ព្រះមហាក្សត្រថៃអំពាវនាវឲ្យប្រជាជនថៃរួបរួមគ្នា
ព្រះមហាក្សត្រថៃ ភូមិបុល អាប់ឌុលយ៉ាឌេតបានបង្ហាញព្រះភ័ក្ត្រ ជាសាធារណៈ នៅថ្ងៃពុធនេះ នៅក្នុងឱកាសបុណ្យចម្រើនព្រះជន្មរបស់ព្រះអង្គក្នុងទីក្រុងបាងកក។ មានព្រះឱង្ការទៅកាន់ប្រជានុរាស្រ្តថៃ ព្រះអង្គភូមិបុល ក្នុងព្រះជន្ម៨៥ព្រះវស្សាបានអំពាវនាវឲ្យមានការរួបរួម និងស្ថិរភាពនៅក្នុងប្រទេសថៃ។
ចុះផ្សាយនៅថ្ងៃ៖
ស្តាប់ - ០២:២០
បើតាមប៉ូលិស មនុស្សប្រមាណ២សែននាក់ ក្នុងសម្លៀកបំពាក់ពណ៌លឿង បានទៅឈររង់ចាំមើលព្រះភ័ក្រ្ត និងស្តាប់ព្រះរាជឱង្ការរបស់ព្រះអង្គភូមិបុល ដែលពួកគេបានចាត់ទុកជាព្រះមហាក្សត្រពាក់កណ្តាលអាទិទេព នៅក្នុងប្រទេសថៃ។ ចាប់តាំងពីចូលសម្រាកព្យាបាលព្រះរោគ ក្នុងមន្ទីរពេទ្យ កាលពីឆ្នាំ ២០០៩ ព្រះអង្គភូមិបុលបង្ហាញព្រះភ័ក្រ្តជាសាធារណៈ ដោយកម្របំផុត។ ប៉ុន្តែ យ៉ាងណាក៏ដោយ ព្រះមហាក្សត្រថៃរូបនេះដែលបានសោយរាជ្យយូរជាងគេបំផុតក្នុងពិភពលោក គឺ៦៦ឆ្នាំ នៅតែបន្តព្រះរាជកិច្ចផ្លូវការ ដោយបានជួបជាមួយប្រធានាធិបតីអាមេរិក កាលពីខែវិច្ឆិកាកន្លងទៅនេះ។
នៅថ្ងៃពុធនេះ នៅក្នុងឱកាសប្រទេសប្រារព្ធបុណ្យចម្រើនព្រះជន្មរបស់ព្រះអង្គ ព្រះបាទភូមិបុលបានមានព្រះឱង្ការខ្លីប៉ុណ្ណោះ ទៅកាន់ប្រជាជនថៃ។ នៅក្នុងស្ថានភាពដែលប្រទេសថៃកំពុងជួបវិបត្តិនយោបាយ និងប្រជាជនថៃបានបែកប្រេះឆាគ្នា ចាប់តាំងពីរដ្ឋប្រហារយោធាទម្លាក់លោកថាក់ស៊ីន ឆ្នាំ ២០០៦ ព្រះមហាក្សត្រថៃបានអំពាវនាវឲ្យប្រជាជនថៃរួបរួមគ្នា។ ព្រះមហាក្សត្រមានព្រះរាជតម្រាស់ថា ប្រសិនបើប្រជាជនថៃមានគុណធម៌ នោះគេនៅតែមានក្តីសង្ឃឹមថា ប្រជាជន និងប្រទេសថៃ នឹងទទួលបានសុខ និងស្ថិរភាព បើទោះជាប្រទេសស្ថិតនៅក្នុងស្ថានភាពណាក៏ដោយ។ សម្រាប់ព្រះមហាក្សត្រថៃ វត្តមានចូលរួមយ៉ាងកុះកររបស់ប្រជាជនថៃ នៅថ្ងៃនេះ ធ្វើឲ្យព្រះអង្គមានជំនឿថា ការយល់សណ្តោសគ្នារវាងប្រជាជនថៃ គឺជាសោគន្លឹះ នាំឲ្យមានការរួបរួមក្នុងចំណោមប្រជាជន នៅក្នុងប្រទេស។
គួររំលឹកថា កាលពីចុងសប្តាហ៍មុននេះ គឺនៅលើទីលានមុខព្រះរាជវាំងនេះ ក្រុមអាវលឿង ដែលជាក្រុមព្រះរាជវង្ស បានជួបប្រជុំតវ៉ាប្រឆាំងរដ្ឋាភិបាលថៃ ដែលដឹកនាំដោយលោកស្រីយីងឡាក់ ប្អូនស្រីរបស់លោកថាក់ស៊ីន ដែលក្រុមអាវលឿងចាត់ទុកថា ជាការគំរាមកំហែងដល់អនាគតព្រះរាជបល្ល័ង្ក។ ការតវ៉ាដែលបានឈានទៅដល់ការប្រឈមមុខដាក់គ្នា ដ៏ហិង្សា រវាងបាតុករ និងអាជ្ញាធរ។ នៅក្នុងរដ្ឋធម្មនុញ្ញថៃ ព្រះមហាក្សត្រមិនមានអំណាចជាផ្លូវការទេ ប៉ុន្តែ ការពិតជាក់ស្តែង នៅពេលប្រទេសជួបវិបត្តិនយោបាយម្តងៗ ព្រះមហាក្សត្រថៃ ជាពិសេស ព្រះអង្គភូមិបុលតែម្តង ត្រូវគេមើលឃើញថា មានឥទ្ធិពលខ្លាំង ទៅលើអ្នកនយោបាយថៃ។
នៅថ្ងៃបុណ្យចម្រើនព្រះជន្មរបស់ព្រះមហាក្សត្រថៃ នៅថ្ងៃនេះ គេឃើញមានលោកស្រីយីងឡាក់ មន្រ្តីរដ្ឋាភិបាល និងសមាជិកសំខាន់ៗរបស់ព្រះរាជវង្សចូលរួម លើកលែងតែព្រះមហាក្សត្រី ស៊ីរីគីត ដែលកំពុងសម្រាកក្នុងមន្ទីរពេទ្យ ដោយសាររោគគាបសរសៃខួក្បាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ