ថ្នាំបង្ការជំងឺគ្រុនឈាម នឹងធ្វើចរាចរណ៍លើទីផ្សារនៅឆ្នាំ ២០១៥
ចុះផ្សាយនៅថ្ងៃ៖
ស្តាប់ - ០៨:៥៩
ក្រុមហ៊ុនផលិតឱសថ Sanofi Aventis បានអះអាង កាលពីថ្ងៃទី ១០ មិថុនា ថាបានរកឃើញថ្នាំបង្ការប្រឆាំងនឹងជំងឺគ្រុនឈាម ដែលនឹងអាចធ្វើចរាចរណ៍នៅលើទីផ្សារ នៅឆ្នាំ២០១៥។ ប្រសិនបើប្រសិទ្ធិភាពនៃថ្នាំវ៉ាក់សាំងនេះ ត្រូវបានគេទទួលស្គាល់ជាផ្លូវការ វានឹងអនុញ្ញាតឲ្យគេសង្គ្រោះជីវិតមនុស្សបានជាច្រើនរយពាន់នាក់។
បើតាមអង្គការសុខភាពពិភពលោក ជំងឺគ្រុនឈាមបង្កឲ្យមានអ្នករងគ្រោះប្រមាណ ៥០០ ០០០ នាក់ក្នុងមួយឆ្នាំៗ ភាគច្រើនជាកុមារ។ ជាងនេះទៅទៀត នៅលើផែនដីយើងនេះ មានមនុស្សប្រមាណជាង ពីរពាន់លាននាក់កន្លះ ដែលរស់នៅក្នុងតំបន់គ្រោះថ្នាក់ ងាយនឹងទទួលឆ្លងជំងឺគ្រុនឈាមនេះ (ជាពិសេសអ្នករស់នៅតាមតំបន់ត្រូពិក នៃទ្វីបអាមេរិក និងទ្វីបអាស៊ីប៉ាស៊ីហ្វិក)។
កត្តាភូមិសាស្ត្រ អាកាសធាតុ និងអនាម័យ បានរុញច្រានប្រទេសកម្ពុជា ឲ្យប្រឈមមុខនឹងគ្រោះកើតជំងឺគ្រុនឈាមនេះ។ ឆ្នាំនេះ តាំងពីចុងខែឧសភាមក ក្រសួងសុខាភិបាលបានព្រមានអំពីការគំរាមកំហែងកើតជំងឺគ្រុនឈាមនេះ ថាកំពុងតែឈានជិតដល់កំរិតទាញសញ្ញាអាសន្នហើយ។ លោក វេជ្ជបណ្ឌិត ង៉ាន់ ចន្ថា ប្រធានកម្មវិធីជាតិប្រយុទ្ធប្រឆាំងជំងឺគ្រុនឈាមនៃក្រសួងសុខាភិបាលកម្ពុជា សូមរំលឹកដោយត្រួសៗឡើងវិញ អំពីអ្វីទៅដែលហៅថាជំងឺគ្រុនឈាម ៖
វេជ្ជបណ្ឌិត ង៉ាន់ ចន្ថា ៖ ការចម្លងជំងឺគ្រុនឈាម
ប៉ុន្តែពេលនេះ ក្តីសង្ឃឹមថ្មីកំពុងលេចពន្លឺបន្តិចម្តងៗហើយ ព្រោះពេលនេះ ក្រុមហ៊ុនផលិតឱសថ Sanofi Aventis កំពុងតែបញ្ចប់ការសិក្សាលើថ្នាំវ៉ាក់សាំងប្រឆាំងនឹងជំងឺគ្រុនឈាមនេះ។ កាលពីថ្ងៃទី ១០មិថុនា ២០១១ ក្រុមអ្នកស្រាវជ្រាវបានចេញរបាយការណ៍មួយបញ្ជាក់ លទ្ធផលនៃការធ្វើតេស្តលើថ្នាំបង្ការដំបូង ចំពោះកុមារនៅក្នុងប្រទេសថៃ បានទទួលលទ្ធផលដ៏គាប់ប្រសើរ។ ហើយវាជាថ្នាំវ៉ាក់សាំងដំបូងបង្អស់ដែលបានឆ្លើយតបទាំងស្រុងទៅនឹងលក្ខខណ្ឌទាំងឡាយដែលកំណត់ឡើងមុននឹងឈានដល់ការធ្វើចរាចរណ៍លើទីផ្សារ នៅឆ្នាំ ២០១៥។ នៅឆ្នាំ២០១២ខាងមុខនេះ គេនឹងអាចកំណត់អនុម័តការប្រើប្រាស់ ថ្នាំវ៉ាក់សាំងថ្មីនេះ ដែលនឹងមានប្រសិទ្ធិភាពប្រមាណ៨០% តែគ្មានផ្តល់ផលរំខាន និងប៉ះពាល់ទេ។
ក្នុងពេលរង់ចាំចាក់ថ្នាំការពារ លោកវេជ្ជបណ្ឌិត ង៉ាន់ ចន្ថា សូមផ្តល់ជាដំបូន្មាន ទាក់ទងនឹងរោគសញ្ញា និងការសម្គាល់អាការៈនៃជំងឺគ្រុនឈាម ក៏ដូចជាការការពារកុំឲ្យកើតជំងឺគ្រុនឈាមនេះ។
វេជ្ជបណ្ឌិត ង៉ាន់ ចន្ថា ៖ រោគសញ្ញា និងការការពារជំងឺគ្រុនឈាម
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ