នីតិវិធីចូលគោរពព្រះបរមសពសម្តេចឪធ្វើឲ្យមហាជនខកចិត្ត
ព្រះរាជវាំងបានបើកទ្វារទទួលមហាជនទូទៅឲ្យចូលគោរពព្រះវិញ្ញាណក្ខន្ធសម្តេចឳហើយបន្ទាប់ពីព្រះរាជពិធីកាន់ទុក្ខរយៈពេល៧ថ្ងៃបានបញ្ចប់ទៅ។ ប៉ុន្តែ ដើម្បីអាចចូលគោរពព្រះបរមសពរបស់ព្រះបាទនរោត្តម សីហនុដោយផ្ទាល់នៅក្នុងព្រះបរមរាជវាំងបាន គេត្រូវដាក់ពាក្យសុំជាមុន ពោលគឺមិនមហាជនអាចចូលបានដោយសេរីនោះទេ។ និតីវិធីនេះធ្វើឲ្យប្រជាពលរដ្ឋមួយចំនួនខកចិត្តពីព្រោះតែពួកគេយល់ថា មានលក្ខណៈស្មុគស្មាញពេក។ យ៉ាងណាក៏ដោយ បញ្ហាសណ្តាប់ធ្នាប់និងសន្តិសុខត្រូវបានគេលើកយកសំអាងដើម្បីពន្យល់តបនឹងកង្វល់នេះ។
ចុះផ្សាយនៅថ្ងៃ៖
ស្តាប់ - ០២:៣០
ក្រោយពីការគោរពព្រះវិញ្ញាណក្ខន្ធរបស់ព្រះបាទនរោត្តម សីហនុ នៅក្រៅព្រះបរមរាជវាំងអស់មួយសប្តាហ៍កន្លងមក ប្រជាពលរដ្ឋទូទៅអាចត្រូវបានអនុញ្ញាតឲ្យចូលគោរពព្រះវិញ្ញាក្ខន្ធរបស់អង្គសម្តេចឪដោយផ្ទាល់នៅក្នុងព្រះបរមរាជវាំង។ ក៏ប៉ុន្តែពួកគេមិនអាចចូលដោយសេរីទេ គឺត្រូវដាក់ពាក្យសុំជាមុនសិន។ បើតាមព្រះអង្គម្ចាស់មួយអង្គដែលសុំមិនបញ្ចេញព្រះនាម ការដែលមិនបើកចំហសំរាប់មនុស្សទូទៅបែបនេះ គឺដោយសារ តែមានអ្នកសុំចូលគោរពព្រះបរមសពរបស់អង្គសម្តេចឪច្រើនពេក មានទាំងមន្ត្រីក្នុងស្រុក ក្រៅស្រុក និង មិត្តបរទេសផង។
នៅថ្ងៃនេះ វិទ្យុបារាំងអន្តរជាតិមិនអាចសុំការអត្ថាធិប្បាយពីលោក ញឹកប៊ុន ឆៃ ដែលជាអនុប្រធានគណៈកម្មាធិការជាតិរៀបចំព្រះរាជពិធីបុណ្យព្រះបរមសពរបស់ព្រះមហាវីរក្សត្រ ស្តីពីការចូលគោរពព្រះវិញ្ញាណក្ខន្ធនោះបានទេ។ ក៏ប៉ុន្តែ លោកបានមានប្រសាសន៍ប្រាប់កាសែតក្នុងស្រុកមួយថា អ្នកដែលចង់ចូលគោរពព្រះវិញ្ញាណក្ខន្ធរបស់ព្រះមហាវីរក្សត្រ ត្រូវដាក់ពាក្យ និងត្រូវប្រាប់ពីចំនួនមនុស្ស និងអាសយដ្ឋាន ដើម្បីគណៈកម្មាធិការអាចកំនត់ថ្ងៃជូនពួកគាត់បាន។
នីតិវិធីនេះបានធ្វើឲ្យប្រជាពលរដ្ឋមួយចំនួនដែលគោរពស្រលាញ់ព្រះបិតាឯករាជ្យជាតិមានការខកចិត្ត ដោយពួកគាត់យល់ឃើញថា គ្រាន់តែទៅគោរពព្រះបរមសពសម្តេចឪសោះ ហេតុអ្វីក៏មាននីតិវិធីស្មុគស្មាញម្ល៉េះ។ ជាងនេះអ្នកខ្លះក៏បានលើកឡើងថា ពួកគាត់មិនដឹងដាក់ពាក្យស្នើសុំយ៉ាងម៉េច ហើយបើបានដាក់ពាក្យហើយ តើពួកគាត់ទទួលចម្លើយតាមរបៀបណា និងនៅពេលណានោះទេ។
លោកអាំង គឹមហ៊ាង ប្រធានសមាគមទីភ្នាក់ងារទេសចរណ៍ដែលបានធ្វើពាក្យសុំ និងបាននាំក្រុមការងាររបស់លោកចូលគោរពព្រះបរមសពសម្តេចឪនៅរសៀលថ្ងៃនេះ បានពន្យល់ថា លោកបានដាក់ពាក្យសុំតាំងពីថ្ងៃទី ២២ តុលា ហើយលោកបានទទួលចម្លើយនៅថ្ងៃនេះ មានន័យថា លោកត្រូវរង់ចាំ៥ថ្ងៃដើម្បីទទួលបានដំណឹងពីព្រះបរមរាជវាំង។ ប៉ុន្តែលោកបានបញ្ជាក់ថា ដោយក្រុមរបស់លោកមានគ្នាច្រើន គឺរហូតដល់ទៅ៩០នាក់ ដូច្នេះគេអនុញ្ញាតតែ២០នាក់ប៉ុណ្ណោះ។
ព្រះបាទសម្តេចព្រះនរោត្តម សីហនុ បានយាងសោយទិវង្គតកាលពីថ្ងៃទី ១៥ តុលា នៅមន្ទីរពេទ្យក្រុងប៉េកាំងប្រទេសចិន។ ព្រះបរមសពរបស់ព្រះអង្គត្រូវបានដង្ហែមកដល់ កម្ពុជា កាលពីថ្ងៃ១៧តុលា។ រដ្ឋាភិបាលបានចេញសារាចរណ៍ឲ្យកាន់ទុក្ខព្រះបរមសពរបស់ព្រះអង្គរយៈពេល៧ថ្ងៃ។ ទើបតែថ្ងៃម្សិលមិញនេះទេ ដែលគណៈកម្មាធិការជាតិរៀបចំព្រះរាជពិធីបុណ្យព្រះបរមសពសម្តេចឪទទួល ពាក្យចូលគោរពព្រះបរមសពដោយផ្ទាល់ពីសំណាក់មហាជនទូទៅ។
គួររម្លឹកថា នៅអំឡុងនៃការគោរពព្រះវិញ្ញាណក្ខន្ធព្រះបិតាឯករាជ្យជាតិមួយសប្តាហ៍កន្លងទៅ បើតាមមន្ទីរសុខាភិបាលរាជធានីភ្នំពេញ មានប្រជាពលរដ្ឋប្រមាណ២៣៣នាក់បានដួលសន្លប់ និងត្រូវបានបញ្ចូនទៅមន្ទីរពេទ្យដោយសារតែមានមនុស្សច្រើនពេក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ