អ.ស.ប.៖ អ៊ុយក្រែននិងរុស្ស៊ី សុទ្ធតែ«ធ្វើទារុណកម្មនិងសម្លាប់ឈ្លើយសឹក»ទាំងពីរខាង
ថ្ងៃសុក្រ ទី២៤មីនា អង្គការសហប្រជាជាតិ ចោទប្រកាន់ទាំងខាងកងទ័ពរុស្ស៊ី និងទាំងកងទ័ពអ៊ុយក្រែន ស្តីពីការសម្លាប់ឈ្លើយសឹក បំពាននឹងច្បាប់សិទ្ធិមនុស្ស។ ជាប្រតិកម្មភ្លាមៗ អ្នកតំណាងអាជ្ញាធរសិទ្ធិមនុស្សអ៊ុយក្រែន បានបដិសេធច្រានចោលការចោទប្រកាន់បែបនេះ ថា«ទទួលយកមិនបានទាល់តែសោះ» ហើយចំណែក រដ្ឋមន្ត្រីការបរទេសអ៊ុយក្រែន ថា គេមិនអាច និងមិនត្រូវចាត់ទុក «ជនរងគ្រោះ» និង«អ្នកឈ្លានពាន ជាជនល្មើស»នោះ នៅក្នុងកន្ត្រកតែមួយបានទេ។
ចុះផ្សាយនៅថ្ងៃ៖
ស្តាប់ - ០១:៥៨
ទាំងរុស្ស៊ីទាំងអ៊ុយក្រែនសុទ្ធតែធ្វើបាបឈ្លើយសឹករៀងៗខ្លួន។ ការចង្អុរមុខចោទប្រកាន់លើរុស្ស៊ីនិងលើអ៊ុយក្រែន ពីសំណាក់អង្គការសហប្រជាជាតិនេះ គឺតាមរយៈរបាយការណ៍របស់គណៈកម្មាការត្រួតពិនិត្យវាយតម្លៃស្ថានភាពសិទ្ធិមនុស្សប្រចាំអ៊ុយក្រែន។ នោះគឺជារបាយការណ៍ស៊ើបអង្កេត ចំនួន ៥ ដែលបានចុះសាកសួរអតីតឈ្លើយសឹកទាំងរុស្ស៊ីនិងទាំងអ៊ុយក្រែន ចំនួន២២នាក់ ហើយនិងបានស្រង់សម្តីរបស់អតីតឈ្លើយសឹកផង។
នៅថ្ងៃសុក្រ អ្នកស្រី Matilda Bogner នាយិកាបេសកម្មត្រួតពិនិត្យសិទ្ធិមនុស្សនៃអង្គការសហប្រជាជាតិប្រចាំអ៊ុយក្រែន បានបង្ហាញលទ្ធផលអង្កេត និងបានបញ្ជាក់ពីក្តីព្រួយបារម្ភជាខ្លាំងចំពោះការសម្លាប់ឈ្លើយសិកនិងមនុស្សក្រៅពីកន្លែងច្បាំងគ្នា ចំនួន ២៥នាក់ ក្នុងនោះ ១៥ នាក់ជាឈ្លើយសឹក ដែលគេសម្លាប់ផ្តាច់ជីវិត នៅក្រៅសមរភូមិ។ គេគ្មានដំណឹងពីការប្តឹងផ្តល់ចំពោះឃាតករ ដើម្បីរកយុត្តិធម៌ទាល់តែសោះ។
អង្គការសហប្រជាជាតិប្រចាំអ៊ុយក្រែន ក៏បានលើកឡើងដែរ ពីបច្ចេកទេសធ្វើទារុណកម្មទៅលើចំណាប់ខ្មាំង ដែល អាជ្ញាធរអ៊ុយក្រែន បានប្រើទៅលើឈ្លើយសឹករុស្ស៊ី។ បច្ចេកទេសធ្វើទារុណកម្ម មានទាំងពីការគំរាមសម្លាប់ និង គំរាមរំលោភភេទ។ ឈ្លើយសឹករុស្ស៊ីម្នាក់ ផ្តល់សាក្ខីកម្មថា នៅមុនពេលសាកសួរចម្លើយ គឺពួកអ៊ុយក្រែន បានបង្ហាញពូថៅប្រឡាក់ឈាម ជាការបំបាកស្មារតី ហើយបានធ្វើទារុណកម្មនិងឆក់ខ្សែភ្លើងទៀតផង។
ចំណែកទាហានអ៊ុយក្រែនដែលត្រូវរុស្ស៊ីចាប់បានវិញ ក៏ផ្តល់សាក្ខីកម្មក្នុងរបាយការណ៍ដែរ ថាពួករុស្ស៊ីធ្វើទារុណកម្មរាយកាយ បង្អត់អាហារ និងមិនឲ្យថ្នាំសង្កូវព្យាបាលទេ ហើយទុកចោលរហូតស្លាប់ក៏មាន។ ឈ្លើយសឹកជាតិអ៊ុយក្រែនខ្លះទៀត អះអាងថា បានត្រូវពួករុស្ស៊ី វាយបំបាក់ឆ្អឹងជំនី បាក់ម្រាមដៃ បាក់ខ្ទង់ច្រមុះ ជាច្រើននាក់ដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ