កម្ពុជានិងបេសកកម្មដ៏ស្មុគស្មាញក្នុងនាមប្រធានអាស៊ាន
ចុះផ្សាយនៅថ្ងៃ៖
ស្តាប់ - ០៤:៤៥
សង្គ្រាមពាក្យសម្តីបានផ្ទុះឡើងកាន់តែខ្លាំងនៅក្នុងចំណោមសមាជិកអាស៊ានជុំវិញជម្លោះក្នុងដែនសមុទ្រចិនខាងត្បូងជាពិសេសរវាងកម្ពុជាដែលជាប្រធានអាស៊ាន និងហ្វីលីពីនដែលជារដ្ឋសមាជិកមួយ។ ទីក្រុងភ្នំពេញនិងម៉ានីលបានឆ្លងឆ្លើយគ្នាដោយពាក្យសម្តីធ្ងន់ៗ និងរហូតដល់មានការកោះហៅឯកអគ្គរដ្ឋទូតទៅស្តាប់ការតវ៉ារៀងៗខ្លួន។ ភាពតានតឹងនេះដែលបានកើតឡើងខណៈពេលដែលកម្ពុជាកំពុងធ្វើប្រធានផ្លាស់វេនអាស៊ាន បានបង្កើតជាវិញ្ញាសាដ៏តឹងតែងមួយសម្រាប់រដ្ឋាភិបាលក្រុងភ្នំពេញក្នុងការដោះស្រាយបញ្ហា។
ការបែកបាក់ក្នុងចំណោមសមាជិកអាស៊ានដោយសារតែជម្លោះក្នុងដែនសមុទ្រចិនខាងត្បូងមិនត្រឹមតែមិនទាន់ចប់ប៉ុណ្ណោះទេ ប៉ុន្តែ វាបែរជាឡើងកម្តៅខ្លាំងមួយកម្រិតទៀតផង។ ប៉ុន្មានថ្ងៃចុងក្រោយនេះ សង្គ្រាមពាក្យសម្តីបានផ្ទុះឡើងវិញបន្ទាប់ពីមន្ត្រីការបរទេសហ្វីលីពីនបានស្តីបន្ទោសកម្ពុជាជាសាធារណៈតាមរយៈទំព័រកាសែតថាធ្វើឲ្យខកខានក្នុងការចេញសេចក្តីថ្លែងការណ៍រួមនៃកិច្ចប្រជុំរដ្ឋមន្ត្រីការបរទេសអាស៊ានលើកទី៤៥នៅភ្នំពេញកាលពីថ្ងៃទី៩ដល់១៣កក្កដាកន្លងទៅ។
ការិះគន់នេះបានធ្វើឲ្យទីក្រុងភ្នំពេញឆ្លើយតបវិញដោយពាក្យសម្តីធ្ងន់ៗដើម្បីការពារខ្លួន។ ទីក្រុងភ្នំពេញមិនញញើតនឹងប្រើពាក្យថា ហ្វីលីពីន និងវៀតណាម ចង់ធ្វើវិទ្ធង្សនា និងបានប្លន់យកសេចក្តីថ្លែងការណ៍រួមនៃកិច្ចប្រជុំរដ្ឋមន្ត្រីការបរទេសអាស៊ាននៅទីក្រុងភ្នំពេញ ។ យ៉ាងណាក៏ដោយ ការអត្ថាធិប្បាយរិះគន់តាមរយៈសារព័ត៌មានបានរាលដាលពីម៉ានីលដល់បាងកក និងចុងក្រោយនេះបានទៅដល់សារព័ត៌មានជប៉ុននៅទីក្រុងតូក្យូទៅហើយ។
ជាការពិតណាស់ ប្រសិនបើមើលមួយភ្លែត ជម្លោះនេះហាក់ដូចជាកើតឡើងនៅផ្ទៃក្នុងរបស់អាស៊ានសុទ្ធសាធ។ ប៉ុន្តែ បើពិនិត្យមើលឲ្យស៊ីជម្រៅសមាជិកអាស៊ានមួយចំនួនដែលកំពុងតែពាក់មុខយក្សដាក់គ្នានៅពេលនេះគឺសុទ្ធតែបានទទួលរង(ទោះតិចឬច្រើន និងទោះជាចេតនាឬអចេតនាក្តី) នូវឥទ្ធិពលនៃការលូកដៃមកក្នុងតំបន់របស់មហាអំណាចធំៗពីរ គឺចិន និងសហរដ្ឋអាមេរិក។ ជាក់ស្តែង សមាជិកអាស៊ានមួយចំនួន ជាពិសេសហ្វីលីពីន និងវៀតណាមដែលមានទំនាស់ក្តៅគគុកជាងគេជាមួយចិន និងដែលបានរត់រកសហរដ្ឋអាមេរិកជាខ្នងបង្អែករួចទៅហើយនោះ បានសម្លឹងឃើញកម្ពុជាថាជាអ្នកស្និទ្ធជាមួយចិន។ ឥទ្ធិពលមហាអំណាចដែលលាក់ពីក្រោយខ្នងរៀងៗខ្លួន បើទោះបីជារឿងពិត ឬអាចគ្រាន់តែជាបុរេវិនិច្ឆ័យក៏ដោយចុះ ក៏វាបានផ្តល់ផលវិបាកយ៉ាងធ្ងន់ធ្ងរសម្រាប់សមាគមអាស៊ានរួចទៅហើយ។
ការបូញមាត់ បត់ដុំដៃ ឬដំឡើងសរសៃកដាក់គ្នារវាងសមាជិកអាស៊ាននៅពេលនេះត្រូវគេមើលឃើញថា គឺជាការខាតបង់ធំធេងសម្រាប់សមាគមដែលកំពុងតែមានឥទ្ធិពលមួយនេះ។ ខាតបង់ទី១ គឺការខូចប្រយោជន៍របស់អាស៊ានដែលកំពុងធ្វើដំណើររូតរះឆ្ពោះទៅកាន់គោលដៅសហគមន៍តែមួយវាសនាតែមួយនៅឆ្នាំ២០១៥ ។ ខាតបង់ទី២ គឺការបែកបាក់នេះរឹតតែបង្កលក្ខណៈងាយស្រួយដល់មហាអំណាចខាងក្រៅក្នុងការដណ្តើមឥទ្ធិពលនៅក្នុងតំបន់អាស៊ាន។
សម្រាប់ក្រសែភ្នែកក្រុមអ្នកវិភាគ សមាជិកទាំងអស់នៃសមាគមអាស៊ានដែលកម្ពុជាកំពុងតែបំពេញតួនាទីជាប្រធានផ្លាស់វេននៅពេលនេះ គួរតែផ្តោតសារសំខាន់ទៅលើផលប្រយោជន៍អាស៊ានទាំងមូលជាជាងការយកបញ្ហាដោយឡែកៗនៃប្រទេសនីមួយៗមកធ្វើជាត្រីមុខ។ មានន័យថា បញ្ហាហ្វីលីពីន ឬវៀតណាមជាមួយចិន មិនគួរនឹងក្លាយជាឆ្អឹងទទឹងករបស់អាស៊ានឡើយ ពីព្រោះជម្លោះដែនដីនៅសមុទ្រចិនខាងត្បូងមិនមែនជារឿងថ្មីថ្មោងទេ ហើយវាក៏មិនមែនជារឿងដែលអាស៊ានត្រូវអារកាត់បាននោះដែរ។
ម្យ៉ាងទៀត សមាជិកអាស៊ានគួរតែបង្ហាញភាពស្មោះត្រង់ជាមួយគ្នាក្នុងមហាគ្រួសារអាស៊ាន បើទោះបីជាមានប្រទេសខ្លះស្និទ្ធជាមួយចិន និងប្រទេសខ្លះស្និទ្ធនឹងអាមេរិកក៏ដោយចុះ។ ចូរកុំភ្លេចថា អាស៊ានត្រូវមានឯករាជភាពរបស់ខ្លួនដោយមិនត្រូវស្ថិតក្រោមឥទ្ធិពលរបស់មហាអំណាចណាមួយឡើយ។ ប៉ុន្តែ បញ្ហាដែលកំពុងញាំញីអាស៊ាននៅពេលនេះ ហាក់បានបង្ហាញថា សមាគមនេះកំពុងត្រូវបានបែងចែកដោយមហាអំណាចរួចទៅហើយ។
ដោយសារតែបញ្ហានេះបានកើតឡើងចំពេលដែលកម្ពុជាកំពុងធ្វើប្រធានអាស៊ាន ដូច្នេះ កម្ពុជាមានតួនាទីយ៉ាងសំខាន់ណាស់ក្នុងការដោះស្រាយបញ្ហា។ ដំណោះស្រាយបញ្ហាក្នុងកាលៈទេសៈដ៏លំបាកនេះប្រហែលជាទាមទារឲ្យកម្ពុជាដើរតួនាទីជាអ្នកសម្របសម្រួលឲ្យបានច្រើនជាជាងដើរតួជាភាគីទំនាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ