រឿង Tiger Stripe របស់សមិទ្ធិករម៉ាឡេស៊ីនៅក្នុងការប្រកួតប្រជែងរង្វាន់ក្នុងមហោស្រពកាន
កាន – នៅថ្ងៃបើកសម្ពោធការប្រកួតប្រជែងផ្នែកSemaine de la Critique ដែលស្ថិតក្របខ័ណ្ឌមហោស្រពភាពយន្តអន្តរជាតិកាន រឿង Tiger Stripeដឹកនាំដោយសមិទ្ធិករស្រ្តីម៉ាឡេស៊ីម្នាក់ដែលត្រូវបានជ្រើសរើសសម្រាប់ការប្រកួតប្រជែងយករង្វាន់ នៅក្នុងផ្នែក Semaine de la Critiqueត្រូវចាក់បញ្ចាំងនៅថ្ងៃបើកឆាក។ រឿង Tiger Stripe ដែលត្រូវចាក់បញ្ចាំងកាលពីល្ងាចថ្ងៃពុធទី១៧ឧសភា មានបង្កប់ដោយភាពកំប្លែង ភ័យតក់ស្លុត និងរំជួលចិត្ត។ យើងស្តាប់ឈាង បុប្ផា ពីមហោស្រពកាន។
ចុះផ្សាយនៅថ្ងៃ៖
ស្តាប់ - ០៣:០៤
Tiger Stripe បកប្រែក្រៅផ្លូវការថា ស្បែកខ្លា បង្កង់ បង្កង់ និយាយពីក្មេងស្រី ហ្សាហ្វង់ អាយុ១២ឆ្នាំម្នាក់ ដែលរស់នៅជនបទប្រទេសម៉ាឡេស៊ី។ សាច់រឿងចាប់ផ្តើមដំបូងជាមួយហ្សាហ្វង់កំពុងរាំចង្វាក់តិចណូនៅមុខកាម៉េរ៉ាទូរស័ព្ទរបស់មិត្តភក្តិក្នុងបន្ទប់ទឹករបស់សាលារៀន។ ស្ថិតក្នុងវ័យជំទង់ កំពុងពេញវ័យ ហ្សាហ្វង់សង្កេតឃើញរាងកាយប្រែប្រួលយ៉ាងឆាប់រហ័ស។ ចាប់មានរដូវមុនគេ ក្នុងចំណោមមិត្តភក្តិរួមថ្នាក់ ហ្សាហ្វង់ត្រូវមិត្តជិតស្និទ្ធតិះដៀល ធ្វើបាបនិងលែងរាប់រកតទៅទៀត។
ដោយសាររងការធ្វើបាបនៅសាលារៀន ម្តាយមិនយល់ចិត្ត រួមផ្សំនឹងរាងកាយប្រែប្រួល ហើយនឹងវិន័យតឹងរ៉ឹងក្នុងសាសនាអ៊ីស្លាម សម្រាប់ស្រ្តីម៉ាឡេស៊ី ហ្សាហ្វង់កើតកំហឹងរត់ចូលក្នុងព្រៃ ជាទីដែលនាងធ្លាប់ឃើញព្រលឹងមនុស្សស្រីដែលធ្លាប់គេចចាមអារ៉ាមថា បាត់ខ្លួនចាប់តាំងពីថ្ងៃមានរដូវ។
រាល់ពេលហ្សាហ្វង់ខឹងម្តងៗ គេលឺសំឡេងខ្លាគ្រហឹម។ ក្មេងស្រីដែលចូលរួមធ្វើបាបហ្សាហ្វង់ ចាប់ផ្តើមកើតជំងឺផ្លូវចិត្តស្រែកពេញសាលារៀន រហូតធ្វើគ្រូពេទ្យបុរាណម្នាក់ដែលឃោសនាតាមបណ្តាញសង្គមលូកដៃអន្តរាគមន៍ ដើម្បីបណ្តេញព្រលឹងខ្មោចចេញពីក្មេងស្រីៗក្នុងភូមិ។ ថ្ងៃមួយដែលហ្សាហ្វង់ត្រូវឪពុកម្តាយនាំយកទៅឲ្យគ្រូពេទ្យបុរាណរំដោះគ្រោះ ហ្សាហ្វង់ផ្ទុះកំហឹងប្រៀបបាននឹងសត្វខ្លាមួយដែលត្រូវគេរំខាន បណ្តេញចេញពីលំនៅ។ នៅទីបំផុត ហ្សាហ្វង់បានបង្ហាញធាតុពិតធម្មជាតិរបស់ខ្លួន ជាមនុស្សសត្វខ្លាសាហាវសម្លាប់គ្រូពេទ្យបុរាណ មុននឹងរត់ទៅរស់នៅក្នុងព្រៃដ៏មានសេរីភាពរបស់នាង។
Tiger Stripeជាស្នាដៃនិពន្ធនិងដឹកនាំរឿងសមិទ្ធិករស្រ្តីម៉ាឡេស៊ី អាម៉ាន់ដា ណែល អ៊ុយ ដែលបានបញ្ចប់ការសិក្សានៅសាលាកុននៅទីក្រុងឡុងដ៍។
តាមរយៈរឿងនេះ សមិទ្ធិករស្រ្តីអាម៉ាន់ដា ចង់បង្ហាញពីគំនាបសាសនា អបិយជំនឿ និងការវាយធ្វើបាប ជេរប្រមាថនៅក្នុងចំណោមសិស្សវ័យជំទង់។ ហ្សាហ្វង់ក្មេងស្រីតួអង្គឯករបស់រឿងTiger Stripe បានក្លាយជាមនុស្សចម្លែកនៅក្នុងភូមិ ព្រោះនាងជាមនុស្សដែលគិតប្លែក ហ៊ានធ្វើអ្វីខុសប្លែកពីគេ ដែលតាមពិតទាំងអស់នោះគឺចរិតសប្បាយធម្មតារបស់ក្មេងដែលកំពុងឈានចូលដល់វ័យជំទង់។ តើរឿង Tiger Stripeអាចដណ្តើមរង្វាន់នៅក្នុងការប្រកួតប្រជែងរបស់ផ្នែកSemaine de la Critique ដែរឬទេ? គេមិនទាន់ដឹងចម្លើយ ព្រោះត្រូវរង់ចាំដល់ថ្ងៃបិទបញ្ចប់របស់មហោស្រព ប៉ុន្តែ អ្វីដែលគេអាចដឹងនៅពេលនេះ គឺប្រធានរបស់Semaine de la Critique បានប្រៀបប្រដូចរឿងTiger Stripeរបស់សមិទ្ធិករម៉ាឡេស៊ី ទៅនឹងសាច់រឿងរបស់អ្នកដឹកនាំថៃ លោកអាភីឆាពុង ដែលធ្លាប់ទទួលបានរង្វាន់តាល់ប័ត្រមាសរបស់មហោស្រពកាន កាលពីឆ្នាំ ២០១០ សម្រាប់រឿង uncle Boonmee ពូ ប៊ុនមី។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ