យុទ្ធនាការបង្ក្រាបគ្រឿងញៀនដ៏កក្រើកនៅប៉ែកពាយ័ព្យប្រទេស
សមត្ថកិច្ចចម្រុះកំពុងបើកយុទ្ធនាការបង្ក្រាបគ្រឿងញៀនដ៏កក្រើកមួយ នៅក្នុងបណ្តាខេត្តប៉ែកពាយ័ព្យប្រទេស។ នៅពាក់កណ្តាលអធ្រាត្រឆ្លងចូលថ្ងៃទី៣មេសានេះ សមត្ថកិច្ចបានសម្រុកចូលក្នុងផ្ទះសំណាក់មួយនៅក្នុងខេត្ត បន្ទាយមានជ័យដែលជាសម្បុកចែកចាយ និងប្រើប្រាស់ថ្នាំញៀន។ មនុស្ស២៥នាក់ត្រូវបានឃាត់ខ្លួននៅក្នុងប្រតិបត្តិការនេះ។ កាលពីថ្ងៃសៅរ៍ម្សិលមិញ សមត្ថកិច្ចចម្រុះខេត្តសៀមរាបបានឃាត់ខ្លួនមនុស្ស៥នាក់ក្នុងនោះ មានមន្ត្រីប៉ូលិស២នាក់ផង ពីបទជាប់ពាក់ពន្ធ័នឹងការជួញដូរគ្រឿងញៀននេះ។ មន្ត្រីប៉ូលិសដែលជាជនសង្គមងងឹតត្រូវបានវែកមុខជាបន្តបន្ទាប់។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ ប៉ែន បូណា ពីទីក្រុងភ្នំពេញ
មនុស្ស២៥នាក់ត្រូវបានសមត្ថកិច្ចចម្រុះខេត្តបន្ទាយមានជ័យឃាត់ខ្លួនកាលពីម៉ោង១រំលងអធ្រាត្រឈានចូលថ្ងៃទី៣ ខែមេសា ឆ្នាំ២០១នេះ ខណៈដែលសមត្ថកិច្ចឆ្មក់ចូលក្នុងផ្ទះសំណាក់មួយក្នុងសង្កាត់ប៉ោយប៉ែត ខេត្តបន្ទាយមានជ័យ ។
ប្រភពពីប៉ូលិសបានឲ្យដឹងថា ម្ចាស់ផ្ទះសំណាក់ ២នាក់ប្តីប្រពន្ធត្រូវបានគេសង្ស័យថាជាអ្នកផ្តល់ទីតាំងឲ្យអ្នកចែកចាយនិងប្រើប្រាស់គ្រឿងញៀន។ ចំណែកឯភ្ញៀវជាង២០នាក់ទៀតដែលស្នាក់នៅក្នុងផ្ទះសំណាក់នេះ គឺជាអ្នកចែកចាយនិងប្រើប្រាស់ថ្នាំញៀន។ ក្នុងយុទ្ធនាការនេះ សមត្ថកិច្ចបានដកហូតថ្នាំញៀន និងសម្ភារៈជាច្រើនទៀតទុកជាវត្ថុតាង។
នេះជាប្រតិបត្តិការដ៏ធំមួយទៀតក្នុងចំណោមប្រតិបត្តិការជាច្រើនលើកក្នុងខេត្តបន្ទាយមានជ័យដើម្បីបង្ក្រាបក្រុមសង្គមងងឹតជួញដូរគ្រឿងញៀន។ ប្រតិបត្តិការទ្រង់ទ្រាយធំនិងក្តៅគគុកបានចាប់ផ្តើមតាំងពីចុងខែមីនាមក នៅប៉ែកពាយ័ព្យប្រទេស ជាពិសេសខេត្តបន្ទាយមានជ័យដែលអាជ្ញាធរជាតិប្រយុទ្ធប្រឆាំងគ្រឿងញៀនជ្រើសយកជាខេត្តគំរូសម្រាប់ការប្រយុទ្ធប្រឆាំងគ្រឿងញៀន ពីព្រោះតែខេត្តជាប់ជាយដែនមួយនេះសម្បូរដោយសម្បុកអ្នកជួញដូរថ្នាំញៀន។
កាលពីថ្ងៃទី២មេសាម្សិលមិញ សមត្ថកិច្ចចម្រុះខេត្តសៀមរាប សហការជាមួយសមត្ថកិច្ចរាជធានីភ្នំពេញ និងក្រសួងមហាផ្ទៃ ក៏បានបើកយុទ្ធនាការធំមួយដែរក្នុងការបង្ក្រាបអ្នកជួញដូរគ្រឿងញៀនខុសច្បាប់នេះ។ មនុស្ស៥នាក់ក្នុងនោះមានមន្ត្រីប៉ូលិស២នាក់ផងត្រូវបានគេឃាត់ខ្លួនបញ្ជូនទៅតុលាការ។ មន្ត្រីប៉ូលិសទាំងពីរនាក់ដែលម្នាក់ជាប៉ូលិសព្រហ្មទណ្ឌកម្រិតធ្ងន់ និងម្នាក់ទៀតជាមន្ត្រីប៉ូលិសនៃការិយាល័យប្រឆាំងគ្រឿងញៀនខេត្តសៀមរាបត្រូវបានគេសង្ស័យថាមានជាប់ពាក់ពន្ធ័នឹងផលប្រយោជន៍ដែលបានមកពីការចែកចាយគ្រឿងញៀន។
រហូតមកទល់នឹងពេលនេះ មានមន្ត្រីប៉ូលិសខេត្តបន្ទាយមានជ័យយ៉ាងហោចណាក់ក៏៥នាក់ដែរ ដែលមានតំណែងចាប់ពីថ្នាក់ស្នងការ ស្នងការរងរហូតដល់មន្ត្រីការិយាល័យត្រូវបានគេចាប់ខ្លួនពីបទពាក់ពន្ធ័នឹងគ្រឿងញៀន។ ការវែកមុខមន្ត្រីប៉ូលិសជាបន្តបន្ទាប់នេះបានធ្វើឡើងបន្ទាប់ពីការចាប់ខ្លួនលោក មឹក តារា ឧត្តមសេនីយ៍ផ្កាយបីដែលត្រូវគេចោទប្រកាន់ថាជាមេខ្លោងបង្កើតបណ្តាញជួញដូរគ្រឿងញៀនដ៏ធំមួយនៅទូទាំងប្រទេស។ លោក មឹក តារា អតីតអគ្គលេខាធិការអាជ្ញាធរជាតិប្រឆាំងគ្រឿងញៀន ចំណុះឱ្យក្រសួងមហាផ្ទៃ កំពុងជាប់ឃុំឃាំងក្នុងពន្ធនាគារខណៈដែលយុទ្ធនាការបោសសម្អាតគ្រឿងញៀនកំពុងសម្រុកធ្វើយ៉ាងកក្រើកក្នុងខេត្តភាគពាយព្យ័ប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ