លោក ពូទីន ៖ រុស្ស៊ី និង ចិន មិនមែនកំពុងតែបង្កើតសម្ព័ន្ធមិត្តយោធាទេ
ប្រធានាធិបតីរុស្ស៊ី បានបញ្ជាក់នៅថ្ងៃអាទិត្យទី២៦មីនាថា រុស្ស៊ីនិងចិន មិនមែនកំពុងតែបង្កើត«សម្ព័ន្ធមិត្តយោធា»ឡើយ។ លោក វ្ល៉ាឌីមៀរ ពូទីន អះអាងទៀតថា កិច្ចសហការរវាងកម្លាំងកងទ័ពប្រទេសទាំងពីរគឺឈរលើ«តម្លាភាព»។ នេះបើតាមអ្វីដែលចៅហ្វាយវិមានក្រេមឡាំងប្រកាសតាមកញ្ចក់ទូរទស្សន៍រដ្ឋរុស្ស៊ី។ ក៏ប៉ុន្តែ សម្តីទាំងនេះ ស្តាប់មិនចូលត្រចៀករបស់ថ្នាក់ដឹកនាំប្រទេសបច្ចិមលោកទេ។ ដ្បិតថា ខាងបច្ចិមប្រទេស នៅតែបន្តចោទថា ប្រមុខរដ្ឋរុស្ស៊ីកំពុងតែចង់កេងចំណេញពេលវេលា ដើម្បីវាយសម្រុកលើអ៊ុយក្រែន។
ចុះផ្សាយនៅថ្ងៃ៖
ស្តាប់ - ០២:២១
៤ថ្ងៃក្រោយដំណើរទស្សនកិច្ចប្រធានាធិបតីចិននៅរដ្ឋធានម៉ូស្កូ លោក វ្ល៉ាឌីមៀរ ពូទីន បានបង្ហើរប្រសាសន៍តាមទូរទស្សន៍រដ្ឋរុស្ស៊ី ក្នុងសេចក្តីថា « យើង ចិននិងរុស្ស៊ី សហការគ្នាក្នុងវិស័យបច្ចេកវិទ្យាយោធា ជាការពិត យើងគ្មានអ្វីត្រូវលាក់បាំងឡើយ។ ក្នុងរឿងសហការគ្នានេះ អ្វីៗសុទ្ធតែមានតម្លាភាពច្បាស់លាល់ និងគ្មានការសម្ងាត់អ្វីទេ»។ ប៉ុន្តែ ប្រមុខរដ្ឋរុស្ស៊ី លោក ពូទីន អះអាងថា រុស្ស៊ីនិងចិនមិនមែនកំពុងតែបង្កើត«សម្ព័ន្ធមិត្តយោធា»ឡើយ។
ការគូសបង្ហាញនេះ គឺឆ្លើយតបនឹងការសង្ស័យនិងការចោទប្រកាន់របស់ប្រទេសដទៃ ពិសេសបច្ចិមប្រទេស ដោយហេតុថា ថ្នាក់ដឹកនាំចិននិងរុស្ស៊ី បានប្រកាសបង្ហាញចំណងមេត្រីភាព និងបានប្តេជ្ញាចិត្តរឹតចំណងទាក់ទងកាន់តែខ្លាំងនៅក្នុងវិស័យយោធា នៅក្នុងដំណើរទស្សនកិច្ចរបស់ប្រធានាធិបតីចិន ស៊ីជីនពីង ពីថ្ងៃទី២១-២២មីនា កន្លងទៅ។ ម្យ៉ាងទៀត ប្រទេសទាំង២នេះខិតកៀកចូលគ្នា កាន់តែខ្លាំង នៅមុនពេលនិងអំលុងពេលផ្ទុះសង្ក្រាមលើអ៊ុយក្រែន។ ពោលគឺនៅដើមឆ្នាំ២០២២ រុស្ស៊ីនិងចិន បានចុះកិច្ចព្រមព្រៀង១ស្តីពី«ដៃគូសហការគ្មានដែនកំណត់»។ មិនតែប៉ុណ្ណោះ បច្ចិមលោកក៏បានសង្ស័យដែរ ថា ចិន លួចជួយផ្តល់ជំនួយខាងយោធាឲ្យរុស្ស៊ី ដើម្បីវាយសម្រុកច្បាំងនៅអ៊ុយក្រែន ដែលចំណុចនេះ ចិនតែងតែអះអាងបដិសេធច្រានចោលជាហូរហែ ច្រើនលើកច្រើនគ្រា។
ហេតុដូច្នេះហើយ បើទោះបីជាលោក វ្ល៉ាឌីមៀរ ពូទីន ប្រឹងប្រកាសពី«តម្លាភាព»ក្តី ក៏ប្រទេសបច្ចិមលោកហាក់មិនជឿ និងមិនទាន់ស្តាប់ចូលត្រចៀកឡើយ។ ពួកគេច្រានចោលការលើកឡើងរបស់លោកពូទីននៅថ្ងៃអាទិត្យ និងចាត់ទុកសម្តីនេះ ថាជា«យុទ្ធសាស្ត្រចង់កេងចំណេញពេលវេលា ដើម្បីនឹងមានឱកាសច្រើនបង្កើនឥទ្ធិពលកម្លាំងកងទ័ព ឈ្លានពានអ៊ុយក្រេន»។
នៅអ៊ុយក្រែន ពីថ្ងៃអាទិត្យ លោក វ៉ូឡូឌីមៀរ ហ្សេឡេនស្គី បានស្នើសុំឲ្យ ក្រុមប្រឹក្សាសន្តិសុខអង្គការសហប្រជាជាតិ គឺតំណាង៤ប្រទេស បារាំង អង់គ្លេស ចិន និងអាមេរិក (ដក រុស្ស៊ី ចេញ) ឲ្យកោះប្រជុំជាបន្ទាន់។ ត្រូវប្រជុំជាបន្ទាន់ គឺបន្ទាប់ពីប្រធានាធិបតីរុស្ស៊ី ប្រកាសពីថ្ងៃសៅរ៍ថា នឹងដាក់ពង្រាយអាវុធនុយក្លេអ៊ែរយុទ្ធសាស្ត្រ (នុយក្លេអ៊ែរតាក់ទិក) នៅលើទឹកដីបេឡារុស ដែលជាសម្ព័ន្ធមិត្តរបស់រុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ