អ៊ុយក្រែន៖ស្លាប់ជនស៊ីវិល ៥១នាក់ និងរបួស ៦នាក់នៅក្រោមគ្រាប់មីស៊ីលរុស្ស៊ី
នៅក្នុងប្រទេសអ៊ុយក្រែន រុស្ស៊ីបានវាយប្រហារដោយមីស៊ីលទៅលើស្រុក Groza ស្ថិតក្នុងតំបន់ Kharkiv ដែលបណ្តាលឲ្យមានមនុស្សស្លាប់ចំនួន ៥១នាក់ និងរបួសចំនួន ៦នាក់។ ការវាយប្រហារនេះបានកើតមានឡើងក្នុងពេលដែលមានមនុស្សកំពុងជួបជុំគ្នានៅក្នុងពិធីបុណ្យសពទាហានម្នាក់។ ប្រធានាធិបតីអ៊ុយក្រែនលោកហ្សេឡេនស្គីបានបរិហារដោយចាត់ទុកជាការវាយប្រហារភេរវកម្មអមនុស្សធម៌របស់រុស្ស៊ី។
ចុះផ្សាយនៅថ្ងៃ៖
ស្តាប់ - ០២:៥៣
Groza ដែលមានប្រជាជនរស់នៅចំនួន ៣៣០នាក់ជាស្រុកតូចមួយស្ថិតក្នុងតំបន់ Kharkiv។ រដ្ឋមន្រ្តីក្រសួងមហាផ្ទៃលោក Igor Klymenko បានប្រាប់ឲ្យដឹងថា ការវាយប្រហាររបស់រុស្ស៊ីដោយគ្រាប់មីស៊ីលលើស្រុក Groza បានកើតមានឡើងនៅវេលាម៉ោង ១ និង១៥នាទីរសៀលម៉ោងនៅអ៊ុយក្រែននាថ្ងៃព្រហស្បតិ៍ ទី៥ តុលា។ តាមលោក Igor Klymenko គ្រាប់មីស៊ីលបានកម្ទេចហាងលក់ទំនិញមួយ និងហាងលក់កាហ្វេមួយដែលស្ថិតក្នុងអាគារតែមួយ និងចំពេលដែលមានមនុស្សប្រមាណជា ៦០នាក់កំពុងជុំគ្នានៅក្នុងអាគារនោះ។ លោក Igor Klymenko បានបន្ថែមថា ក្នុងចំណោមអ្នកស្លាប់ទាំង ៥១នាក់មានកូនក្មេងម្នាក់អាយុ ៦ឆ្នាំ។
ក្រុមអ្នកជួយសង្រ្គោះបានប្រកាសបិទប្រតិបត្តិការស្វែងរកជនរងគ្រោះនៅដើមព្រលប់ថ្ងៃព្រហស្បតិ៍ ទី៥ តុលា បន្ទាប់ពីបានធ្វើការជួយសង្រ្គោះ និងស្វែងរកជនរងគ្រោះនៅក្រោមគំនរថ្មអស់ពេលជាច្រើនម៉ោង។ ក្រុមអ្នកកាសែត AFP ដែលមានវត្តមាននៅកន្លែងកើតហេតុបានរៀបរាប់ថា ពួកគេបានឃើញកម្លាំងទាហានដែលពាក់ស្រោមដៃខៀវប្រមូលលើកយកសាកសពរុំដោយថង់ ពណ៌ ស ដាក់លើឡានកាំមីញ៉ុង។ អភិបាលតំបន់ Kharkiv លោក Oleg Synegoubov បានបរិហារលើការវាយប្រហារដែលបានសម្លាប់មនុស្សច្រើនជាងគេនៅក្នុងតំបន់តាំងពីថ្ងៃរុស្ស៊ីចូលឈ្លានពានអ៊ុយក្រែន។
ចំណែកប្រធានាធិបតីលោកហ្សេឡេនស្គីដែលកំពុងចូលរួមប្រជុំជាមួយថ្នាក់ដឹកអឺរ៉ុបក្នុងប្រទេសអេស្ប៉ាញបានបរិហារលើការវាយប្រហាររបស់រុស្ស៊ីដោយចាត់ទុកជាអំពើភេរវកម្មអមនុស្សធម៌យ៉ាងឃោរឃៅព្រៃផ្សៃ។ ប្រតិកម្មរបស់អាល្លឺម៉ង់ ប្រមុខការទូតលោកស្រី Annalena Baerbock បានបញ្ជាក់ថា ក្រុងប៊ែរឡាំងនឹងធ្វើអ្វីៗគ្រប់យ៉ាងដែលអាចធ្វើទៅបានដើម្បីការពារអ៊ុយក្រែនពីគ្រាប់មីស៊ីលរបស់ពូទីន។ « យើងត្រូវតែបន្តគាំទ្រប្រជាជនអ៊ុយក្រែនព្រោះនេះជាការពិតដ៏អាក្រក់ដែលពួកគេកំពុងរស់នៅប្រចាំថ្ងៃ » នេះជាប្រតិកម្មរបស់អ្នកនាំពាក្យសេតវិមានលោកស្រី Karine Jean-Pierre។
ពីបារាំង ក្រសួងការបរទេសបានបញ្ចេញប្រតិកម្មថា ការយកជនស៊ីវិលធ្វើជាផ្ទាំងស៊ីបជាសក្ខីកម្មថ្មីនៃឧក្រិដ្ឋកម្មសង្រ្គាមរបស់រុស្ស៊ី។ ចំណែកអ្នកសម្របសម្រួលផ្នែកមនុស្សធម៌របស់អង្គការសហប្រជាជាតិសម្រាប់អ៊ុយក្រែនលោកស្រី Denise Brown បានសម្តែងការរន្ធត់ចិត្តចំពោះការវាយប្រហារលើស្រុក Groza និងសង្កត់ធ្ងន់ថា ការទម្លាក់គ្រាប់បែកលើជនស៊ីវិល ឬយកជនស៊ីវិលជាផ្ទាំងស៊ីបជាឧក្រិដ្ឋកម្មសង្គ្រាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ