ឃាតកម្មទៅលើរូបទីប្រឹក្សាដ៏ជំនិតរបស់លោក Hamid karzaï
បន្ទាប់ពីបានធ្វើឃាតទៅលើរូបប្អូនប្រុសរបស់លោកប្រធានាធិបតី Hamid karzaï នៅថ្ងៃអង្គារមុននៅខេត្ត kandahar ប៉ែកខាងត្បូងប្រទេសអាហ្វហ្កានិស្ថានមក ពួកឧទ្ទាមតាលីបង់ ទើបបានប្រកាសនៅថ្ងៃចន្ទ ១៨កក្កដានេះទៀត ថាពួកគេបានធ្វើឃាតទៅលើរូបទីប្រឹក្សាដ៏ជំនិតម្នាក់ទៀតរបស់លោកប្រធានាធិបតីអាហ្វហ្កានិស្ថានគឺលោក Jan Mohammad Khan នៅយប់ថ្ងៃអាទិត្យ១៧កក្កដាម្សិលមិញ។ ពួកតាលីបង់ បានវាយប្រហារនៅនឹងផ្ទះរបស់ជនរងគ្រោះតែម្តងនាទីក្រុងកាប៊ូល។ មិនតែប៉ុណ្ណោះ អ្នកតំណាងរាស្ត្រម្នាក់ក៏បានរងគ្រោះស្លាប់នៅឱកាសវាយប្រហារនេះ ដែរ។
ចុះផ្សាយនៅថ្ងៃ៖
ស្តាប់ - ០២:០២
តាមក្រសែភ្នែក របស់លោក ហាមីដ កាហ្សៃ លោក Jan Mohammad Khan ដែលទើបត្រូវបាន ពួកឧទ្ទាមតាលីបង់ ធ្វើឃាតនៅយប់ថ្ងៃអាទិត្យ ១៧ កក្កដា ម្សិលមិញ ក៏ជាបុគ្គលដ៏សំខាន់មួយរូបដូចជាលោក Ahmed Wali Karzaï ដែលត្រូវជាប្អូនប្រុសរបស់លោកប្រធានាធិបតី Hamid Karzaïដែរ។ លោក Ahmed Wali Karzaï នេះ ដែលជាប្រធានក្រុមប្រឹក្សាខេត្ត Kandahar ត្រូវបានមេអង្គរក្សរបស់គាត់ជាអ្នកសម្លាប់កាលពីសប្តាហ៍មុន។ នេះ បើយោងតាមអ្នកទទួលខុសត្រូវជាន់ខ្ពស់ម្នាក់របស់រដ្ឋាភិបាលអាហ្វហ្កានិស្ថាន។
ចំណែកលោក Jan Mohammad Khan វិញ ក៏ ជាមិត្តដ៏យូរអង្វែងមកហើយរបស់លោកប្រធានាធិបតី Hamid karzaï។ ម្យ៉ាងទៀត ក៏ដូចលោកប្រធានាធិបតីដែរ លោក Jan Mohammad Khan ជាសមាជិកម្នាក់ នៃកុលសម្ព័ន្ធ pachtoune ប្រកបដោយឥទ្ធិពលខ្លាំង ភាគខាងត្បូង ឈ្មោះ Popalzaï។ គាត់ក៏ជា អតីតអភិបាលខេត្ត Ouzgan ដែលស្ថិតនៅជាប់នឹងព្រំដែនខេត្ត កង់ដាហា។ មិនតែប៉ុណ្ណោះ លោក Mohammad Khan គឺជាឥស្សរជនខ្លាំងនិងចំបងមួយរូប ក៏ព្រមទាំងជាខ្សែរយៈសំខាន់ៗ បំផុតរបស់លោកប្រធានាធិបតីអាហ្វាហ្កានិស្ថានដែរ នៅតំបន់អស្ថិរភាពប៉ែកខាងត្បូងប្រទេសអាហ្វហ្កានិស្ថាន ដែលជា ដើមកំណើតជាប្រវត្តិសាស្ត្រនិងជាមូលដ្ឋានរបស់ពួកឧទ្ទាមតាលីបង់។
ឃាតកម្មនៅក្នុងរង្វង់ក្រុមអ្នកជំនិតរបស់ប្រធានាធិបតី ហាមីដកាហ្សៃនេះ បានកើតមាន ជួនចំពេលមួយ ដ៏សំខាន់នៅក្នុងប្រទេសអាហ្វហ្កានិស្ថាន ជាមួយនឹងការចាប់ផ្តើមផ្តល់សន្ទុះជាផ្លូវការឲ្យ ការផ្ទេរ ការទទួលខុសត្រូវផ្នែកសន្តិសុខរបស់អង្គការអូតង់ ទៅឲ្យកងកម្លាំងអាហ្វហ្កានិស្ថាន នៅក្នុងដំណាក់កាលទីមួយ។ កងទ័ពសម្ព័ន្ធមិត្តអូតង់ បានចាប់ផ្តើមដកកងទ័ពរបស់ខ្លួន ជាបណ្តើរៗហើយដែរ ក៏ប៉ុន្តែ ក្រុមអ្នកជំនាញការនានា នៅតែមានការមន្ទិលសង្ស័យជានិច្ចទៅលើសមត្ថភាពផ្ទាល់របស់កងកម្លាំងអាហ្វហ្កានិស្ថាន នៅក្នុងការធានាសុវត្ថិភាព ដោយខ្លួនឯងផ្ទាល់នៅក្នុងប្រទេសនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ