ករណីគ្រុនឈាមកើនឡើង៣០ភាគរយ
ក្រសួងសុខាភិបាល និងក្រសួងអប់រំបានរួមគ្នារៀបចំទិវាកម្ចាត់ជំងឺគ្រុនឈាម នៅថ្ងៃចន្ទនេះដើម្បីផ្សព្វផ្សាយអំពីការបង្ការជំងឺដ៏គ្រោះថ្នាក់សម្រាប់កុមារមួយនេះ។ ទិវាកំចាត់ជំងឺគ្រុនឈាមត្រូវបានរៀបចំនៅក្នុងវិទ្យាល័យបាក់ទូកយ៉ាងឱឡារិក ក្នុងអំឡុងពេលរដូវភ្លៀងក៏ចាប់ផ្តើមដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៤
មានករណីឆ្លងជំងឺគ្រុនឈាមចំនួន១៩២៤ករណីកាលពីឆ្នាំ២០១០ ហើយក្នុងចំណោមករណីឆ្លងទាំងនោះ មាន១១ករណីបានស្លាប់។ ករណីឆ្លងនិងអត្រាស្លាប់បានកើនលើសឆ្នាំ២០០៩ ដែលពេលនោះ ករណីឆ្លងមាន១៣៩៥ករណីនិងអត្រាស្លាប់ដោយសារគ្រុនឈាមមានចំនួន៧ករណី។
ការកើនឡើងនៃករណីជំងឺគ្រុនឈាមបានក្លាយជាប្រធានបទនៃទិវាកម្ចាត់ជំងឺគ្រុនឈាមនៅឆ្នាំនេះ។ ក្រសួងសុខាភិបាលនិងក្រសួងអប់រំបានរៀបចំទិវាជាតិនេះរួមគ្នាដើម្បីផ្សព្វផ្សាយ និងពញ្ញាក់អារម្មណ៍ឪពុកម្តាយទាំងឡាយអោយប្រុងប្រយ័ត្នចំពោះសុខភាពកូនៗរបស់ពួកគេ។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាលបានថ្លែងនៅក្នុងពិធីដែលត្រូវបានរៀបចំកាលពីព្រឹកថ្ងៃចន្ទទី២០មិថុនានេះថា ករណីគ្រុនឈាមបានកើនឡើង៣០ភាគរយកាលពីឆ្នាំ២០១០ បើធៀបនឹងឆ្នាំ២០០៩។
មន្ត្រីក្រសួងសុខាភិបាលទទួលបន្ទុកផ្នែកមជ្ឈមណ្ឌលជំងឺគ្រុនឈាមអះអាងថា នៅក្នុងប្រទេសកម្ពុជា ជំងឺគ្រុនឈាមបានកើតឡើងភាគច្រើនលើកុមារអាយុតិចជាង១៥ឆ្នាំក្នុងនោះកុមារក្នុងវ័យសិក្សាចន្លោះពី៥ទៅ៩ឆ្នាំរងគ្រោះច្រើនជាងគេ។ ក៏ប៉ុន្តែ ករណីបាត់បង់ជីវិតបានកើតមានយ៉ាងច្រើនចំពោះកុមារអាយុក្រោម៥ឆ្នាំ។
ករណីជំងឺគ្រុនឈាមបានកើនឡើង បើទោះជាគេឃើញមានការអប់រំផ្សព្វផ្សាយយ៉ាងច្រើនតាមវិទ្យុនិងទូរទស្សន៍ដល់ប្រជាពលរដ្ឋក៏ដោយ។
កម្ពុជាធា្លប់ជួបបាតុភូតនៃការផ្ទុះជំងឺគ្រុនឈាមធំជាងគេកាលពីឆ្នាំ២០០៧ម្តង ដែលពេលនោះមានករណីឆ្លងរហូតដល់៤ម៉ឺននាក់ ហើយអ្នកស្លាប់មានរហូតដល់ជាង៤០០នាក់ឯណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ