លោក សុខ អាន៖ កិច្ចប្រជុំនៅយូណេស្កូគ្មានលទ្ធផលតែមានអត្ថន័យជ្រាលជ្រៅ
លោកឧបនាយករដ្ឋមន្ត្រី សុខ អាន រដ្ឋមន្ត្រីទីស្តីការគណៈរដ្ឋមន្ត្រីបានវិលត្រឡប់ទៅដល់ ភ្នំពេញវិញហើយនៅព្រឹកថ្ងៃទី២៩ឧសភានេះបន្ទាប់ពីបានចូលរួមប្រជុំ នៅទីស្នាក់ការធំអង្គការយូណេស្កូនៅទីក្រុងប៉ារីសស្តីពីការខូចខាត ប្រាសាទព្រះវិហារ។លោកបាននិយាយប្រាប់អ្នកកាសែតថា កិច្ចប្រជុំនៅទីក្រុងប៉ារីសមិនទទួលបានលទ្ធផលជាក់ស្តែងអ្វីទេ ប៉ុន្តែ វាគឺជាកិច្ចប្រជុំដែលមានអត្ថន័យជ្រាលជ្រៅដោយហេតុថា តាមរយៈកិច្ចប្រជុំនេះ អង្គការយូណេស្កូបានឃើញច្បាស់អំពីមហិច្ឆតារបស់ថៃក្នុងការបិទបាំងកំហុសឆ្គងរបស់ខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤០
ទោះបីជាកិច្ចប្រជុំនៅទីក្រុងប៉ារីសស្តីពីបញ្ហាព្រះវិហារគ្មានទទួលបានលទ្ធផលអ្វីជាក់ស្តែងក៏ពិតមែនតែកិច្ចប្រជុំនេះមានអត្ថន័យយ៉ាងជ្រាលជ្រៅ។ អត្ថន័យរបស់វានៅត្រង់ថា អង្គការយូណេស្កូបានមើលឃើញយ៉ាងច្បាស់អំពីល្បិចកលរបស់ថៃក្នុងការបិទបាំងកំហុសឆ្គងរបស់ខ្លួន។ នេះគឺជាសារៈសំខាន់ដែលលោកសុខ អាន ប្រធានគណៈប្រតិភូកម្ពុជាបានប្រកាសជូនបណ្តាញសារព័ត៌មាននិងប្រជាពលរដ្ឋកម្ពុជាដែលទន្ទឹងរង់ចាំស្តាប់លទ្ធផលនៃកិច្ចប្រជុំនៅទីស្នាក់ការអង្គការយូណេស្កូនៅទីក្រុងប៉ារីសស្តីពីប្រាសាទព្រះវិហារ។
នៅពេលចុះពីលើយន្តហោះនៅព្រឹកមិញ លោកសុខ អាន រដ្ឋមន្ត្រីទីស្តីការគណៈរដ្ឋមន្ត្រីបានប្រាប់ក្រុមអ្នកកាសែតថា ថៃបានទទួលបរាជ័យទាំងអស់ក្នុងសំណើបីចំណុចរបស់ខ្លួន៖
-បរាជ័យទី១គឺ ថៃបានព្យាយាមទប់ស្កាត់មិនឲ្យយូណេស្កូបញ្ជូនអ្នកជំនាញការមកសិក្សាពីការខូចខាតប្រាសាទព្រះវិហារ ប៉ុន្តែ កម្ពុជាបានស្នើឲ្យអ្នកជំនាញការយូណេស្កូមកឲ្យបានឆាប់បំផុតហើយសេចក្តីសម្រេចស្តីពីបញ្ហានេះនឹងត្រូវធ្វើនៅក្នុងកិច្ចប្រជុំគណៈកម្មការបេតិកភណ្ឌពិភពលោកពីថ្ងៃទី១៩ដល់២៩មិថុនាខាងមុខនេះនៅទីក្រុងប៉ារីស។
-បរាជ័យទី២គឺ ផែនការរបស់ថៃដែលចង់ឲ្យគម្រោងអភិវឌ្ឍន៍និងគ្រប់គ្រងប្រាសាទព្រះវិហារ ត្រូវដកចេញពីបញ្ជីរបស់យូណេស្កូ ប៉ុន្តែ អង្គការយូណេស្កូបានបដិសេធ។
-រីឯបរាជ័យទី៣ គឺថៃចង់ឲ្យមានការចរចាទ្វេភាគីដោយគ្មានវត្តមានរបស់យូណេស្កូ ប៉ុន្តែ ទីបំផុតកិច្ចប្រជុំបានប្រព្រឹត្តទៅក្រោមវត្តមានរបស់អគ្គលេខាធិការអង្គការយូណេស្កូ។ លើសពីនេះថៃបានបដិសេធថាទាហានរបស់ខ្លួនមិនបានបាញ់គ្រាប់ផ្លោងចូលប្រាសាទព្រះវិហារទេ ខណៈដែលកម្ពុជាបានបង្ហាញភស្តុតាងយ៉ាងច្បាស់ក្រឡែតអំពីការខូចខាតប្រាសាទយ៉ាងធ្ងន់ធ្ងរ។ការខូចខាតប្រាសាទព្រះវិហារដែលជាសម្បត្តិបេតិកភណ្ឌពិភពលោកនឹងត្រូវលើកទៅពិភាក្សាម្តងទៀតនៅក្នុងកិច្ចប្រជុំគណៈកម្មការបេតិកភណ្ឌពិភពលោកនៅទីក្រុងប៉ារីសនាខែក្រោយនេះ។
នៅឯទីក្រុងបាងកក គណៈប្រតិភូថៃក៏បានអួតពីជោគជ័យរបស់ខ្លួនដែរ ដោយអះអាងថា អង្គការយូណេស្កូបានយល់ព្រមតាមសំណើរបស់ខ្លួនក្នុងការពន្យារពេលកិច្ចពិភាក្សាអំពីគំរោងគ្រប់គ្រងនិងអភិវឌ្ឍន៍ប្រាសាទព្រះវិហារ។ ប៉ុន្តែ ភាគីកម្ពុជាអះអាងថាមិនពិត។ ក្រៅពីកិច្ចប្រជុំនៅប៉ារីសមិនបានលទ្ធផល ឥឡូវនេះ ប្រជាពលរដ្ឋកម្ពុជាកំពុងទន្ទឹងរង់ចាំស្តាប់លទ្ធផលនៃសវនាការតុលាការទីក្រុងឡាអេស្តីពីចំណាត់ការបន្ទាន់ដើម្បីការពារប្រាសាទព្រះវិហារវិញម្តង។ សវនាការដែលនឹងបើកធ្វើនៅថ្ងៃចន្ទស្អែកនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ