លោកអគ្គលេខាធិការ អ.ស.បបំពេញទស្សនកិច្ច រយៈពេលបីថ្ងៃ នៅរុស្ស៊ី
ក្នុងក្របខ័ណ្ឌទស្សនកិច្ច ដែលចាប់ផ្តើមថ្ងៃនេះ លោក Ban Ki-moon នឹងត្រូវ ទទួលជួបដោយលោកប្រធានាធិបតី Medvedev ព្រមទាំងធ្វើកិច្ចចរចា ជាមួយ លោក រដ្ឋមន្ត្រីការបរទេសរុស្ស៊ី Lavrov ជុំវិញ បញ្ហា បែបយ៉ាង ស្ថានការណ៍នៅប្រទេសលីប៊ី, បញ្ហា សន្តិសុខថាមពលនុយក្លេអ៊ែរជាដើម។ លោកបានជាប់ដៃរវល់នឹងបញ្ហា ទាំងនេះ នៅក្នុងពេលលោកមានវត្តមាន ម្សិលមិញនៅប្រទេសអ៊ុយក្រែន ជាទី ដែលកាលពី ២៥ឆ្នាំមុន បានរង មហាសោកនាដកម្ម ដ៏ធ្ងន់ធ្ងរ មិនធ្លាប់មានដូច ក្នុងប្រវត្តិនៃការប្រើ ថាមពលនុយក្លេអ៊ែរសម្រាប់គោលដៅស៊ីវិល។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់កែវ ឆាយាពីទីក្រុងម៉ូស្គូ
តាមដែលវិមានក្រេមឡាំងប្រកាសឲ្យដឹង គឺនៅថ្ងៃស្អែក ដែលលោក Ban Ki-moon នឹងត្រូវទទួលជួបប្រាស្រ័យជាមួយលោក ប្រមុខរដ្ឋរុស្ស៊ី Medvedev។
នៅថ្ងៃស្អែកដែរ លោក អគ្គលេខាធិការអ.ស.ប. ក៏នឹង ឡើង ថ្លែង ក្នុងសម័យប្រជុំ នៃ ”អង្គការសន្ធិសញ្ញាស្តីអំពីសន្តិសុខរួម” ហៅកាត់ជា ភាសារុស្ស៊ីថា ODKB ដែលមាន ៧ប្រទេស នៃអតីតសហភាពសូវៀតជាសមាជិក ពោលគឺ ប្រទេស Russie , Belarus ,Kazakhstan , Armenie , Ouzbekistan , Kirghizistan និងTadjikistan។
អង្គការនេះ ដែលបានប្រសូតមក ពេញរូប ពេញរាង លុះក្នុងឆ្នាំ២០០៣ តែងត្រូវមជ្ឈដ្ឋានយោធា-នយោបាយនៃលោកខាងលិច ប្រៀបប្រដូចទៅនឹង បក្សសម្ពន្ធ OTAN ដ្បិតគោលដៅវា គឺធានាការពារសន្តិសុខសម្រាប់ រាល់ប្រទេសសមាជិក តាមរយៈមាត្រាមួយនៃលក្ខន្តិកៈ វា ដែលចែងថា បើប្រទេសណាមួយ ជា សមាជិករងនូវអំពើឈ្លានពាន នោះប្រទេសឯទៀតជាសមាជិកនឹងនាំគ្នា រត់ទៅជួយ។
នៅពេលជួបចរចា ជាមួយលោកប្រមុខការទូតរុស្ស៊ី Serguei Lavrov លោក Ban Ki moon ទន្ទឹមនឹងស្ថានការណ៍ នៅលីប៊ី ក៏នឹងលើកយកទៅពិភាក្សា គឺរឿងស្វែងរកដំណោះស្រាយ ឲ្យ អធិករណ៍ នៅតំបន់ដើមបូព៌ា និងជាពិសេសសង្កត់ធ្ងន់ទៅ លើផលវិបាកបណ្តាលមកពី ការផ្ទុះឆេះ កាលពីជាង១ខែមុន នៃម៉ាស៊ីនប្រតិកម្មនុយក្លេអ៊ែរ ក្នុងស្ថានីយអគ្គិសនីបរមាណូ នៅក្រុងជប៉ុន Fukushima។
ពិតជាសោកនាដកម្មនេះ ដែលធ្វើឲ្យ លោក Ban Ki moon នឹកចងចាំ ទៅដល់ មហន្តរាយ កើតឡើង២៥ឆ្នាំមុន ក្នុងម៉ាស៊ីនប្រតិករនុយក្លេអ៊ែរមួយ នៃស្ថានីយអគ្គិសនីបរមាណូ នៅឯ ក្រុងTchernobyl ប្រទេស Ukraine។
នៅថ្ងៃព្រហស្បតិ៍ ម្សិលមិញ ក្រោយពីបានទៅឃើញដោយផ្ទាល់ភ្នែក កន្លែង ដែលស្ថិតនៅមិនឆ្ងាយ ប៉ុន្មាន ពី ម៉ុងធ្វើពី បេតុងកំពស់ប្រមាណ ១០០ម៉ែត្រ គ្របដណ្តប់ លើកាកសំណល់សល់ពីការផ្ទុះឆេះនៃម៉ាស៊ីនប្រតិកម្មនោះ ដើម្បីខាឃាំងកុំឲ្យធាតុវិទ្យុសកម្ម ជា គ្រោះថ្នាក់ដល់សុខភាពមនុស្ស សាយភាយចេញមកក្រៅ លោក Ban Ki moonបានថ្លែងដោយរំជួលចិត្តថា ត្រូវតែបើកធ្វើ ”វេទិកាពិភពលោក” សម្រាប់ជជែកពិភាក្សាគ្នា អំពីអនាគត នៃ ថាមពលនុយក្លេអ៊ែរ ដើម្បី បង្ការជាមុន កុំឲ្យកើតមានទៀតឡើយ មហន្តរាយបណ្តាលមកពី ការប្រើធាតុនុយក្លេអ៊ែរ សម្រាប់គោលដៅស៊ីវិល។
តាមប្រសាសន៍ លោកអគ្គលេខាធិការ អ.ស.ប. មេរៀន ហុចដោយសោកនាដកម្ម នៅក្រុង Fukushima និង ក្រុងTchernobyl ត្រូវតែ ដាស់តឿនយើង ឲ្យពង្រឹង “បទដ្ឋាននៃសន្តិសុខនុយក្លេអ៊ែរ ថ្នាក់ជាតិ ក៏ដូចជាថ្នាក់អន្តរជាតិ”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ