ខ្មែរក្រហម៖ ពលរដ្ឋខ្មែរចង់បំភ្លេចអតីតកាលជាងការប្រឈមមុខ!
ចុះផ្សាយនៅថ្ងៃ៖
ស្តាប់ - ០៤:២៦
រហូតមកទល់ពេលនេះ មានពលរដ្ឋខ្មែរមិនច្រើនទេដែលតាមដានសវនាការនៅឯសាលាក្តីខ្មែរក្រហម។ ជាទូទៅ ពលរដ្ឋខ្មែរភាគច្រើនបានជ្រើសរើសយកការបំភ្លេចអតីតកាលដ៏ឈឺចាប់ជាជាងការប្រឈមមុខ។ យ៉ាងណាក៏ដោយ អ្នកដែលតាំងចិត្តប្រឈមមុខនឹងបញ្ហានេះនៅក្នុងតុលាការក្នុងនាមជាដើមបណ្តឹងរដ្ឋប្បវេណី ហាក់បានសម្តែងការខកចិត្តកាន់តែខ្លាំង និងបានសម្លឹងមើលតុលាការប្រកបដោយទុទ្ទិដ្ឋិនិយមទៅវិញ។ តើហេតុអ្វីបានជាដូច្នេះ?
សវនាការសំណុំរឿង ០០២ ដែលជារឿងក្តីសំខាន់ជាងគេបំផុតសម្រាប់យុត្តិធម៌ក្នុងរបបខ្មែរក្រហម បានដំណើរការចូលដល់ថ្ងៃទី៣ហើយនៅថ្ងៃពុធនេះ។ សវនាការសំណុំរឿងដ៏សំខាន់ជាប្រវត្តិសាស្ត្រនេះគួរណាស់តែក្លាយជាទីចាប់អារម្មណ៍របស់ពលរដ្ឋខ្មែរទូទាំងប្រទេសឲ្យភ្ញាក់ផ្អើលនិងតាមដានគ្រប់ៗគ្នាពីព្រោះថាជនជាតិខ្មែរណាក៏ជាប់ពាក់ព័ន្ធនឹងរឿងក្តីនេះដែរ។ ប៉ុន្តែ សវនាការនេះបែរជាទាក់ទាញចំណាប់អារម្មណ៍ពលរដ្ឋខ្មែរតិចតួចទៅវិញ។
ជាទូទៅ ចាប់តាំងពីដំណើរការតុលាការរហូតមកទល់បច្ចុប្បន្ន គេអាចបែងចែកពលរដ្ឋខ្មែរជាពីរក្រុមផ្សេងគ្នា៖
ក្រុមទី១៖ ដែលតំណាងពលរដ្ឋខ្មែរភាគច្រើនលើសលប់មិនចាប់អារម្មណ៍ឬក៏ចាប់អារម្មណ៍តិចតួចប៉ុណ្ណោះចំពោះដំណើរការកាត់ទោសអតីតមេដឹកនាំខ្មែរក្រហម។ និន្នាការនេះបានស្តែងកាន់តែច្បាស់នៅពេលដែលសវនាការសំណុំរឿង០០២ឈានចូលមកដល់។
ក្រុមទី២ ៖ ជាអ្នកសកម្មយ៉ាងខ្លាំងក្នុងការប្រឈមមុខនឹងបញ្ហានេះ ជាពិសេសគឺក្រុមភាគីដើមបណ្តឹងរដ្ឋប្បវេណីតែម្តង។ ប៉ុន្តែ នៅពេលដែលពួកគេសកម្មចូលរួមខ្លាំងពេក ពួកគេហាក់ដូចជាកាន់តែខកចិត្តខ្លាំងទៅវិញរហូតដល់សម្លឹងមើលតុលាការដោយទុទ្ទិដ្ឋិនិយមយ៉ាងខ្លាំង។
មានហេតុផលសត្យានុម័តជាច្រើនដែលអាចលើកយកមកពន្យល់ព្រឹត្តិការណ៍នេះបាន ហើយប្រសិនបើពិនិត្យមើលហេតុផលទាំងនោះ គេបា្រកដជាមិនអាចស្តីបន្ទោសក្រុមណាមួយបានឡើយ។
ហេតុផលសំខាន់ទី១គឺពេលវេលា ពោលគឺ សវនាការបានបើកធ្វើជាង៣០ឆ្នាំក្រោយការដួលរលំនៃរបបខ្មែរក្រហម។
ហេតុផលសំខាន់ទី២គឺ ឧក្រិដ្ឋកម្មក្នុងរបបខ្មែរក្រហម ជាបញ្ហាធ្ងន់ធ្ងរពេកសម្រាប់ប្រជាពលរដ្ឋខ្មែរជាទូទៅ។ ដូច្នេះ ជាចិត្តសាស្ត្រ គ្មានអ្នកណាចង់រម្លឹកបញ្ហានេះឡើងវិញឡើយ ពីព្រោះថា ការរម្លឹកដល់បញ្ហាដ៏ឈឺចាប់នេះ គ្មានអ្វីក្រៅពីការបង្កើតការឈឺចាប់ឲ្យខ្លួនឯងឡើងវិញនោះឡើយ។ ម្យ៉ាងទៀត នៅពេលដែលគិតដល់បញ្ហាដ៏ធ្ងន់ធ្ងរក្នុងរបបខ្មែរក្រហម ក៏គ្មានអ្នកណាម្នាក់ស្រមៃ ថាអាចនឹងរកយុត្តិធម៌ឃើញឡើយ។ ដូច្នេះ ការព្យាយាមបំភ្លេចរឿងនេះជាជម្រើសរបស់ពលរដ្ឋខ្មែរភាគច្រើន។
ក្រឡេកមើលទៅក្រុមអ្នកសកម្មចូលរួមក្នុងដំណើរការនេះវិញ ជាពិសេសក្រុមដើមបណ្តឹងរដ្ឋប្បវេណី គេក៏នឹងឃើញបញ្ហាដូចគ្នាដែរ។ ដោយសារតែឧក្រិដ្ឋកម្មក្នុងរបបខ្មែរក្រហមធំធេងពេក ជនរងគ្រោះប្រាកដជាខូចចិត្តខ្លាំងដោយចៀសមិនផុតនៅពេលបានឃើញតុលាការដំណើរការយឺតយ៉ាវមិនដូចចិត្តដែលពួកគេចង់បាន។
ធ្ងន់ធ្ងរជាងនេះ ពួកគេកាន់តែគ្រាំគ្រាចិត្តថែមទៀតនៅពេលបានឃើញអាកប្បកិរិយាមិនទទួលខុសត្រូវរបស់អតីតមេដឹកនាំខ្មែរក្រហម។ ភាពអន្ទះសា ចង់បានយុត្តិធម៌និងដោយសារតែទំហំនៃឧក្រិដ្ឋកម្មធំធេងពេក បានជំរុញឲ្យក្រុមដើមបណ្តឹងរដ្ឋប្បវេណី មិនអាចទ្រាំទ្រឡើយចំពោះអ្វីដែលកំពុងកើតឡើងនៅឯតុលាការ។
ជាការពិតណាស់ សោកនាដកម្មដែលបន្សល់ទុកដោយរបបខ្មែរក្រហមមានលក្ខណៈធ្ងន់ធ្ងរ សម្រាប់ប្រជាពលរដ្ឋខ្មែរដែលបានហែលឆ្លងកាត់របប៣ឆ្នាំ៨ខែនិង២០ថ្ងៃ។ អ្វីដែលធ្ងន់ធ្ងរបំផុតគឺ មនុស្សជាច្រើនបានឃើញការសម្លាប់កូនចៅ សាច់ញាតិជាទីស្រឡាញ់របស់ខ្លួននៅនឹងភ្នែកស្រស់ៗ។ ឈុតឆាកដ៏មហារន្ធត់ទាំងនេះបានដក់ជាប់ក្នុងអារម្មណ៍របស់ពួកគេមិនងាយរសាយបានឡើយ។ ដូច្នេះ អាកប្បកិរិយារបស់អតីតមេដឹកនាំខ្មែរក្រហមដែលបានបង្ហាញនៅពេលនេះមិនខុសអ្វីពីការចំអកឡកឡឺយដល់ជនរងគ្រោះឡើយ។
សរុបមកវិញ អ្នកដែលអាចទទួលយកយុត្តិធម៌នេះបានដោយស្ងប់ចិត្តគឺមានតែចំពោះអ្នកដែលគិតត្រឹមថា តុលាការខ្មែរក្រហមគ្រាន់តែជានិមិត្តរូបនៃយុត្តិធម៌តែប៉ុណ្ណោះ ពីព្រោះគ្មានឡើយយុត្តិធម៌ពិតប្រាកដសម្រាប់សំណុំរឿងដ៏ធំនេះ។ ប៉ុន្តែ តើមានមនុស្សប៉ុន្មាននាក់ដែលគិតបែបនេះ? ដូច្នេះ នៅពេលដែលតុលាការដំណើរការមិនបានដូចចិត្ត នៅពេលដែល ភាពគួរឲ្យជឿជាក់របស់តុលាការស្ថិតនៅជាសញ្ញាសួរ នៅពេលដែលអតីតមេដឹកនាំខ្មែរក្រហមបង្ហាញភាពឡកឡឺយ និងនៅពេលដែលរឿងខ្មែរក្រហមក្លាយជាអតីតកាលដ៏យូរទៅហើយនោះ ជម្រើសនៃការបំភ្លេចចោលជារឿងដែលពិបាកនឹងចៀសវាង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ