អតីតនាយករដ្ឋមន្ត្រី អាប់ភិស៊ីត ជាប់ចោទឃាតកម្មជាផ្លូវការ
លោកអាភិស៊ីត វេចាជីវ៉ា អតីតនាយករដ្ឋមន្ត្រី ត្រូវជាប់ចោទជាផ្លូវការពីបទឃាតកម្ម ព្រោះក្នុងនាមជាប្រមុខរដ្ឋាភិបាលបណ្តោយឱ្យទាហានបាញ់ប្រហារជីវិតជនស៊ីវិលម្នាក់ស្លាប់ ក្នុងព្រឹត្តិការណ៍បាតុកម្ម នៅកណ្តាលទីក្រុងបាងកកកាលពីឆ្នាំ២០១០។ សំណុំរឿងចោទប្រកាន់ដែលបញ្ជាក់យ៉ាងច្បាស់អំពីភាពប្រេះឆានយោបាយផ្ទៃក្នុងថៃ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
នៅថ្ងៃព្រហស្បតិ៍នេះ លោកអតីតនាយករដ្ឋមន្ត្រី អាប់ភិស៊ីតវេចាជីវ៉ា និង អតីតឧបនាយករដ្ឋមន្ត្រីថៃ ទទួលបន្ទុកផ្នែកសន្តិសុខ លោក ស៊ូថេប ថងស៊ូបាន ត្រូវបានតុលាការថៃចោទប្រកាន់ជាផ្លូវការ ពីបទឃាតកម្ម។ ទាំងពីរនាក់បានបង្ហាញខ្លួននៅនាយកដ្ឋានស៊ើបអង្កេតពិសេសរបស់ក្រសួងយុត្តិធម៌ វេលាម៉ោង១៣និង៣០នាទី ម៉ោងនៅប្រទេសថៃ។ នេះបើតាមការកត់សម្គាល់របស់ភ្នាក់ងារសារព័ត៌មានបារាំង AFP។
ជាប់ចោទ ឃាតកម្ម ក្នុងនាមជាអ្នកដឹកនាំប្រទេស បណ្តោយឱ្យទាហានបាញ់សម្លាប់ជនស៊ីវិលម្នាក់ នាឱកាសព្រឹត្តិការណ៍បាតុកម្មខែមេសាឆ្នាំ២០១០។ ប៉ុន្តែទាំងលោក អាប់ភិស៊ីត ទាំងលោក ស៊ូថេប សុទ្ធតែបានច្រានចោលការចោទប្រកាន់នេះ។
បាតុកម្មខែមេសាឆ្នាំ២០១០ ដែលបានរុញច្រានប្រទេសថៃឱ្យធ្លាក់ក្នុងវិបត្តិនយោបាយយ៉ាងជ្រៅ និងការបែកចែកជាងពេលណាៗទាំងអស់រវាងអ្នកគាំទ្រលោកថាក់ស៊ីន និងអ្នកគាំទ្ររាជវង្ស បានផ្តាច់ជីវិតមនុស្សអស់ ៩០នាក់និងរបួសជាង១៩០០នាក់។
សម្រាប់លោក អាប់ភិស៊ីត លោកបានអះអាងម្តងជាពីរដង ថាបានខិតខំធ្វើគ្រប់យ៉ាងនាពេលនោះ ដើម្បីបញ្ចៀសការបាត់បង់ជីវិតមនុស្ស និងរៀបចំសង្គមឱ្យមានសណ្តាប់ធ្នាប់វិញ។ ប៉ុន្តែលោកសុខចិត្តទទួលការកាត់ទោសប្រសើរជាងការចរចាជាមួយនឹងរដ្ឋាភិបាលបច្ចុប្បន្ន ដែលមានគម្រោងអនុម័តច្បាប់លើកលែងទោសដល់ភាគីពាក់ព័ន្ធក្នុងអំពើហិង្សានយោបាយតាំងពីឆ្នាំ២០០៥មក។ គម្រោងដែលបើតាមលោកអាប់ភិស៊ីតអនុគ្រោះខ្លាំងដល់ការវិលត្រឡប់ របស់លោកថាក់ស៊ីន ចូលមាតុប្រទេសវិញ។
នៅពេលនេះ គេអាចចាត់ទុកថាលោកអាប់ភីស៊ីត និងលោកស៊ូថេប ជាអ្នកទទួលខុសត្រូវរដ្ឋាភិបាលដំបូងគេដែលមានជាប់ពាក់ព័ន្ធនឹងសំណុំរឿងក្តីបាតុកម្ម ក្នុងខណៈដែលមេខ្លោងដឹកនាំចលនាអាវក្រហមដល់ទៅ២៤នាក់ត្រូវជាប់ចោទពីបទប្រព្រឹត្តភេរវកម្ម។ ប៉ុន្តែដោយហេតុតែបញ្ហាកាលវិភាគ សវនាការដែលគ្រោងធ្វើនៅថ្ងៃព្រហស្បតិ៍នេះ ត្រូវលើកពេលទៅធ្វើនៅសុក្រទី១៤ធ្នូស្អែកវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ