សន្និសីទឧទ្ទិសដល់ខួប២៥ឆ្នាំនៃសោកនាដកម្មឈែរណូប៊ីល(Tchernoby)l
សន្និសីទ ដែលថ្ងៃនេះប្រព្រឹត្តទៅ នៅរដ្ឋ អ៊ុយក្រែនបើកដោយលោកប្រធាននៃគណៈកម្មការអឺរ៉ុប José Manuel Barroso។ បញ្ហាមួយដែលសន្និសីទ លើកយកទៅជជែកពិភាក្សា គឺអំពីចំនួនមនុស្ស ដែលសុខភាពគេ បានត្រូវប៉ះពាល់ដោយរងធាតុវិទ្យុសកម្ម បណ្តាលមកពីការផ្ទុះឆេះនៃម៉ាស៊ីនប្រតិកម្មមួយ ពីក្នុងចំណោមម៉ាស៊ីនប្រតិកម្ម៤ របស់ ស្ថានីយអគ្គិសនីបរមាណូឈែរណូប៊ីល(Tchernobyl) កាលពី២៥ឆ្នាំមុន គឺកាលពី ខែមេសាឆ្នាំ១៩៨៦។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ កែវ ឆាយាពីទីក្រុង ម៉ូស្គូ
ទោះបីកន្លងផុត២៥ឆ្នាំក្តី ក៏នៅតែគ្មានទេតួលេខពិតប្រាកដ នៃចំនួន អ្នកធ្លាក់ខ្លួន ស្លាប់ បណ្តាលមកពីការរងធាតុវិទ្យុសកម្មនោះ។ ប៉ុន្តែចំហាយធាតុនេះ នៅតែបន្តធ្វើឲ្យ សរីរាង្គកាយ មនុស្សរាប់លាននាក់ ទ្រាំទ្រ ការឈឺចាប់នៅឡើយ។
តាមការប្រមាណឃើញនៃ អាជ្ញាធរអ៊ុយក្រែនគិតជាសរុបទៅ មានបណ្តាជន ប្រទេសខ្លួន និងប្រទេស២ជិតខាងទៀតគឺ បេឡូរុស និងរុស្ស៊ី ដល់ទៅ៥លាននាក់ ដែលបានរងទុក្ខនឹងមហន្តរាយនុយក្លេអ៊ែរនេះ។ ហើយពួកគេមួយភាគធំ នៅបន្តរស់នៅដដែល លើដែនដីបំពុលដោយធាតុវិទ្យុសកម្ម។
តាមតួលេខនៃអង្គការការពារបរិស្ថាន Greenpeace ដោយមកពីរងពិសពុលវិទ្យុសកម្ម ហេតុដែលបង្កជាជម្ងឺមហារីក ជម្ងឺបេះដូង ជម្ងឺនាំឲ្យខ្សោយដល់ប្រព័ន្ធការពារទល់នឹងមេរោគ មានអ្នកស្រុក នៅតាម អតីតសាធារណរដ្ឋសូវៀតទាំង៣នោះ បានធ្លាក់ខ្លួនស្លាប់អស់ ពី១សែន ដល់៤សែននាក់។
ប៉ុន្តែតួលេខខាងលើ គឺខុសឆ្ងាយ ពីទិន្នន័យជាតុល្យាការ ផ្តល់ដោយអង្គការសហប្រជាជាតិ ដែលកាលពីឆ្នាំ២០០៥ បានប្រមាណថា មានតែ៤ពាន់នាក់ប៉ុណ្ណោះ ដែលបានត្រូវផ្តាច់ជីវិត ដោយវិទ្យុសកម្មឈែរណូប៊ីល(Tchernobyl)។
ចំណែក”គណៈកម្មាធិការវិទ្យាសាស្ត្ររបស់អ.ស.ប.ខាងសិក្សាអំពីឥទ្ធិពលវិទ្យុសកម្ម “ ហៅកាត់ថា UNSCEAR បានទទួលស្គាល់ថា ៖
-មានស្លាប់តែ ៣១នាក់ប៉ុណ្ណោះក្នុងចំណោមពួកអ្នកលត់ភ្លើងដែលបានអន្តរាគម ភ្លាមភ្លែត ទៅលត់ភ្លើងឆាបឆេះនៅនឹងស្ថានីយ ឈែរណូប៊ីល(Tchernobyl)ក្រោយពីម៉ាស៊ីនប្រតិករទី៤របស់វាផ្ទុះឆេះហើយបង្ហុយចេញមកយ៉ាងក្រាស់ក្រែល នូវធាតុវិទ្យុសកម្មដែលជ្រួតជ្រាបពេញទំហឹងទៅក្នុងខ្លួនប្រាណគេ។
-និង ១៩នាក់ទៀត ស្លាប់តៗមកទៀតមកទល់ឆ្នាំ២០០៦ ក្នុងចំណោម ពួកអ្នកពុះពារជំនះ លើផលវិបាក នៃការផ្ទុះនោះ ដើម្បី ទប់ការសាយភាយទៅនៃធាតុវិទ្យុសកម្ម ,ដើម្បីខាឃាំងនៅមួយកន្លែងកាកសំណល់ម៉ាស៊ីនប្រតិកម្មដែលផ្ទុះខូចនោះ និងដើម្បី សំអាតតំបន់ក្នុងរង្វង់៣០គ.ម.នៅជុំវិញស្ថានីយ។
គួររំលឹកថា ពួកអ្នកពុះពារជំនះបែបនេះ ដែលទៅពីគ្រប់ច្រកល្ហកនៃអតីតសហភាពសូវៀត បានមានចំនួនដល់៦សែននាក់ឯណោះ ក្រោយពីមានការផ្ទុះខូចទៅ នៃ ស្ថានីយអគ្គិសនី បរមាណូ កាលពីថ្ងៃ២៦មេសាឆ្នាំ១៩៨៦ នៅក្រុងឈែរណូប៊ីល(Tchernobyl) ប្រទេសអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ