លោកគីមជុងអ៊ុននិងលោកវ្លាឌីមៀរពូទីនជួបគ្នានៅមូលដ្ឋានអវកាសរុស្ស៊ី Vostotchny
លោកពូទីនបានទទួលជួបប្រមុខដឹកនាំកូរ៉េខាងជើងលោកគីមជុងអ៊ុន នៅថ្ងៃពុធទី ១៣កញ្ញានេះ នៅមជ្ឈមណ្ឌលអវកាសវ៉ូស្តូតស្នី ភាគខាងកើតនៃប្រទេសរុស្ស៊ី។ ជាជម្រើសទីតាំងប្រកបដោយនិម្មិតរូប។ លោកប្រធានាធិបតីរុស្ស៊ីបានប្រកាសជួយព្យុងយ៉ាងស្ថាបនាផ្កាយរណប។ ឯលោកគីមជុងអ៊ុនបានប្រកាសចាត់ទុកការរឹតចំណងមិត្តភាពកូរ៉េខាងជើង-រុស្ស៊ីជាអាទិភាពការទូតចាំបាច់បំផុត។
ចុះផ្សាយនៅថ្ងៃ៖
ស្តាប់ - ០២:៣៦
បន្ទាប់ពីបានទស្សនាមូលដ្ឋានអវកាសVostotchny ដែលជាកន្លែងដំឡើងកាំជ្រួចAngaraដ៏ទំនើបចុងក្រោយគេរបស់រុស្ស៊ីមក ប្រមុខដឹកនាំកូរ៉េខាងជើងនិងរុស្ស៊ីបានចាប់ផ្តើមជួបពិភាក្សាគ្នា។ ជំនួបដ៏ពិសេសបានបិទបញ្ចប់ បន្ទាប់ពីលោកពូទីននិងលោកគីមជួបជជែកគ្នា ក្រោមវត្តមានរបស់ប្រតិភូជាច្រើនរូបជាដំបូង អស់ប្រមាណពីរម៉ោង និងបន្តដោយជំនួបមួយទល់នឹងមួយ ព្រមទាំងមានពិធីទទួលទានអាហារថ្ងៃត្រង់ជាកិត្តិយសផង។
ក្នុងដំណាក់កាលនេះ ពុំទាន់ឃើញមានសេចក្តីថ្លែងការណ៍អ្វីទាក់ទងនឹងការចុះកិច្ចព្រមព្រៀងសព្វាវុធបញ្ចូនអាវុធនិងគ្រាប់រំសេវកូរ៉េខាងជើងទៅឱ្យរុស្ស៊ីសម្រាប់បន្តសង្គ្រាមនៅអ៊ុយក្រែន ដូចការសង្ស័យរបស់អាមេរិកពីម្សិលមិញទេ។
នៅដើមជំនួប លោកវ្លាឌីមៀរពូទីន បានប្រកាសអរគុណលោកគីមជុងអ៊ុនដែលព្រមធ្វើជាភ្ញៀវអញ្ជើញមកបំពេញទស្សនកិច្ចនៅរុស្ស៊ី និងបានព្រលយឱ្យដឹងអំពីខ្លឹមសារនៃជំនួបពិភាក្សាដែលផ្តោតលើប្រធានបទជាច្រើន មានអាទិ៍ស្ថានភាពក្នុងតំបន់និងកិច្ចសហប្រតិបត្តិការសេដ្ឋកិច្ច។ ចំណែកលោកគីមជុងអ៊ុនដែលអង្គុយក្បែរម្ចាស់ផ្ទះ ក៏បានបញ្ជាក់តបវិញថា កូរ៉េខាងជើងនៅក្បែររុស្ស៊ីជានិច្ច ហើយគាំទ្រទាំងស្រុងនិងដោយឥតលក្ខខណ្ឌនូវរាល់គ្រប់វិធានការសម្រេចដោយរដ្ឋាភិបាលរុស្ស៊ី។ នេះបើតាមសំដីរបស់លោកគីមជុងអ៊ុនដដែលដោយបន្ថែមថាជំនួបថ្ងៃនេះជាឈ្នាន់ឈានទៅរកទំនាក់ទំនងដ៏ល្អិតល្មួតជាមួយរុស្ស៊ី ព្រោះចំណងទាក់ទងរវាងប្រទេសទាំងពីរ គឺជាអាទិភាពនយោបាយការទូតដ៏ចាំបាច់បំផុតរបស់កូរ៉េខាងជើង។
ជម្រើសយកមណ្ឌលអវកាសជាកន្លែងជួបប្រជុំគ្នាក៏មិនមែនជាការចៃដន្យទេ។ គឺមកពីមេដឹកនាំកូរ៉េខាងជើងមានចំណាប់អារម្មណ៍ខ្លាំងលើបច្ចេកវិទ្យាកាំជ្រួច និងមានឆន្ទៈចង់អភិវឌ្ឍកម្មវិធីអវកាស។ នេះបើតាមប្រសាសន៍របស់លោកប្រធានាធិបតីរុស្ស៊ីពូទីន ពេលកំពុងទស្សនាមជ្ឈមណ្ឌលVostotchny ដោយសន្យាថានឹងជួយកូរ៉េខាងជើងស្ថាបនាផ្កាយរណប។ ថ្មីៗនេះព្យុងយ៉ាងបានបរាជ័យ ក្នុងការបាញ់បង្ហោះផ្កាយរណបយោធាសម្រាប់ធ្វើចារកិច្ចដល់ទៅពីរលើក។ កូរ៉េខាងជើងបានអភិវឌ្ឍបច្ចេកវិទ្យាអវកាសយ៉ាងលឿន ដោយបង្កើនការសាកល្បងមីស៊ីលកាន់តែច្រើនឡើងៗ។ សូម្បីតែក្នុងពេលកំពុងបំពេញទស្សនកិច្ចនៅរុស្ស៊ី ក៏កូរ៉េខាងជើងបានបាញ់សាកល្បងមីស៊ីលដែរ។ នៅព្រឹកថ្ងៃពុធទី១៣កញ្ញានេះ មុនមានជំនួបរវាងលោកពូទីននិងលោកគីម ព្យុងយ៉ាងបានបាញ់មីស៊ីលបាលីស្ទិករយៈខ្លីសំដៅសមុទ្ទខាងកើត (សមុទ្ទជប៉ុន) នៅចន្លោះម៉ោង១១និង៤៣នាទីទៅម៉ោង១១និង៥៣នាទី ហើយធ្លាក់ក្រៅតំបន់សេដ្ឋកិច្ចផ្តាច់មុខរបស់ជប៉ុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ