្រង់ឆ្ពោះទៅរករបបប្រជាធិបតេយ្យ ក៏ប៉ុន្តែ ក្រោយពីលោកមូបារ៉ាក់ចុះចេញពីតំណែង អាមេរិកត្រូវបាត់បង់សម្ព័ន្ធមិត្តដ៏សំខាន់ម្នាក់។ អនាគតនៃនយោបាយការបរទេសអាមេរិក នៅដើមបូព៌ា កំពុងតែស្ថិតក្នុងភាពស្រពិចស្រពិល។
ជាការពិតណាស់ថា នៅពេលនេះ អំណាចកំពុងតែស្ថិតក្នុងដៃរបស់កងទ័ពអេហ្ស៊ីព្ទ ហើយមេទ័ពអេហ្ស៊ីព្ទបានសន្យារួចហើយថា នឹងបន្តគោរពកិច្ចព្រមព្រៀងអន្តរជាតិ ដែលរដ្ឋាភិបាលមុនបានចុះ។ នេះមានន័យថា អេហ្ស៊ីព្ទនៅតែគោរពកិច្ចព្រមព្រៀងសន្តិភាពជាមួយអ៊ីស្រាអែល។ ក៏ប៉ុន្តែ គោលដៅនៃការធ្វើបដិវត្តន៍នៅអេហ្ស៊ីព្ទ គឺមិនមែនឲ្យកងទ័ពនៅកាន់អំណាចរហូត បង្កើតជារបបផ្តាច់ការយោធានោះទេ។ គោលដៅ គឺចង់ឲ្យកងទ័ពរៀបចំធ្វើកំណែទម្រង់ ដើម្បីរៀបចំការបោះឆ្នោតបែបប្រជាធិបតេយ្យ ហើយផ្ទេរអំណាចទៅឲ្យរដ្ឋាភិបាលស៊ីវិលមួយ។
សម្រាប់អាមេរិក សំណួរកំពុងតែចោទឡើងថា តើរដ្ឋាភិបាលថ្មីរបស់អេហ្ស៊ីព្ទ ដែលកើតចេញពីការបោះឆ្នោត នឹងមានជំហរបែបណាចំពោះអាមេរិក? តើរដ្ឋាភិបាលនោះនឹងនៅតែជាសម្ព័ន្ធមិត្តអាមេរិក ដូចរដ្ឋាភិបាលរបស់លោកមូបារ៉ាក់ដែរឬទេ? តើរដ្ឋាភិបាលថ្មីនោះនឹងនៅតែគោរពកិច្ចព្រមព្រៀងសន្តិភាពជាមួយ អ៊ីស្រាអែលដែរឬទេ? តើចលនាអ៊ីស្លាមជ្រុលនិយម (ជាភាសាបារាំង Frères Musulman ឬជាភាសាអង់គ្លេសMuslim Brotherhood) នឹងមានកម្លាំងប៉ុណ្ណា នៅក្នុងនយោបាយអេហ្ស៊ីព្ទ ទៅថ្ងៃអនាគត?
កាលពីឆ្នាំ១៩៧៩ បដិវត្តន៍អៀរ៉ង់បានផ្តួលរំលំរបបដឹកនាំស្និទ្ធិនឹងសហរដ្ឋអាមេរិក ហើយពួកអ៊ីស្លាមជ្រុលនិយមបានឡើងមកកាន់អំណាចរហូតមកទល់សព្វថ្ងៃនេះ។ របបដឹកនាំនៅអៀរ៉ង់ពេលនេះ ក៏មានលក្ខណៈផ្តាច់ការមិនខុសពីរបបមុនដែរ ក៏ប៉ុន្តែ អៀរ៉ង់បានក្លាយទៅជាសត្រូវរបស់អាមេរិក និងអ៊ីស្រាអែល។ មេរៀនដ៏ជូរចត់មួយនេះ នៅតែតាមលងអ្នកនយោបាយអាមេរិក នាពេលបច្ចុប្បន្ននេះ។
សំណួរមួយទៀត ដែលកំពុងតែចោទឡើង គឺអនាគតនៃរបបដឹកនាំនៅប្រទេសអារ៉ាប់ផ្សេងទៀត ដែលជាសម្ព័ន្ធមិត្តរបស់អាមេរិក។ ម្សិលមិញ ប្រជាជនងើបឡើងបះបោរទម្លាក់មូបារ៉ាក់ នៅអេហ្ស៊ីព្ទ។ ចុះនៅថ្ងៃស្អែក តើនឹងត្រូវដល់វេនមេដឹកនាំណាទៀត? ប្រទេសហ្សកដានី យេមែន និងអារ៉ាប៊ី សាអ៊ូឌីត ជាដើម សុទ្ធសឹងតែជាសម្ព័ន្ធមិត្តដ៏សំខាន់របស់អាមេរិក នៅដើមបូព៌ា ក៏ប៉ុន្តែ សុទ្ធសឹងតែប្រទេសគ្រប់គ្រងដោយរបបផ្តាច់ការ ដែលអាចជាចំណុចស៊ីបនៃចលនាបដិវត្តន៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ