កម្ពុជា និងថៃប្រណាំងគ្នាដើម្បីបញ្ចុះបញ្ចូលគណៈកម្មាធិការបេតិកភណ្ឌពិភពលោក
កិច្ចប្រជុំប្រចាំឆ្នាំរបស់គណៈកម្មាធិការបេតិកភណ្ឌពិភពលោកលើកទី៣៥ ចាប់ផ្តើមបើកនៅថ្ងៃ ចន្ទ នៅទីស្នាក់ការកណ្តាលរបស់អង្គការយូនេស្កូ នៅទីក្រុងប៉ារីស។ ការខូចខាតប្រាសាទព្រះវិហារដោយសារការវាយប្រហារពីប្រទេសថៃ នឹងត្រូវគណៈប្រតិភូកម្ពុជា ដឹកនាំដោយលោកសុខ អាន រដ្ឋមន្រ្តីទីស្តីការគណៈរដ្ឋមន្រ្តី លើកយកទៅនិយាយនៅក្នុងកិច្ចប្រជុំលើកនេះ។នៅក្នុងកិច្ចប្រជុំដែលបើកពីថ្ងៃទី ១៩ ដល់ថ្ងៃទី ២៩ មិថុនា ប្រទេសសមាជិករបស់គណៈកម្មាធិការត្រូវពិភាក្សាគ្នាពី រមណីយដ្ឋានថ្មីដែលត្រូវចុះក្នុងបញ្ជីបេតិកភណ្ឌពិភពលោក ត្រួតពិនិត្យលើការអភិរក្សរមណីយដ្ឋាន និងសម្រេចថា តើរមណីយដ្ឋានណាដែលកំពុងស្ថិតនៅក្នុងគ្រោះថ្នាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៣៣
កិច្ចប្រជុំប្រចាំឆ្នាំរបស់គណៈកម្មាធិការ លើកនេះផ្តោតសំខាន់ទៅលើការអភិរក្សរមណីយដ្ឋាន ដែលស្ថិតនៅក្នុងបញ្ជីបេតិកភណ្ឌពិភពលោក។ នៅមុនកិច្ចប្រជុំបើកសម្ពោធជាផ្លូវការ នៅម៉ោង ១០ព្រឹក នៅថ្ងៃចន្ទ គណៈប្រតិភូកម្ពុជា ដឹកនាំដោយលោកឧបនាយករដ្ឋមន្រ្តី សុខ អាន បានផ្តើមការងារ ដោយចូលជួបប្រជុំតទល់មុខ ជាមួយលោក Kishore RAOប្រធានមជ្ឈមណ្ឌលបេតិកភណ្ឌពិភពលោក។
នៅក្រោយកិច្ចប្រជុំ លោកសុខ អាន បាននិយាយប្រាប់វិទ្យុបារាំងអន្តរជាតិ ថា លោកបានប្រាប់ លោក Kishore RAOថា កម្ពុជាមានភស្តុតាងគ្រប់គ្រាន់ ជាឯកសារក្រដាស និងរូបភាពបង្ហាញពីប្រាសាទ ព្រះវិហារ ខូចខាតដោយគ្រាប់កាំភ្លើងថៃ ហើយ ថា ប្រសិនបើគណៈកម្មាធិការមិនចាត់វិធានការបន្ទាន់ ដើម្បីជួសជុលទាន់ពេលវេលាទេ ប្រាសាទព្រះវិហារ នឹងបាក់បែកកាន់តែធ្ងន់ធ្ងរ។
កម្ពុជាពេលនេះ ខំប្រឹងធ្វើសកម្មភាពពន្យល់ដល់មន្រ្តីយូនេស្កូ និងជាពិសេសប្រទេសសមាជិកដទៃទៀតរបស់គណៈកម្មាធិការ អំពីការខូចខាតរបស់ប្រាសាទព្រះវិហារ ដោយការវាយប្រហារគ្រាប់ផ្លោងជាង ៤០០គ្រាប់ពីសំណាក់ភាគីថៃ។
បញ្ហាកម្ពុជា និងថៃ ក្នុងរឿងប្រាសាទព្រះវិហារនឹងអាចត្រូវគេលើកយកទៅនិយាយ នៅក្នុងកិច្ចប្រជុំរួមរបស់គណៈកម្មាធិការ នៅថ្ងៃ ព្រហស្បតិ៍ទី ២៣ មិថុនា។ នេះបើតាមប្រភពព័ត៌មានពីភាគីថៃ ប៉ុន្តែ ភាគីកម្ពុជា ដឹកនាំដោយលោក សុខ អាន បញ្ជាក់ថា ចាប់ពីថ្ងៃចន្ទទី ២០ មិថុនា នេះ ថ្នាក់ដឹកនាំរបស់គណៈកម្មាធិការ បេតិកភណ្ឌពិភពលោកត្រូវជួបប្រជុំច្រើនដង និងដាច់ដោយឡែក ជាមួយភាគីកម្ពុជា និងថៃ ដើម្បីព្យាយាមរកដំណោះស្រាយឲ្យបានមុន គឺមិនឲ្យគេលើកយកបញ្ហានេះ ទៅនិយាយនៅក្នុងអង្គប្រជុំទាន់។
ភាគីថៃ វិញ ដែលជំទាស់តាំងពីដើមទីមិនឲ្យកម្ពុជាចុះប្រាសាទព្រះវិហារទៅក្នុងបញ្ជីបេតិកភណ្ឌពិភពលោក នៅតែទាមទារ ចង់ឲ្យគណៈកម្មាធិការបេតិកភណ្ឌពិភពលោក លើកពេលការពិភាក្សាស្តីពីគម្រោងផែនការអភិវឌ្ឍន៍ និងអភិរក្សរ៍ប្រាសាទព្រះវិហារ ទៅឆ្នាំក្រោយ។ គួរបញ្ជាក់ថា ការប្រជុំស្តីពីផែនការសកម្មភាពអភិរក្សប្រាសាទព្រះវិហារត្រូវបានលើកពេលម្តងហើយ នៅក្នុងប្រទេសប្រេស៊ីល ទៅតាមការទាមទាររបស់ប្រទេសថៃ។
សមាជិកម្នាក់របស់គណៈប្រតិភូថៃ គឺលោកAsda Jayanamaon បាននិយាយប្រាប់កាសែតបាងកកប៉ុស្តថៃ ថា គម្រោងអភិវឌ្ឍន៍ប្រាសាទព្រះវិហារនឹងមិនអាចចេញទៅរួចទេ នៅពេលណា ប្រទេសកម្ពុជា និងថៃ មិនសហការគ្នា។ មួយវិញទៀត ថៃនឹងមិនព្រមឲ្យកម្ពុជា ធ្វើកម្មវិធីអភិវឌ្ឍន៍បានទេ ព្រោះប្រាសាទព្រះវិហារស្ថិតនៅលើទឹកដីថៃ។
ចំណែកប្រធានគណៈប្រតិភូថៃ គឺរដ្ឋមន្រ្តីបរិស្ថានថៃ លោកស៊ូវីត ឃុនគីទី សន្យាថា នឹងសុំឲ្យយូនេស្កូសួរកម្ពុជាពីរឿង កញ្ចប់ប្រាក់ ៥ម៉ឺនដុល្លារដែលអង្គការនេះបានផ្តល់ទៅឲ្យកម្ពុជា ព្រោះថៃបានសំគាល់ថា កម្ពុជាបានយកប្រាក់នេះទៅអភិវឌ្ឍន៍ភូមិជុំវិញប្រាសាទ ប៉ុន្តែមិនមែនដើម្បីជួសជុលប្រាសាទ។
សំដីរបស់មន្រ្តីថៃ ត្រូវបានភាគីកម្ពុជាចាត់ទុកថា ជាការនិយាយដោយគ្មានមូលដ្ឋាន ព្រោះទាំងគម្រោងអភិវឌ្ឍន៍ប្រាសាទព្រះវិហារ និងទឹកដីជុំវិញប្រាសាទស្ថិតក្នុងដែនដីកម្ពុជា។ ម្យ៉ាងទៀត កម្ពុជាបានប្រើប្រាស់ថវិកាសមស្របទៅតាមកម្មវិធីរបស់យូនេស្កូ ដោយបានយកប្រាក់ទាំងនោះទៅជួលជុលអាងទឹកប្រាសាទ និងជួសជុលវត្តនៅក្បែរប្រាសាទ។
បើទោះជាមានការជំទាស់ពីភាគីថៃ លោក ឧបនាយករដ្ឋមន្រ្តីសុខ អាន ប្រធានគណៈប្រតិភូកម្ពុជា និងជាប្រធានគណៈកម្មាធិការជាតិបេតិកភណ្ឌពិភពលោកសង្ឃឹមថា បញ្ហាប្រាសាទព្រះវិហារនឹងត្រូវគេដោះស្រាយឲ្យចេញរួច នៅក្នុងកិច្ចប្រជុំប្រចាំឆ្នាំរបស់គណៈកម្មាធិការបេតិកភណ្ឌពិភពលោក ឆ្នាំ២០១១៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ