អូស្ត្រាលីពិចារណាឲ្យកោះមួយទៅអាមេរិកដើម្បីតាំងសំចតយន្តហោះស៊ើបការណ៍សម្ងាត់Drone
នៅក្នុងអំឡុងទស្សនកិច្ចនៅប្រទេសអូស្ត្រាលី កាលពីខែវិច្ឆិកា កន្លងទៅ លោកប្រធានាធិបតីបារ៉ាក់ អូបាម៉ាបានបង្ហាញឲ្យដឹងពីយុទ្ធសាស្ត្រយោធារបស់អាមេរិក នៅអាស៊ីប៉ាស៊ីហ្វិក នោះគឺការបញ្ជូនកងទ័ពម៉ារីនអាមេរិកប្រមាណ២៥០០នាក់ទៅដាក់នៅមូលដ្ឋានទ័ព ទីក្រុងDarwin។ នៅថ្ងៃពុធនេះ រដ្ឋមន្រ្តីការពារជាតិអូស្រ្តាលីបានបញ្ជាក់ ថា កងទ័ពម៉ារីនអាមេរិក២៥០នាក់នឹងទៅដល់អូស្ត្រាលី នៅពាក់កណ្តាលខែមេសាខាងមុខ។ ជាមួយគ្នានេះ មានព័ត៌មានថា អូស្រ្តាលីក៏កំពុងគិតគូរផ្តល់កោះមួយ ដើម្បីឲ្យអាមេរិកយកធ្វើជាមូលដ្ឋានសំចតយន្តហោះគ្មានមនុស្សបើក Drone។
ចុះផ្សាយនៅថ្ងៃ៖ កែប្រែថ្ងៃទី៖
កោះដែលអូស្រ្តាលីចង់ប្រគល់ឲ្យអាមេរិកដើម្បីធ្វើជាទីតាំងសំចតយន្តហោះDrone ឈ្មោះCocos ស្ថិតនៅប៉ែកពាយ័ព្យប្រទេសអូស្ត្រាលី។ ប្រព័ន្ធផ្សព្វផ្សាយអូស្ត្រាលីដែលបានដកស្រង់ព័ត៌មានពីកាសែតWashington post បានលើកឡើងថា តាមគម្រោង អាមេរិកចង់យកកោះ Cocosមកធ្វើជាមូលដ្ឋានទ័ពដើម្បីសំចតយន្តហោះគ្មានមនុស្សបើក Drone គឺជំនួសមូលដ្ឋានទ័ពអាមេរិកបច្ចុប្បន្ននៅកោះ Diego Garcia ដែលអាមេរិកបានជួលពីប្រទេសអង់គ្លេស និងត្រូវផុតអាណត្តិជួល នៅឆ្នាំ ២០១៦ខាងមុខ។
លោក Stephen Smithរដ្ឋមន្រ្តីការពារជាតិអូស្រ្តាលីបានបញ្ជាក់ថា អូស្រ្តាលីកំពុងពិចារណាពីគម្រោងនេះ ដែលដោយពិតទៅ ស្ថិតនៅក្នុងផែនការសហប្រតិបត្តិការយោធាយូរអង្វែងរបស់អាមេរិក និងអូស្រ្តាលី។ រដ្ឋមន្រ្តីការពារជាតិអូស្ត្រាលីនិយាយថា កោះ Cocos អាចជាជម្រើសមួយ ប៉ុន្តែ គេមិនទាន់អាចសម្រេចភ្លាមៗបាន ព្រោះ កោះនេះនៅមានបញ្ហាចោទទាក់ទងនឹងទីតាំង ដែលមិនទាន់មានហេដ្ឋារចនាសម្ព័ន្ធគ្រប់គ្រាន់ដើម្បីទទួលយន្តហោះ ចុះចត។ ដើម្បីសាងសង់ទីលានចុះចតយន្តហោះDrone គេត្រូវការលុយប្រមាណ ពី៧៥ ទៅ ១០០លានដុល្លារអូស្ត្រាលី។
ផែនការយកកោះCocos ធ្វើជាទីតាំងសំចតយន្តហោះDroneជាផ្នែកមួយនៃការពង្រីកវត្តមានរបស់អាមេរិក នៅតំបន់អាស៊ីប៉ាស៊ីហ្វិក ដែលធ្វើឲ្យប្រទេសនៅអាស៊ី ដូចជាចិន និងឥណ្ឌូណេស៊ី ជាដើមតវ៉ាប្រឆាំង។ កោះCocosរបស់អូស្ត្រាលីដែលមានប្រជាជនរស់នៅប្រមាណជាង ៦០០នាក់ ស្ថិតទៅក្បែរប្រទេសឥណ្ឌូណេស៊ី និងខិតទៅរកតំបន់សមុទ្រចិនខាងត្បូង។
ចិនបារម្ភចំពោះការលូកដៃរបស់អាមេរិក ព្រោះថា ដោយបើកមូលដ្ឋានទ័ពនៅកោះនេះ អាមេរិកនឹងអាចប្រើយន្តហោះ ស៊ើបការណ៍សម្ងាត់Drone ដើម្បីហោះឆ្វែលនៅក្នុងតំបន់ទឹកសមុទ្រចិន ភាគខាងត្បូង ដែលរហូតមកដល់ពេលនេះ ចិន និងបណ្តាប្រទេសអាស៊ីផ្សេងទៀតកំពុងឈ្លោះ ដណ្តើមគ្នាគ្រប់គ្រងប្រជុំកោះParacels និងSpratley។
មួយវិញទៀត ក្នុងកិច្ចព្រមព្រៀងលើសហប្រតិបត្តិការយោធា ក្រៅតែបញ្ជូនកងទ័ពម៉ារីនជាង ២៥០០នាក់ទៅមូលដ្ឋានទ័ពDarwin អូស្ត្រាលីបានយល់ព្រមផងដែរ ឲ្យអាមេរិកប្រើប្រាស់កំពង់ផែនៅទីក្រុងPerth (នៅប៉ែកនិរតីអូស្ត្រាលី) ធ្វើជាមូលដ្ឋានទ័ពសម្រាប់នាវាផ្ទុកយន្តហោះចម្បាំង និងនាវាមុជទឹកចូលចត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ