មេដឹកនាំមកពី១៣ប្រទេសនឹងមកចូលរួមពិធីថ្វាយព្រះភ្លើងព្រះបរមសព
យ៉ាងហោចណាស់ មានថ្នាក់ដឹកនាំបរទេសចំនួន១៣រូប ដែលនឹងអញ្ជើញមកចូលរួមព្រះរាជពិធីថ្វាយព្រះភ្លើង ព្រះបរមសពសម្តេចឪ (ព្រះបរមរតនៈកោដ្ឋ) នៅថ្ងៃទី៤ កុម្ភៈខាងមុខនេះ។ មេដឹកនាំបរទេសទាំងនោះ មានចាប់ពីថ្នាក់ប្រធានសភា នាយករដ្ឋមន្ត្រី អនុប្រធានាធិបតី ឧបនាយករដ្ឋមន្ត្រី និងព្រះរាជវង្សានុវង្ស។ នាយករដ្ឋមន្ត្រីបារាំង លោក Jean-Marc Ayrault ក៏ស្ថិតក្នុងចំណោមគណៈប្រតិភូបរទេស ដែលត្រូវអញ្ជើញមកគោរពព្រះវិញ្ញាណក្ខន្ធ ព្រះបរមសពសម្តេចឪ ជាលើកចុងក្រោយនោះដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
បញ្ជីឈ្មោះមេដឹកនាំទាំង១៣ ប្រទេសដែលនឹងអញ្ជើញមកចូលរួមពិធីថ្វាយព្រះភ្លើងព្រះបរមសពនៅថ្ងៃទី៤កុម្ភៈខាងមុខត្រូវបានក្រសួងការបរទេសកម្ពុជាបានប្រកាសប្រាប់ឲ្យដឹងជាសាធារណៈ នៅចុងសប្តាហ៍នេះ។
ក្នុងចំណោមនោះ មានប្រធានសភាប្រឹក្សានយោបាយប្រជាជនចិន លោក ជា ឈីងលីន (Jia Qinglin),នាយករដ្ឋមន្ត្រីបារាំង លោក ហ្សង់ម៉ាក អៃរ៉ូល (Jean-Marc Ayrault), នាយករដ្ឋមន្ត្រីវៀតណាម ឡាវ ថៃ, អនុប្រធានាធិបតីហ្វីលីពីន, ព្រះអង្គម្ចាស់ អាគីស៊ីណូ (Prince Akishino ) ជប៉ុន រួមទាំងមន្ត្រីជាន់ខ្ពស់មកពីភូមា ឥណ្ឌូនេស៊ី សិង្ហបូរី ប្រ៊ុយណេដារុយសាឡឹម កូរ៉េ និងអូស្ត្រាលី។
ក្រៅពីចូលរួមពិធីថ្វាយព្រះភ្លើង មេដឹកនាំបរទេសទាំងនោះក៏មានគម្រោងចូលបង្គំគាល់ព្រះមហាក្សត្រសម្តេចព្រះបរមនាថ នរោត្តម សីហមុនី ឬជួបពិភាក្សាការងារដាច់ដោយឡែកពីគ្នាជាមួយលោកនាយករដ្ឋមន្ត្រី ហ៊ុន សែន និងរដ្ឋមន្ត្រីការបរទេសលោក ហោ ណាំហុង ផងដែរ។ នេះបើយោងតាមសេចក្តីប្រកាសជូនដំណឹងរបស់ក្រសួងការបរទេស នៅរសៀលថ្ងៃសុក្រ ម្សិលមិញ។
សូមបញ្ជាក់ថា ព្រះបរមសពសម្តេចឪនឹងត្រូវគេគ្រោងដង្ហែរចេញពីព្រះបរមរាជវាំង នៅថ្ងៃទី១កុម្ភៈ ដើម្បីយកទៅតម្កល់នៅឯទីលានព្រះមេរុ រយៈពេល៣ថ្ងៃ មុននឹងប្រារព្ធពិធីថ្វាយព្រះភ្លើង។ សំណង់ព្រះមេរុដែលត្រូវតម្កល់ព្រះបរមសព និងវេទិកាសម្រាប់ទទួលភ្ញៀវកិត្តិយសជាតិ និងអន្តរជាតិ ត្រូវបានសាងសង់ឡើងយ៉ាងប្រណិត ដោយចំណាយថវិកាជាង ១,២លានដុល្លារ។
សម្តេចឪ អតីតព្រះមហាក្សត្រខ្មែរដែលមានឈ្មោះបោះសំឡេងនៅលើឆាកនយោបាយជាតិនិងអន្តរជាតិ បានយាងចូលទីវង្គតកាលពីថ្ងៃទី១៥ តុលាឆ្នាំ២០១២ នៅទីក្រុងប៉េកាំង ប្រទេសចិន។ ព្រះរាជពិធីដង្ហែរនិងថ្វាយព្រះភ្លើងព្រះបរមសព នឹងត្រូវប្រព្រឹត្តទៅយ៉ាងអធិកអធម ដោយមានការចូលរួមពីពលរដ្ឋខ្មែររាប់លាននាក់។ ពិធីដង្ហែរសាកល្បងលើកទី២ ត្រូវបានធ្វើឡើងម្តងទៀត នៅថ្ងៃសៅរ៍នេះបន្ទាប់ពីបានធ្វើម្តងរួចហើយ កាលពីថ្ងៃសៅរ៍សប្តាហ៍មុន។
វត្តមានមេដឹកនាំបរទេសក្នុងពិធីថ្វាយព្រះភ្លើងព្រះបរមសព បានបង្ហាញពីប្រជាប្រិយភាពរបស់ព្រះអង្គ នៅលើឆាកអន្តរជាតិ។ មានមេដឹកនាំបរទេសជាច្រើន បានចូលទៅគោរពវិញ្ញាណក្ខន្ធព្រះបរមសព ក្នុងអំឡុងពេល៣ខែកន្លងទៅនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ