ជីវិតផ្សារភ្ជាប់នឹងសិល្បៈជាផ្នែកមួយនៃប្រជាប្រិយភាពរបស់សម្តេចឪ
ចុះផ្សាយនៅថ្ងៃ៖
ស្តាប់ - ០៨:០២
ក្រៅពីទេពកោសល្យដ៏ប៉ិនប្រសប់ខាងនយោបាយ និងជាមហាក្សត្រដ៏ជាទីគោរពស្រឡាញ់របស់ប្រជារាស្ត្រ សម្តេចឪនរោត្តម សីហនុ ក៏មានជីវិតផ្សារភ្ជាប់យ៉ាងជិតស្និទ្ធទៅនឹងសិល្បៈផងដែរ។ ពេញមួយព្រះជន្មរបស់ព្រះអង្គ សម្តេចឪគឺជាអ្នកសេ្នហាសិល្បៈដ៏ខ្លាំងក្លាបំផុត។ បទភ្លេង ចម្រៀង ភាពយន្ត គឺជាផ្នែកដ៏សំខាន់មួយមិនអាចកាត់ផ្តាច់បានពីជីវិតរបស់ទ្រង់។ ជីវិតពោរពេញដោយសិល្បៈនេះហើយដែលបានវេញត្របាញ់មនោសញ្ចេតនាកាន់តែជ្រាលជ្រៅរវាងព្រះអង្គនិងប្រជារាស្ត្រខ្មែរ។
មិនត្រឹមតែជាមហាក្សត្រប្រកបដោយទសពិធរាជធម៌ ជាឥស្សរជននយោបាយដ៏ឆ្នើម និងជាបិតាឯករាជ្យជាតិ ប៉ុណ្ណោះទេ ប៉ុន្តែ អតីតព្រះមហាក្សត្រដ៏ល្បីល្បាញដែលពលរដ្ឋខ្មែរហៅថា សម្តេចឪនោះ ក៏ជាតួអង្គសិល្បៈករដ៏មោះមុតមួយព្រះអង្គផងដែរ។ ព្រះអង្គក៏មានជីវិតផ្សារភ្ជាប់នឹងសិល្បៈដ៏ជ្រាលជ្រៅបំផុតដែល ពិបាកនឹងវាស់ស្ទង់។
ពេញមួយព្រះជន្មរបស់ព្រះអង្គ ទោះជាជាប់រវស់នឹងព្រះរាជបូជនីយកិច្ចរាប់រយជំពូកដើម្បីជាតិ យ៉ាងណាក៏ដោយ ក៏ព្រះអង្គមិនដែលភ្លេចសិល្បៈដែរ។ ជាអ្នកនិពន្ធបទភ្លេង និងចម្រៀង ជាអ្នកនិពន្ធនិងដឹកនាំរឿងភាពយន្ត ជាតួអង្គសម្តែង និងជាអ្នកចម្រៀងមនោសញ្ចេតនាដ៏លន្លង់លន្លោច... ទេពកោសល្យសិល្បៈទាំងនេះបានផ្តល់ឲ្យសម្តេចព្រះនរោត្តម សីហនុ នូវរូបភាពជាតួអង្គមួយផ្សេងទៀត ក្រៅពីតួអង្គជាក្សត្រ និងជាអ្នកនយោបាយដ៏ឆ្នើម។ គេអាចនិយាយបានថា សិល្បៈគឺជាផ្នែកដ៏សំខាន់មួយទៀតនៃជីវិតរបស់អង្គសម្តេចឪ។
តាំងពីព្រះអង្គនៅក្មេងម្ល៉េះ សម្តេចព្រះនរោត្តម សីហនុ ក៏ត្រូវបានមហាជនខ្មែរស្គាល់ថាជាតួឯកក្នុងខ្សែភាពយន្តដែលជា ព្រះរាជនិពន្ធ ដឹកនាំរឿង និងសម្តែងផ្ទាល់ទៀតផង។ ខ្សែភាពយន្តដែលជាស្នាព្រះហស្តរបស់ព្រះអង្គមានច្រើនរឿង ក្នុងនោះ ខ្សែភាពយន្តល្បីល្បាញជាងគេ មានដូចជា រឿងព្រៃប្រសិទ្ធិ, និងរឿងឆាយាលើអង្គរជាដើម។
ក្រៅពីភាពយន្ត បទចម្រៀងដែលជាស្នាព្រះហស្តរបស់ព្រះអង្គក៏មានរាប់សិបបទដែរ ក្នុងនោះ បទចម្រៀងមួយចំនួនជាបទដ៏ពេញនិយម និងមិនចេះរីងស្ងួត។ ជាក់ស្តែង បទរាត្រីជួបភ័ក្ត្រ ម៉ូនីកា និងកុលាបភ្នំពេញជាដើម សុទ្ធសឹងជាបទដ៏មានប្រជាប្រិយដែលគេចូលចិត្តប្រគំក្នុង ពិធីធំៗមិនសូវខាន។ ជីវិតដែលផ្សារភ្ជាប់នឹងសិល្បៈបែបនេះហើយដែលបានជួយជំរុញ ប្រជាប្រិយភាពរបស់ព្រះអង្គឲ្យកាន់តែខ្ពស់ត្រដែតឡើង ពីព្រោះសិល្បៈជាចំណែកដ៏សំខាន់មិនអាចខ្វះបានសម្រាប់ជីវិតរបស់ មនុស្ស។
សិល្បៈក៏ជាចំណែកសំខាន់ក្នុងការជំរុញឲ្យមេដឹកនាំប្រទេស ផ្សារភ្ជាប់មនោសញ្ចេតនាជាមួយប្រជាពលរដ្ឋរបស់ខ្លួនដែរ។ ជាទូទៅ មេដឹកនាំដែលមានជីវិតផ្សារភ្ជាប់នឹងសិល្បៈ ច្រើនតែជាអ្នកដែលមានមនោសញ្ចេតនាវេញត្របាញ់ជាមួយប្រជាពលរដ្ឋ។ មនោសញចេតនាដ៏ជ្រាលជ្រៅដែលសម្តេចឪមានចំពោះប្រជារាស្ត្ររបស់ព្រះអង្គ ក៏ពិតជាមិនអាចកាត់ផ្តាច់បានពីជីវិតសិល្បៈរបស់ព្រះអង្គដែរ។
ទោះជានៅនាទីចុងក្រោយនៃព្រះជន្មរបស់ព្រះអង្គ ក៏សម្តេចឪ នៅតែផ្សារភ្ជាប់នឹងសិល្បៈយ៉ាងសកម្មដដែល។ ព្រះអង្គនៅតែបន្តដឹកនាំថតខ្សែភាពយន្ត និងថតចម្រៀងដោយគ្មាននឿយណាយ។ បទចម្រៀងដែលពេញនិយមបំផុតនៅក្រោយពេលដែលព្រះអង្គសោយទិវង្គតគឺបទ «លាហើយកម្ពុជា»។ លាហើយកម្ពុជា បានបង្ហាញពីមនោសញចេតនាដ៏ជ្រាលជ្រៅរបស់ព្រះអង្គចំពោះជាតិមាតុភូមិ និងកូនចៅរបស់ព្រះអង្គ មុនពេលដែលទ្រង់លាចាកពួកគេជារៀងរហូតគ្មានថ្ងៃវិលត្រឡប់។
ឥឡូវនេះ ព្រះមហាវីរក្សត្រដែលជាទីស្រឡាញ់របស់ប្រជារាស្ត្រខ្មែរបានសោយទិវង្គត ចោលកូនចៅរបស់ព្រះអង្គបាត់ទៅហើយ។ ព្រះបរមសពដែលមានព្រះរាជមរណៈនាមថា ព្រះបរមរនៈកោដ្ឋ ត្រូវបានថ្វាយព្រះភ្លើងបូជារួចរាល់ហើយនៅថ្ងៃចន្ទនេះក្រោមសម្រែក ទួញសោក វិយោគសង្វេគយ៉ាងក្រៀមក្រំបំផុតរបស់ប្រជារាស្ត្រខ្មែរ និងភ្ញៀវបរទេសជាច្រើន។
រូបកាយរបស់សម្តេចឪជាទីគោរពស្រឡាញ់របស់ប្រជាពលរដ្ឋខ្មែរបាន ក្លាយជាផេះផង់ទៅហើយ ប៉ុន្តែ សមិទ្ធផលទាំងឡាយរបស់ទ្រង់ ក្នុងនោះក៏មានស្នាដៃសិល្បៈផងដែរ មិនបានបាត់ទៅជាមួយរូបកាយព្រះអង្គឡើយ។ ស្នាដៃសិល្បៈទាំងនោះនឹងក្លាយទៅជាសម្បត្តិវប្បធម៌ដ៏មានតម្លៃមិនចេះ រីងស្ងួត និងបានក្លាយជាការចងចាំសម្រាប់កូនចៅ ចៅទួតរបស់ព្រះអង្គចំពោះព្រះវររាជបិតាដ៏ជាទីគោរពស្រឡាញ់របស់ពួកគេ ដែលមិនអាចបំភ្លេចបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ