អូតង់ផ្តើមសមយុទ្ធទ្រង់ទ្រាយធំដែលមានកងទ័ពចូលរួមជាង៩០០០០នាក់
បក្សសម្ព័ន្ធអាត្លង់ទិកអូតង់ផ្តើមសមយុទ្ធយោធាទ្រង់ទ្រាយធំមិនធ្លាប់មាន គិតចាប់តាំងពីសម័យសង្រ្គាមត្រជាក់។ សមយុទ្ធដ៏ធំសំបើម ឈ្មោះ Steadfast ដែលចាប់ផ្តើម នៅថ្ងៃពុធទី ២៤ មករា នឹងប្រព្រឹត្តជាច្រើនខែ តាំងពីមហាសមុទ្រអាត្លង់ទិក រហូតដល់តំបន់ខាងកើតរបស់បក្សសម្ព័ន្ធអូតង់ជាប់ព្រំដែនអ៊ុយក្រែន និងរុស្ស៊ី។ យោងតាមសេចក្តីប្រកាសរបស់អូតង់ សមយុទ្ធ Steadfastមានគោលដៅធ្វើតេស្តសមត្ថភាពរបស់សមាជិកអូតង់ក្នុងការពង្រាយកម្លាំងទ័ពចូលការពារអឺរ៉ុប។ នេះបើតាមសេចក្តីប្រកាសព័ត៌មានរបស់អង្គការអូតង់ កាលពីថ្ងៃពុធទី ២៤មករា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៣
អូតង់បើកសមយុទ្ធយោធាទ្រង់ទ្រាយដ៏ធំមិនធ្លាប់មាន គិតចាប់តាំងសម័យសង្រ្គាមត្រជាក់។ ជាសមយុទ្ធដ៏ធំ ពីព្រោះថា មានកងទ័ពចូលរួមដល់ទៅជាង ៩ម៉ឺននាក់ ដែលជាចំនួនដ៏ច្រើនណាស់បើប្រៀបធៀបនឹងសមយុទ្ធធំចុងក្រោយរបស់អូតង់ នៅឆ្នាំ១៩៨៨ នៅពេលសម្ព័ន្ធអាត្លង់ទិកប្រឈមមុខដាក់គ្នាជាមួយសហភាពសូវៀតក្នុងអំឡុងសង្រ្គាមត្រជាក់។
សមយុទ្ធរបស់អូតង់ចាប់ផ្តើមជាមួយការចាកចេញដំណើររបស់នាវាចម្បាំងអាមេរិកពីមូលដ្ឋានទ័ពនៅរដ្ឋVirginia សំដៅទឹកដីអឺរ៉ុប។ តាមសេចក្តីប្រកាសរបស់អូតង់ នៅចុងខែមករា នាវាដឹកជញ្ជូនកងទ័ពមួយគ្រឿងទៀតរបស់កាណាដានឹងធ្វើដំណើរមកចូលរួមនៅក្នុងសមយុទ្ធដែរ។
នៅក្នុងសមយុទ្ធយោធារយៈពេលរាប់ខែ ដែលលាតសន្ធឹងពីមហាសមុទ្រអាត្លង់ទិក រហូតដល់ទឹកដីភាគខាងកើតរបស់ អូតង់ជាប់ព្រំដែនជាមួយអ៊ុយក្រែន និងរុស្ស៊ី សមាជិកទាំងអស់របស់អូតង់បញ្ជូន នាវាចម្បាំងប្រមាណ៥០គ្រឿង យន្តហោះចម្បាំង៨០គ្រឿង និងរថក្រោះ យានយន្តសម្រាប់ប្រយុទ្ធជាង១១០០គ្រឿង។ ជារួម សមាជិកទាំង៣១របស់អូតង់ចូលរួមចំណែកទាំងសព្វាវុធ និងកងទ័ពសម្រាប់សមយុទ្ធលើកនេះ។ ក្នុងចំណោមនោះ អង់គ្លេសបញ្ជូនទ័ពច្រើនជាងគេ ទាំងទ័ពអាកាស ទ័ពជើងទឹកប្រមាណ ២ម៉ឺននាក់ទៅក្នុងទឹកដីអឺរ៉ុបទាំងមូល ដើម្បីចូលរួមក្នុងសមយុទ្ធ Steadfast Defender។
ស៊ុយអែតដែលត្រូវចូលជាសមាជិករបស់អូតង់នៅឆ្នាំនេះ ក្រោយការបើកភ្លើងខៀវរបស់តួកគី និងហុងគ្រី បានបញ្ជូនទ័ពទៅចូលរួមក្នុងសមយុទ្ធនឹងគេដែរ។
សម្រាប់រដ្ឋមន្រ្តីការពារជាតិអង់គ្លេសលោក Grant Shapps ការពង្រាយទ័ពអង់គ្លេសនៅក្នុងចំនួនដ៏ច្រើន ទៅក្នុងសមយុទ្ធរបស់អូតង់លើកនេះ មានគោលដៅឆ្លើយតបនឹងការគំរាមកំហែងរបស់លោកពូទីន ដែលបានធ្វើសង្រ្គាមឈ្លានពានអ៊ុយក្រែន ២ឆ្នាំមកហើយ។ បើតាមប្រមុខការពារជាតិអង់គ្លេស សមយុទ្ធរបស់អូតង់សំខាន់ជាងពេលណាៗអស់ ជាពិសេស ក្នុងកាលៈទេសៈដែលអូតង់កំពុងប្រឈមកាន់តែខ្លាំងនឹងការផ្ចាញ់ផ្ចាល ការគំរាមរបស់រុស្ស៊ី អ៊ីរ៉ង់ ចិន និងកូរ៉េខាងជើង។
អគ្គមេបញ្ជាការកងទ័ពអូតង់ លោកគ្រីស្តូហ្វ័រ កាវូលីមានប្រសាសន៍នៅក្នុងសន្និសីទកាសែតកាលពីសប្តាហ៍មុនថា សមយុទ្ធ Steadfast Defender ការពារគ្មានងាករេ នឹងឆ្លុះបញ្ចាំងពីឯកភាព ការរួមកម្លាំង និងការប្តេជ្ញាចិត្តរួមគ្នារបស់ប្រទេសសមាជិកអូតង់ដើម្បីការពារគ្នាទៅវិញ ទៅមក។ លំហាត់សឹករបស់អូតង់ធ្វើតាមសេណារីយ៉ូ ក្នុងករណីកើតមានជម្លោះជាមួយគូសត្រូវដែលមានសមត្ថភាព ប្រហាក់ប្រហែលនឹងអូតង់។ តាមសេចក្តីប្រកាសរបស់អូតង់ សមយុទ្ធលើកនេះជាឱកាសតេស្តសមត្ថភាពរបស់បក្សសម្ព័ន្ធអូតង់ក្នុងការដាក់ពង្រាយ ដឹកជញ្ជូនទាហានពីអាមេរិកមកជួយការពារអឺរ៉ុបក្នុងករណីមានការវាយប្រហារពីសត្រូវ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ