សមិទ្ធិករជប៉ុនប៉ងចង់បានរង្វាន់តាល់ប័ត្រជាលើកទី២ របស់មហោស្រពកានជាមួយរឿងMonster
មហោស្រពភាពយន្តកានមិនអាចដោះដៃពីខ្សែភាពយន្តជប៉ុន ជាពិសេសខ្សែភាពយន្តរបស់សមិទ្ធិករ ហ៊ីរ៉ូកាហ្សុយ កូរ៉េ អេដា។ បន្ទាប់ពីខ្សែភាពយន្តរបស់លោកឈ្មោះ Broker ខកខានមិនបានទទួលរង្វាន់អ្វី នៅក្នុងមហោស្រពកាន កាលពីឆ្នាំមុន សមិទ្ធិករជប៉ុន លោកកូរ៉េអេដាបានត្រលប់មកមហោស្រពកានម្តងទៀត នៅឆ្នាំនេះជាមួយខ្សែភាពយន្តថ្មីមួយរឿងទៀត។ រឿង Monster សត្វចម្លែក ត្រូវបានជ្រើសរើសសម្រាប់ការប្រកួតប្រជែងយករង្វាន់ធំ រង្វាន់តាល់ប័ត្រមាសរបស់មហោស្រពកាន។
ចុះផ្សាយនៅថ្ងៃ៖
ស្តាប់ - ០២:៥៩
Monster សត្វចម្លែក និយាយពីក្មេងប្រុសមីណាតូរស់នៅជាមួយម្តាយមេម៉ាយ ធ្វើការនៅកន្លែងបោកអ៊ុត។ រឿងនេះបើកឆាកជាមួយភ្លើងឆេះអគារដ៏សន្ធោសន្ធៅនៅចម្ងាយមួយ ដែលមីណាតូ និងម្តាយអាចមើលឃើញពីលើផ្ទះ។ ឈុតឆាកបន្ទាប់មកទៀត គេឃើញម្តាយរបស់មីណាតូចាប់ប្រែប្រួល មិនសូវនិយាយស្តី មានកាយវិការប្លែកៗ ដូចជាកាត់សក់ មានដែកកេះ និងពេលខ្លះត្រលប់មកផ្ទះជាមួយរបួសត្រចៀក។ ក្រោយការជជីកសួរ មីណាតូប្រាប់ម្តាយថា គ្រូប្រុសឈ្មោះ អូរីជាអ្នកវាយធ្វើបាបនៅក្នុងថ្នាក់។ បារម្ភខ្វល់ពីសុខមាលភាពរបស់កូន ស្រ្តីជាម្តាយបានទៅជួបលោកស្រីនាយកសាលាវ័យចំណាស់ ដែលទើបត្រលប់មកធ្វើការ នៅក្រោយការកាន់ទុក្ខចៅស្រីដែលស្លាប់ក្នុងគ្រោះថ្នាក់រថយន្ត។
នៅក្នុងរឿអMonster សត្វចម្លែកតែមួយ គឺត្រូវបានរៀបរាប់ ជាបីដំណាក់កាល។ ដំណាក់កាលទី១ ផ្តោតទៅលើការសកម្មភាព ការយល់ឃើញរបស់ម្តាយមីណាតូដែលទាមទារឲ្យសាលាបកស្រាយពីការប្រព្រឹត្តអំពើហិង្សាទៅលើកូនរបស់ខ្លួន។ ដំណាក់កាលទី២និយាយពីគ្រូបង្រៀនអូរីថ្នាក់ទី៥ របស់ក្មេងប្រុស មីណាតូ ដែលតាមពិតជាមនុស្សត្រឹមត្រូវ គ្មានកំហុសដូចការចោទប្រកាន់។
ចំណែកវគ្គទី៣ ផ្តោតទៅលើមីណាតូ ដែលតាមពិតចាប់អារម្មណ៍ក្មេងស្រីមិត្តរួមថ្នាក់ឈ្មោះ យូរី ដែលត្រូវក្មេងប្រុសក្នុងថ្នាក់ឧស្សាហ៍ធ្វើបាប ជេប្រមាថថា ខួរជ្រូក។ Monster សត្វចម្លែកជាពាក្យដែលឪពុកប្រមឹករបស់យូរីប្រើសម្រាប់ហៅកូនស្រី។
តាមរយៈ Monster សត្វចម្លែក សមិទ្ធិករជប៉ុន លោកកូរ៉េ អេដាដែលស្មោះស្ម័គ្រផ្តោតនិយាយតែរឿងសង្គម រឿងគ្រួសារ បានត្រលប់មកពីបញ្ហាក្នុងគ្រួសារ អំពើហិង្សារបស់មនុស្សចាស់ទៅលើកូនក្មេង និងទំនាក់ទំនង ពន្លកស្នេហារបស់ក្មេងជំទង់។ បើទោះបីជាគ្មានឈុតឆាកបាញ់សម្លាប់គ្នា គ្មានរឿងខ្មោចមកពញ្ញាក់អារម្មណ៍ ប៉ុន្តែ រឿងដ៏សាមញ្ញរបស់សមិទ្ធិករជប៉ុនបានធ្វើឲ្យអ្នកមើលតាមដានភ្លឹកស្ទើរមិនដកដង្ហើម។ សាច់រឿងបញ្ចប់ដោយក្មេងប្រុសស្រីទាំងពីរ ប្រឡាក់ភក់ពេញខ្លួន ដើរចេញពីរូងក្រោមដី និងចោទសួរគ្នាថា តើពួកគេកំពុងចាប់ជាតិថ្មីឬយ៉ាងណា? បើសិនចាប់ជាតិថ្មីជាមួយរូបរាងកាយដដែល វាពិតជាអស្ចារ្យណាស់។ នៅឈុតមុននេះគេឃើញព្យុះភ្លៀងបណ្តាលឲ្យបាក់ដីសង្កត់លើទូររទេះភ្លើងដែលក្មេងទាំងពីរប្រើជាកន្លែងសម្ងាត់របស់ខ្លួន។ តើមីណាតូ និងយូរីស្លាប់ដោយសារគ្រោះថ្នាក់បាក់រលំដី ឬក៏នៅរស់មានជីវិត។ សមិទ្ធិករលោក កូរ៉េអេដាបានទុករឿងនេះឲ្យអ្នកមើលកាត់ស្មានតាមចិត្តរបស់ខ្លួន។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ