បារាំង៖ ចិនធ្វើចារកម្មលួចយកការណ៍តាមប្រព័ន្ធបច្ចេកវិទ្យាអ៊ីនធ័រនែត ទូទាំងពិភពលោក
រដ្ឋអំណាចចិន ធ្វើចារកម្មលួចយកការណ៍តាមប្រព័ន្ធបច្ចេកវិទ្យាអ៊ីនធ័រនែត ទ្រង់ទ្រាយធំ ទូទាំងពិភពលោក។ នេះជាការចោទប្រកាន់ជាថ្មីរបស់បណ្តាអ្នកតំណាងរាស្ត្រនិងព្រឹទ្ធសមាជិកបារាំង ក្នុងសេចក្តីដូចគ្នានឹងការចោទប្រកាន់របស់សហរដ្ឋអាមេរិកនិងប្រទេសអឺរ៉ុបផ្សេងទៀតដែរ។ ក្រៅពីបានប្រកាសអាសន្នឲ្យប្រុងប្រយ័ត្នចំពោះចោរព័ត៌មានវិទ្យាចិន, អ្នកតំណាងរាស្ត្របារាំងក៏បានស្តីបន្ទោសរដ្ឋាភិបាលបារាំងខ្លួនឯងដែលមិនព្រមចាត់វិធានការឲ្យធ្ងន់ធ្ងរចំពោះ«សកម្មភាពបង្កសង្គ្រាម»របស់ចិន។ ការព្រមានយ៉ាងដូច្នេះ ធ្វើឡើងតែ២ថ្ងៃប៉ុណ្ណោះ មុនដំណើរមកដល់របស់ប្រធានាធិបតីចិន ស៊ី ជីនពីង នៅទីក្រុងប៉ារីស។
ចុះផ្សាយនៅថ្ងៃ៖
ស្តាប់ - ០៣:០១
«យើងប្រឈមការវាយប្រហារជ្រៀតជ្រែកឈ្លបចូលលួចស៊ើបការណ៍ ពីសំណាក់ក្រុមចោរព័ត៌មានវិទ្យារបស់ចិន។» នេះបើតាមការប្រកាសរបស់សមាជិកព្រឹទ្ធសភាបារាំង លោក Olivier Cadic ដែលជាមនុស្សម្នាក់ ក្នុងចំណោមតំណាងរាស្ត្របារាំង ៦ នាក់ រងគ្រោះព្រោះតែសកម្មភាពលួចស៊ើបយកការណ៍តាមប្រព័ន្ធអ៊ីនធ័រនែត។ ប្រតិកម្មរបស់ក្រុមអ្នកតំណាងរាស្ត្របារាំងដូច្នេះ បានធ្វើឡើង មុនតែប៉ុន្មានថ្ងៃប៉ុណ្ណោះ ដែល ប្រមុខរដ្ឋចិនលោក ស៊ី ជីនពីង នឹងត្រូវមកទាន់ដីបារាំង ដើម្បីរឹតចំណងទាក់ទងទ្វេភាគី។
ដើមហេតុដំបូង ក្នុងឆ្នាំ២០២១ ក្រុមចោរព័ត៌មានវិទ្យាចិន ក្រោមឈ្មោះថា APT31 បានផ្ញើសារសំបុត្រអេឡិចត្រូនិចទៅអ៊ីម៉ែលផ្ទាល់ខ្លួនរបស់អ្នកតំណាងរាស្ត្រនិងព្រឹទ្ធសមាជិកបារាំង ដោយមានផ្ទុកមេរោគមួយឈ្មោះថា Cheval de Troie។ កាលណោះ ប្រព័ន្ធរក្សាសុវត្ថិភាពសន្តិសុខអ៊ីនធ័រនែត របស់រដ្ឋសភា និងព្រឹទ្ធសភាបារាំង ក៏បានប្រកាសអាសន្នឲ្យប្រុងប្រយ័ត្នដែរ។ រហូតដល់ខែមីនា ឆ្នាំ២០២៤ ទើបអ្នកតំណាងរាស្ត្រនិងសមាជិកព្រឹទ្ធសភាបារាំង ដឹងខ្លួនថាបានធ្លាក់ចូលក្នុងបញ្ជីជនគ្រោះ។ នេះក៏ព្រោះតែរបាយការណ៍ស៊ើបអង្កេតរបស់សហរដ្ឋអាមេរិក ដែលទើបតែទម្លាយចេញថ្មីៗ។
ផ្នែកតាមការស៊ើបអង្កេតរបស់សហរដ្ឋអាមេរិក, ក្រុមចោរព័ត៌មានវិទ្យាចិន APT31 បានផ្ញើសារសំបុត្រអេឡិចត្រូនិក ជាង ១០ ០០០ ដែលមានផ្ទុកកម្មវិធីមេរោគស៊ើបឆ្មកយកការណ៍ ទៅកាន់បណ្តាក្រុមហ៊ុនគោលដៅស៊ីប, ផ្ញើទៅកាន់អ្នកនយោបាយ ហើយនិង បេក្ខជនឈរឈ្មោះបោះឆ្នោត ព្រមទាំងអ្នកកាសែត ដែលនៅសហរដ្ឋអាមេរិក និងប្រទេសគោលដៅវាយប្រហារសំខាន់ៗផ្សេងទៀត។ ករណីវាយប្រហារអ៊ីនធ័រនែតចំពោះសភាបារាំង ក៏ព្រោះតែកាលពីអំលុងឆ្នាំ២០២០-២០២១ ពួកសមាជិកសភាពបារាំងកំពុងតែដុតដៃដុតជើងបើកអង្កេតសំណុំរឿងជំងឺកូវីដ១៩, ការរឹតត្បិតសិទ្ធមនុស្សលើជនជាតិភាគតិចអ៊ុយហ្គួរ និងករណីបាតុកម្មនៅហុងកុង។
ការប្រើអ៊ីម៉ែលផ្ទុកកម្មវិធីមេរោគស៊ើបឆ្មកយកការណ៍ពីចិនបែបនេះ សមាជិកសភានៃប្រទេសអឺរ៉ុបផ្សេងទៀត តួយ៉ាង អង់គ្លេស បែលហ្ស៊ិក កាណាដា អាល្លឺម៉ង់ និងដាណឺម៉ាក ក៏បានអះអាងថា មានទម្រង់សំបុត្រអេឡិចត្រូនិកបែបនោះផ្ញើមកកាន់ខ្លួនដែរ ហើយអ្នកតំណាងរាស្ត្រអឺរ៉ុបក៏បានសម្តែងក្តីបារម្ភយល់ឃើញដូចគ្នានឹងសមាជិកសភាបារាំងពេលនេះដែរ។
ក្នុងសំណុំរឿងនេះ សហរដ្ឋអាមេរិកនិងប្រទេសអឺរ៉ុបបច្ចិមលោកចោទប្រកាន់ថា ការធ្វើប្រតិបត្តិការលួចស៊ើបយកការណ៍តាមប្រព័ន្ធអ៊ីនធ័រនែត ត្រូវរដ្ឋអំណាចចិនប្រើជាមធ្យោបាយទ្រង់ទ្រាយធំ នៅទូទាំងពិភពលោក។ រដ្ឋបាលក្រុងប៉េកាំងបដិសេធច្រានចោល និងចាត់ទុកថា ការចោទប្រកាន់គ្មានមូលដ្ឋានអ្វីសោះ។ ចិនបានចោទបកថា រដ្ឋបាលក្រុងវ៉ាស៊ីនតោនទៅវិញទេ ដែលជាមេឃ្លោងធំខាងលួចស៊ើបយកការណ៍តាមប្រព័ន្ធអ៊ីនធ័រនែត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ