ប៉ូលីស៖ គ្រោះថ្នាក់ចរាចរណ៍លើក្រុមតារា អាចមកពីរថយន្តកុងតឺន័រ
ប៉ូលីសបានសន្និដ្ឋានជាបឋមថា មូលហេតុនៃគ្រោះថ្នាក់ចរាចរណ៍លើផ្លូវជាតិលេខ៤ ដែលកើតឡើងលើរថយន្តរបស់តារាចម្រៀង ខេមរៈ សិរីមន្ត កាលពីយប់ថ្ងៃព្រហស្បតិ៍ម្សិលមិញនោះ អាចបណ្តាលមកពីរថយន្តកុងតឺន័រ។ គ្រោះថ្នាក់ចរាចរណ៍ដ៏រន្ធត់នេះ បានសម្លាប់មិត្តភក្តិក្រុមរាំរបស់តារាចម្រៀង ខេមរៈ សិរីមន្ត នោះ៤នាក់ ក្នុងនោះមានកូនប្រុសរបស់តារាកំប្លែងនាយកុយ និងតារាចម្រៀងអាយ៉ៃលោកស្រីណយ សំណាង។ ហើយបន្ទាប់មក គ្រោះថ្នាក់មួយទៀតបានកើតឡើងនៅកន្លែងដដែល បានសម្លាប់មនុស្ស២នាក់ថែមទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៩
ក្រុមប៉ូលីសបានធ្វើការសន្និដ្ឋានបឋមថា គ្រោះថ្នាក់ចរាចរណ៍ដែលបានកើតលើរថយន្តរបស់តារាចម្រៀងខេមរៈ សិរីមន្ត កាលពីម៉ោងជិត៩យប់ ថ្ងៃទី៧មិនា ក្នុងស្រុកព្រៃនប់ខេត្តព្រះសីហនុនោះ អាចបណ្តាលមកពីរថយន្តកុងតឺន័រ។ ស្នងការខេត្តព្រះសីហនុ លោកឧត្តមសេនីយ តាក វណ្ណថា បានមានប្រសាសន៍ប្រាប់វិទ្យុបារាំងអន្តរជាតិថា គ្រោះថ្នាក់ចរាចរណ៍នេះអាចបណ្តាលមកពីរថយន្តកុងតឺន័រ ដែលគេឃើញបើករេពេញថ្នល់ មុនមានគ្រោះថ្នាក់ចរាចរណ៍នេះ។
លោកស្នងការបានបញ្ជាក់ថា រូបភាពបែបនេះ វាអាចបណ្តាលមកពីរថយន្តចាប់ហ្វ្រាំងមិនស៊ី ឬថាអ្នកបើកបរបានស្រវឹង។ ហើយនៅពេលនោះ មានភ្លៀងធ្លាក់ខ្លាំងទៀតផង។ លោកឧត្តមសេនីយតាក វណ្ណថា បន្តថា កំលាំងមានសមត្ថកិច្ចកំពុងតាមចាប់ខ្លួនអ្នកបើកបររថយន្តកុងតឺន័រនោះ ដែលបានរត់គេចខ្លួន ក្រោយមានគ្រោះថ្នាក់ចរាចរណ៍នេះ។
ទន្ទឹមគ្នានេះដែរ ក្រុមប៉ូលីសជំនាញដែលកំពុងរៀបចំសណ្តាប់ធ្នាប់នៅកន្លែងកើតហេតុ និងប្រមូលវត្ថុតាងនៃគ្រោះថ្នាក់ចរាចរណ៍នៅថ្ងៃនេះ ក៏បានស្វែងរកជួបតារាចម្រៀង ខេមរៈ សិរីមន្ត ដែលបានស្ថិតនៅក្នុងរថយន្តរងគ្រោះនោះដែរ ដើម្បីទទួលបានព័ត៌មានលំអិត។
គ្រោះថ្នាក់ចរាចរណ៍រវាងរថយន្តកុងតឺន័រ និងរថយន្តក្រុមតារាចម្រៀង ខេមរៈ សិរីមន្ត បានកើតឡើងនៅម៉ោងជិត៩យប់ ថ្ងៃទី៧ មិនា ក្នុងភូមិចំណោទរាម ឃុំបិតត្រាង ស្រុកព្រៃនប់ ខេត្តព្រះសីហនុ។ នៅក្នុងរថយន្តដែលមានមនុស្ស៨នាក់នោះ ៤នាក់បានស្លាប់ភ្លាម ដែលគេដឹងថាជាក្រុមរាំរបស់លោកខេមរៈ សិរីមន្ត ដែលក្នុងនោះក៏មានកូនប្រុសតារាកំប្លែង នាយ កុយ និងកូនប្រុសលោកស្រី ណយ សំណាង តារាចម្រៀងអាយ៉ៃ។ ចំណែកលោក ខេមរៈ សិរីមន្ត និងនារី៣នាក់ទៀត បានរងរបួស។
ជាហេតុការណ៍ដែលកម្រកើតមាន ពីព្រោះខណៈដែលក្រុមសមត្ថកិច្ចកំពុងអន្តរាគមន៍ក្នុងគ្រោះថ្នាក់ចរាចរណ៍លើក្រុមតារាចម្រៀងនេះ ស្រាប់តែរថយន្តដឹកស្រាបៀរអង្គរ ដែលគេសង្ស័យថា មានបញ្ហាហ្វ្រាំងដែរនោះ បានមកបុកក្រុមការងារទាំងនេះ ហើយបានបណ្តាលអោយមនុស្សស្លាប់២នាក់ និងរបួសមួយចំនួនថែមទៀត ក្នុងនោះក៏មានមន្ត្រីប៉ូលីសផងដែរ។ អ្នកស្លាប់២នាក់ចុងក្រោយនេះ បើតាមការបញ្ជាក់របស់នាយការិយាល័យចរាចរណ៍ផ្លូវគោក លោក ព្រហ្ម ពៅ គឺជាបុគ្គលិករបស់ក្រុមហ៊ុនកាំមីនកូ និងអ្នកបើករថយន្តស្ទូច។
គ្រោះថ្នាក់ចរាចរណ៍ត្រូវបានរាជរដ្ឋាភិបាលកម្ពុជាចាត់ទុកថា ជាឧបសគ្គធំជាងគេ សម្រាប់ការអភិវឌ្ឍន៍សង្គមសេដ្ឋកិច្ចកម្ពុជាជាងជំងឺអេដស៍ និងគ្រាប់មីនទៅទៀត។ របាយការណ៍ប៉ូលីសក្នុងពេលកន្លងមកបង្ហាញថា គ្រោះថ្នាក់ចរាចរណ៍បានសម្លាប់ពលរដ្ឋខ្មែរ៥នាក់ជាមធ្យម ក្នុងមួយថ្ងៃ ហើយថវិកាដែលបាត់បង់ទៅលើគ្រោះថ្នាក់ចរាចរណ៍ មានជាង ៣០០លានដុល្លារ ក្នុងមួយឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ