សភាដាណឺម៉ាកអនុម័តច្បាប់ហាមដុតបំផ្លាញគម្ពីរសាសនាអ៊ីស្លាមកូរ៉ង់
សភាដាណឺម៉ាក បានបោះឆ្នោត អនុម័តច្បាប់ហាមឃាត់ការដុតគម្ពីរសាសនាអ៊ីស្លាម កាលពីថ្ងៃព្រហស្បតិ៍ទី ៧ធ្នូ។ សម្រាប់រដ្ឋាភិបាលដាណឺម៉ាកដែលជាអ្នកស្នើសេចក្តីព្រាងច្បាប់ ការបង្កើតច្បាប់ហាមឃាត់ការដុតបំផ្លាញ គម្ពីរកូរ៉ង់ធ្វើឡើងដើម្បីផលប្រយោជន៍សន្តិសុខជាតិដាណឺម៉ាក ដែលកំពុងប្រឈមនឹងការគំរាមកំហែងភេរវកម្មក្នុងកម្រិតមួយដ៏ខ្ពស់។ ដាណឺម៉ាក និងប្រទេសស៊ុយអែត បានទាក់ទាញឲ្យមានកំហឹង និងការថ្កោលទោសពីបណ្តាប្រទេសអ៊ីស្លាម បន្ទាប់ពី ជនស្តាំនិយមជ្រុលនៅប្រទេសទាំងពីរនេះ ដុតគម្ពីរកូរ៉ង់ កាលពីដើមឆ្នាំ២០២៣នេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:០៥
សភាដាណឺម៉ាកបានបោះឆ្នោត អនុម័ត ច្បាប់ហាមឃាត់ការដុតបំផ្លាញគម្ពីសាសនាអ៊ីស្លាម កូរ៉ង់ ជាមួយសំឡេងគាំទ្រ ៩៤ ក្នុងចំណោមសំឡេងសរុបរបស់សភា ចំនួន១៧៩។
ទៅតាមច្បាប់ដែលសភាដាណឺម៉ាកអនុម័តកាលពីថ្ងៃព្រហស្បតិ៍ ទី៧ធ្នូ ការដុតគម្ពីរសាសនា នៅទីសាធារណៈ ការហែកបំផ្លាញ ចាក់ ឬការទាត់នឹងជើងទៅលើគម្ពី នៅក្នុងគោលដៅ ផ្សព្វផ្សាយរូបភាពស្អប់រើសអើង ត្រូវចាត់ទុកជាទង្វើខុសច្បាប់។ អ្នកដែលល្មើសច្បាប់ត្រូវប្រឈមនឹងការផ្តន្ទាទោសឲ្យជាប់ពន្ធនាគារ២ឆ្នាំ។
សភាដាណឺម៉ាកបោះឆ្នោត អនុម័តច្បាប់ហាមឃាត់ការដុតបំផ្លាញគម្ពីសាសនា នៅបន្ទាប់ពីការដុតគម្ពីសានាអ៊ីស្លាម កូរ៉ង់ នៅក្នុងប្រទេសដាណឺម៉ាកបានអុជអាលបណ្តាលឲ្យមានបាតុកម្មហិង្សាប្រឆាំងនឹងដាណឺម៉ាក នៅតាមបណ្តាប្រទេសកាន់សាសនាអ៊ីស្លាម នៅក្នុងពិភពលោក។ ឧទាហរណ៍ នៅអ៊ីរ៉ាក់ បាតុករជាច្រើនរយនាក់ធ្លាប់ធ្វើបាតុកម្មប្រឆាំងហិង្សា សំដៅ ស្ថានទូតដាណឺម៉ាក ក្នុងទីក្រុងបាដដាត កាលពីខែ កក្កដា បន្ទាប់ពីសកម្មជនស្តាំនិយមជ្រុលដាណឺម៉ាកម្នាក់ដុតគម្ពីកូរ៉ង់ ជាទីសក្ការៈរបស់អ្នកកាន់សាសនាអ៊ីស្លាម នៅក្នុងទីក្រុងស្តុកខូម ប្រទេសស៊ុយអែត។
គណបក្សប្រឆាំងដាណឺម៉ាក ចាត់ទុកការអនុម័តច្បាប់ហាមឃាត់ការដុតគម្ពីរសាសនាអ៊ីស្លាមថា ជាទង្វើក្បត់ជាតិ និងបំផ្លាញសិទ្ធិសេរីភាពបញ្ចេញមតិ ដែលដាណឺម៉ាកធ្លាប់តែប្រកាន់យកជាយូរណាស់មកហើយ។
ម្យ៉ាង សម្រាប់បក្សប្រឆាំង ដោយស្នើឲ្យសភាបោះឆ្នោតអនុម័តច្បាប់ហាមឃាត់ការដុតគម្ពីកូរ៉ង់ រដ្ឋាភិបាលដាណឺម៉ាកកំពុងរត់ចោលជួរ គេចចេញពីការទទួលខុសត្រូវ។ តាមបក្សប្រឆាំង រដ្ឋាភិបាលដាណឺម៉ាកមុនៗបានប្រកាន់ជំហរដាច់ខាតរបស់ខ្លួន បើទោះបីជាធ្លាប់មានរលកប្រឆាំងនឹងដាណឺម៉ាកដ៏ខ្លាំងក្លា ដោយសាររូបគំនូរត្លុកព្យាការីម៉ូហាម៉េដ កាលពីឆ្នាំ ២០០៦ ដែលបានបណ្តាលឲ្យមានកំហឹងសម្បារពីបណ្តាប្រទេសកាន់សាសនាអ៊ីស្លាមក្តី។
រដ្ឋាភិបាលដាណឺម៉ាកវិញចេញមុខធានាថា ច្បាប់ហាមឃាត់ការដុតគម្ពីសាសនាអ៊ីស្លាមនឹងទៅប៉ះពាល់ដល់សិទ្ធិសេរីភាពបញ្ចេញមតិឡើយ និងថា គេអាចមានមធ្យោបាយផ្សេងដើម្បីរិះគន់សាសនា ក្រៅពីការដុតគម្ពីរ។
នៅអឺរ៉ុប ដាណឺម៉ាកមិនមែនជាប្រទេសដំបូងគេដែលបង្កើតច្បាប់ហាមឃាត់ការដុតបំផ្លាញ គម្ពីរសាសនាអ៊ីស្លាម។ អាល្លឺម៉ង់ អូទ្រីស ហ្វាំងឡង់ អ៊ីតាលី និងប៉ូឡូញជាដើម ធា្លប់បានចេញច្បាប់ដូចគ្នានេះ ដើម្បី រំងាប់ភាពតានតឹងជាមួយបណ្តាប្រទេសកាន់សាសនាអ៊ីស្លាម។
បើតាមការអះអាងរបស់រដ្ឋាភិបាលដាណឺម៉ាក ការបង្កើតច្បាប់ហាមឃាត់ការដុតគម្ពីកូរ៉ង់ ជារឿងចាំបាច់ដើម្បីផលប្រយោជន៍សន្តិសុខជាតិរបស់ដាណឺម៉ាកផ្ទាល់ ជាពិសេសនៅក្នុងកាលៈទេសៈដែលដាណឺម៉ាកកំពុងប្រឈមខ្លាំងនឹងការគំរាមកំហែងធ្វើភេរវកម្ម។ ដោយសាររលកប្រឆាំងនឹងការដុតគម្ពីកូរ៉ង់ រួមផ្សំនឹងសង្រ្គាមហ្កាហ្សា រដ្ឋាភិបាលដាណឺម៉ាក ក៏ដូចជារដ្ឋាភិបាលប្រទេសស៊ុយអែត បានដំឡើងកម្រិតប្រកាសអាសន្នគំរាមកំហែងភេរវកម្មដល់កម្រិតខ្ពស់បំផុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ