ចលនាប្រឆាំងថ្ងៃ៧មករាផ្លាស់ប្តូររូបភាព និងចុះខ្សោយឥទ្ធិពល
ចុះផ្សាយនៅថ្ងៃ៖
ស្តាប់ - ០៤:០៤
រយៈកាល៣២ឆ្នាំបានកន្លងផុតទៅ អត្ថន័យថ្ងៃ៧មករានៅតែជាអធិករណ៍មួយក្នុងឆាកនយោបាយខ្មែរពីមួយ ឆ្នាំទៅមួយឆ្នាំ។ ខណៈពេលដែលគណបក្សប្រជាជនកម្ពុជាប្រារព្ធទិវារំលឹកខួបនៃការ រស់រានមានជីវិតឡើងវិញរបស់ប្រទេសជាតិ និងប្រជាពលរដ្ឋខ្មែរដែលរួចផុតពីរបបខ្មែរក្រហម មានខ្មែរមួយក្រុមទៀតចាត់ទុកថ្ងៃ៧មករាថាជាថ្ងៃនៃការឈ្លានពាន របស់កងទ័ពវៀតណាមទៅវិញ។ ប៉ុន្តែ ចលនាប្រឆាំងថ្ងៃ៧មករាដែលកើតមានតាំងពី៣២ឆ្នាំមុនមកនោះ បានផ្លាស់ប្តូររូបភាពជាបន្តបន្ទាប់ពីដំណាក់កាលមួយទៅមួយ។ យ៉ាងណាក៏ដោយ ចលនាប្រឆាំងថ្ងៃ៧មករាដូចជាគ្មានឥទ្ធិពលអ្វីធំដុំទៅលើ រដ្ឋាភិបាលឡើយ។
នៅថ្ងៃសុក្រម្សិលមិញនេះ គណបក្សប្រជាជនកម្ពុជាបានប្រារព្ធទិវាដ៏មហោឡារិក ដើម្បីរំលឹកដល់ថ្ងៃខួបទី៣២ឆ្នាំនៃការដួលរលំរបបខ្មែរក្រហម។ សម្រាប់គណបក្សប្រជាជន និងអ្នកគាំទ្ររបស់ខ្លួន គ្មានអ្វីគួរឲ្យសង្ស័យឡើយ ៧មករាជាកំណើតទី២របស់ខ្មែរ ដែលហៀបនឹងស្លាប់ដាច់ពូជទៅហើយក្នុងសម័យប៉ុល ពត។
ប៉ុន្តែ ៧មករាមានអត្ថន័យផ្សេងពីនេះស្រឡះសម្រាប់ក្រុមប្រឆាំងរដ្ឋាភិបាល។ នោះគឺ វាជាថ្ងៃដ៏សោកសៅនៃការឈ្លានពានរបស់កងទ័ពវៀតណាមដែលបានបន្តវត្តមាននៅក្នុងប្រទេសកម្ពុជាអស់រយៈពេល១០ឆ្នាំក្រោយថ្ងៃ៧មករា១៩៧៩។ ការផ្តល់អត្ថន័យផ្ទុយគ្នាដល់ថ្ងៃប្រវត្តិសាស្ត្រមួយនេះមិនមែនមានតែក្នុងទស្សនៈយល់ឃើញប៉ុណ្ណោះទេ ប៉ុន្តែ វាក៏បង្កើតឲ្យមានភាពប្រទូសរ៉ាយគ្នាយ៉ាងតានតឹងក្នុងសកម្មភាពជាក់ស្តែងទៀតផង។
បើគេក្រឡេកថយក្រោយបន្តិចទៅមើលកាលពី៣២ឆ្នាំមុន ចលនាប្រឆាំង៧មករា ឬប្រឆាំងវត្តមានកងទ័ពវៀតណាមលើទឹកដីកម្ពុជា បានកើតឡើងតាំងពីឆ្នាំ១៩៧៩ភ្លាមៗមកម៉្លេះ។ កាលណោះ ក្រៅពីខ្មែរក្រហម នៅមានចលនាធំៗពីរផ្សេងទៀត គឺចលនាហ៊្វុនស៊ិនប៉ិច និងចលនានយោបាយរបស់លោកតា សឺន សាន ដែលធ្វើសកម្មភាពប្រឆាំងពីក្រៅប្រទេស។
ប៉ុន្តែ ក្រោយកិច្ចព្រមព្រៀងសន្តិភាពក្រុងប៉ារីស ២៣តុលា១៩៩១ និងជាពិសេសក្រោយការបោះឆ្នោតឆ្នាំ១៩៩៣ ពេលដែលប្រទេសជាតិប្រកាន់យកលទ្ធិប្រជាធិបតេយ្យ ចលនាប្រឆាំង៧មករា ក៏លេចចេញរូបភាពថ្មីមួយទៀត នោះគឺការប្រឆាំងជាចំហតាមរយៈបាតុកម្ម។ ប៉ុន្តែ រយៈពេលជាច្រើនឆ្នាំចុងក្រោយនេះ ចលនាបាតុកម្មប្រឆាំងថ្ងៃ៧មករាលែងមានទៀតហើយក្រោមហេតុផលច្រើនយ៉ាង។ អ្នកខ្លះបានប្រែធាតុពីការប្រឆាំងទៅជាការគាំទ្រថ្ងៃ៧មករាវិញ អ្នកខ្លះហាក់ដូចជានឿយណាយ រីឯអ្នកខ្លះទៀតរិះរកវិធីថ្មីក្នុងការប្រឆាំង។ រូបភាពថ្មីនៃការប្រឆាំងថ្ងៃ៧មករាដែលគេឃើញនាពេលបច្ចុប្បន្ននេះមានពីរយ៉ាង ៖
ទី១ ការប្រឆាំងតាមប្រព័ន្ធព័ត៌មានវិជ្ជា ឬដែលគេហៅថាសារព័ត៌មានបែបថ្មី ពោលគឺតាម គេហទំព័រនេះឯង។ តាំងពីប៉ុន្មានថ្ងៃមុនការប្រារព្ធទិវា៧មករាមកម៉្លេះ គេហទំព័រប្រឆាំងរដ្ឋាភិបាលយ៉ាងហោចណាស់ក៏មួយដែរ បានផ្តើមវាយប្រហារទៅលើថ្ងៃ៧មករា ក៏ដូចជាទៅលើគណបក្សប្រជាជនកម្ពុជា។ មធ្យោបាយនេះអាចអនុញ្ញាតឲ្យពួកគេបញ្ចេញសេរីភាពពីចម្ងាយដោយគ្មានដែនកំណត់ ហើយក៏មិនចាំបាច់ប្រឈមមុខតទល់ដោយផ្ទាល់ជាមួយប៉ូលិសទៀតឡើយ។ ក៏ប៉ុន្តែ វាគឺជាមធ្យោបាយដែលមានឥទ្ធិពលតិចតួចប៉ុណ្ណោះទៅលើ សង្គមខ្មែរ។
ទី២ គឺការបាចខិត្តប័ណ្ណ ដែលជាមធ្យោបាយបែបបុរាណ។ ជាក់ស្តែង មួយថ្ងៃមុនថ្ងៃ៧មករា ខិត្តប័ណ្ណជាច្រើនត្រូវបានគេបាចនៅឯខេត្តសៀមរាប ដើម្បីប្រឆាំងនឹងមេដឹកនាំគណបក្សប្រជាជន និងថ្ងៃ៧មករា។ ក៏ដូចជានៅលើគេហទំព័រដែរ ខិត្តប័ណ្ណទាំងនោះមានអត្ថន័យជាសារនយោបាយដ៏មុតស្រួចដែលវាយប្រហារទៅលើគណបក្សប្រជាជនកម្ពុជាដែលជាអ្នកបង្កើតឡើងថ្ងៃ៧មករា១៩៧៩។ ប៉ុន្តែ អ្នកបាចខិត្តប័ណ្ណអាចប្រឈមមុខនឹងគ្រោះថ្នាក់ដោយសារតែការតាមប្រមាញ់របស់អាជ្ញាធរ។
សរុបមកវិញ ទោះបីជា៣២ឆ្នាំបានកន្លងផុតទៅហើយក្តី តែអត្ថន័យថ្ងៃ៧មករានៅតែត្រូវបានក្រុមប្រឆាំងរដ្ឋាភិបាលយកមកបកស្រាយដើម្បីវាយប្រហារលើបក្សកាន់អំណាចដដែល។ ក៏ប៉ុន្តែ ទោះបីជាចលនាប្រឆាំង៧មករាបានផ្លាស់ប្តូររូបភាពជាបន្តបន្ទាប់ពីដំណាក់កាលមួយទៅមួយ និងនៅតែបន្តអត្ថិភាពរបស់ខ្លួនរហូតបច្ចុប្បន្នក៏ដោយ ក៏ចលនានេះហាក់គ្មានឥទ្ធិពលធំដុំទៅលើគណបក្សប្រជាជនឡើយ។
យ៉ាងណាក៏ដោយ គណបក្សកាន់អំណាចមិនបានមើលស្រាលចំពោះចលនានេះឡើយ។ ការបង្ក្រាបទៅលើហ្វូងបាតុករ និងការដាក់ទោសអ្នកបាចខិត្តបណ្ណ័ប្រឆាំង៧មករា គឺជាឧទាហរណ៍នៃភាពប្រយ័ត្នប្រយែងរបស់រដ្ឋាភិបាលចំពោះចលនាប្រឆាំងនឹងថ្ងៃ៧មករា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ