គីម ជុងអ៊ុនបញ្ចប់ទស្សនកិច្ចនៅរុស្ស៊ីដោយទទួលបានកាដូជាដ្រូនបំផ្ទុះចំនួន ៥គ្រឿង
មេដឹកកូរ៉េខាងជើងលោកគីម ជុងអ៊ុនបានបញ្ចប់ទស្សនកិច្ចរយៈពេល ៦ថ្ងៃនៅក្នុងប្រទេសរុស្ស៊ីនាថ្ងៃអាទិត្យ ទី១៧ កញ្ញា។ ក្នុងអំឡុងពេលទស្សនកិច្ច លោកគីម ជុងអ៊ុនបានជួបសន្ទនាជាមួយប្រធានាធិបតីរុស្ស៊ីលោកពូទីន និងបានទៅទស្សនាកន្លែងជាច្រើន ពិសេសមជ្ឈមណ្ឌលអវកាស Vostotchny។ ទស្សនកិច្ចរបស់មេដឹកនាំកូរ៉េខាងជើងនៅរុស្ស៊ីត្រូវបានបស្ចិមលោកតាមដាន ពិសេសបារម្ភខ្លាចកូរ៉េខាងជើងបញ្ជូនអាវុធទៅឲ្យរុស្ស៊ីសម្រាប់បន្តសង្រ្គាមនៅអ៊ុយក្រែន។
ចុះផ្សាយនៅថ្ងៃ៖
ស្តាប់ - ០២:៤១
មេដឹកកូរ៉េខាងជើងលោកគីម ជុងអ៊ុនបានចាកចេញពីទឹកដីរុស្ស៊ីក្នុងថ្ងៃអាទិត្យ ទី១៧ កញ្ញាតាមរថភ្លើងដែលលោកបានមកដល់រុស្ស៊ីកាលពីថ្ងៃអង្គារ ទី១០ កញ្ញា។ ក៏ដូចជាការមកដល់ក្នុងថ្ងៃដំបូង ការត្រឡប់វិញរបស់លោកគីម ជុងអ៊ុនត្រូវបានរុស្ស៊ីរៀបចំជូនដំណើរនៅស្ថានីយរថភ្លើង Artiom -Primorsky ដែលរថភ្លើងរបស់លោកគីមកំពុងចាំនៅទីនោះស្រាប់ នេះបើតាមការបញ្ជាក់របស់ទីភ្នាក់ងាររុស្ស៊ីឈ្មោះ Ria Novosti។ ចំណែកទីភ្នាក់ងារផ្លូវការរុស្ស៊ីឈ្មោះ TASS បានផ្សព្វផ្សាយនូវវីដេអូខ្លីមួយដែលបង្ហាញលោកគីមកំពុងឡើងជណ្តើររថភ្លើង និងលើកដៃលាគណៈប្រតិភូរុស្ស៊ីដែលជូនដំណើរលោក។
តាមទីភ្នាក់ងារផ្លូវការរុស្ស៊ី TASS ដដែល លោកគីម ជុងអ៊ុនបានចាកចេញពីរុស្ស៊ីជាមួយនឹងកាដូជាដ្រូនបំផ្ទុះចំនួន ៥គ្រឿងដែលផ្តល់ឲ្យដោយលោក Oleg Kojémiako អភិបាលតំបន់ Primorye ស្ថិតចុងបូព៌ាប្រទេសរុស្ស៊ី។ ក្រៅពីដ្រូនបំផ្ទុះចំនួន ៥គ្រឿង លោកគីមក៏បានទទួលពីលោក Oleg Kojémiako នូវដ្រូនឈ្លបយកស៊ើបការណ៍ចំនួន ១គ្រឿង អាវការពារគ្រាប់មួយ និងសម្លៀកបំពាក់ពិសេសដែលកាំមេរ៉ាចាប់មិនបានចំនួនមួយកំផ្លេ។ ដោយឡែក មុននឹងចាកចេញពីទឹកដីរុស្ស៊ី លោកគីមបានជួបជាមួយសិស្ស និស្សិតកូរ៉េខាងជើងនៅក្នុងសាកលវិទ្យាល័យក្រុង Vladivostok។
គួរបញ្ជាក់ថា នៅក្នុងអំឡុងពេលទស្សនកិច្ចរយៈពេល ៦ថ្ងៃនៅរុស្ស៊ី លោកគីម ជុងអ៊ុនបានជួបសន្ទនាជាមួយប្រធានាធិបតីលោកពូទីន និងបានទៅទស្សនាកន្លែងជាច្រើន ពិសេសមជ្ឈមណ្ឌលអវកាស Vostotchny និងចូលរួមនៅក្នុងការបង្ហាញនាវាចម្បាំងរុស្ស៊ីនៅប៉ាស៊ីហ្វិក រួមទាំងការពិនិត្យមើលអាវុធទំនើបរបស់រុស្ស៊ីនៅមូលដ្ឋានទ័ពអាកាស Knievichi ទៀតផង។ លោកពូទីន និងលោកគីមបានបង្ហាញពីភាពស្និទ្ធស្នាល ហើយលោកពូទីនថែមទាំងបានលើកឡើងពីទស្សវិស័យនៃកិច្ចសហប្រតិបត្តិការយោធាទោះបីជាកូរ៉េខាងជើងកំពុងជាប់ទណ្ឌកម្មអន្តរជាតិដោយសារកម្មវិធីនុយក្លេអ៊ែរ និងមីស៊ីលរបស់ខ្លួនក្តី។
យ៉ាងណាក៏ដោយ ក្រុងមូស្គូបានធានាដោយបញ្ជាក់ច្បាស់ៗថា គ្មានកិច្ចព្រមព្រៀងយោធាណាមួយត្រូវបានចុះហត្ថលេខានាឱកាសទស្សនកិច្ចរបស់មេដឹកនាំកូរ៉េខាងជើងលោកគីម ជុងអ៊ុនទេ។ តែបស្ចិមលោកហាក់មិនជឿលើការធានារបស់រុស្ស៊ី និងនៅតែសង្ស័យថា រុស្ស៊ីចង់ទិញអាវុធពីកូរ៉េខាងជើងសម្រាប់បន្តសង្រ្គាមនៅអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ