រថភ្លើងបុកគ្នានៅក្រិក ស្លាប់មនុស្សយ៉ាងតិច ៣៦នាក់
រថភ្លើងពីរបុកគ្នា បណ្តាលឲ្យស្លាប់មនុស្សយ៉ាងតិច ៣៦នាក់ និងរបួស ៨៥ នាក់។ ហេតុការណ៍នេះ កើតឡើងនៅប្រទេសក្រិក យប់កណ្តាលអធ្រាត្រថ្ងៃអង្គារ និងជា គ្រោះថ្នាក់រថភ្លើង ដែល មានស្លាប់មនុស្សអស់ច្រើនបំផុត មិនធ្លាប់ជួបទេ ក្នុងរយៈពេល២៥ឆ្នាំចុងក្រោយនៅអឺរ៉ុប។
ចុះផ្សាយនៅថ្ងៃ៖
ស្តាប់ - ០២:០១
រថភ្លើងមួយ ដឹកនាំអ្នកដំណើរ ៣៥០នាក់ ចេញពីរដ្ឋធានីអាថែន តម្រង់ទៅក្រុងជាប់មាត់សមុទ្រ តេសសាឡូនីក (Thessalonique)។ នៅពេលទៅដល់រូងក្រោមដីមួយ ក្នុងក្រុង ឡារីស្សា (Larissa) ក៏ស្រាប់តែបុកយ៉ាងពេញទំហឹងជាមួយនឹងរថភ្លើងមួយទៀត ជារថភ្លើងដឹកទំនិញ ដែលបើកបរផ្លូវបញ្ជ្រាសគ្នា។ អ្នកបើកបររថភ្លើងទាំងពីរ មិនដឹងរៀងខ្លួនថា នៅពីមុខ មានរថភ្លើងកំពុងតែបើកលើខ្សែផ្លូវដែកតែមួយទេ។ នេះបើតាមអាជ្ញាធរក្រិកនៅមូលដ្ឋាន។
នៅនឹងកន្លែងកើតហេតុ គេឃើញមាន ទូរថភ្លើង ៤ ដាច់របះចេញពីគ្នា។ ទូ ២ បុកគ្នា និងឆេះខ្ទេចខ្ទីរ ហើយ ទូ១ទៀតលោតខ្ទាតចម្ងាយ ៩០ ម៉ែត្រ ពីផ្លូវដែក។
ក្រុមអ្នកសង្គ្រោះបន្ទាន់ ១៥០នាក់ និងឡានសង្គ្រោះបន្ទាន់ ៤០ គ្រឿង បានចុះទៅកន្លែងកើតហេតុ និងបានឃើញមនុស្សស្លាប់យ៉ាងហោច ២៩ នាក់ នៅកន្លែងកើតតែម្តង ហើយខ្លះទៀតជាប់គាំងនៅក្នុងទូរថភ្លើង។ អ្នកនាំពាក្យក្រុមសង្គ្រោះបន្ទាន់ បានធ្វើសន្និសីទកាសែតយ៉ាងខ្លីថា ៨៥ នាក់របួស ហើយនិងបញ្ចូនទៅសង្គ្រោះនៅមន្ទីរពេទ្យ ខណៈអ្នកដំណើរផ្សេងទៀត ត្រូវបញ្ចូនបន្តតាមឡានក្រុងឆ្ពោះទៅទិសដៅធ្វើដំណើរបន្តទៀត។
ជុំវិញមូលហេតុនៃគ្រោះថ្នាក់រថភ្លើងបុកគ្នា អាជ្ញាធរក្រិក នៅមិនទាន់បានបញ្ជាក់ថា ហេតុការណ៍គ្រោះថ្នាក់នេះ បណ្តាលពីមូលហេតុអ្វីឲ្យច្បាស់ទេ។ នៅពេលនេះ នគរបាលក្រិកនិងសមត្ថកិច្ចជំនាញ កំពុងបើកសំណុំរឿងស៊ើបអង្កេត ដើម្បីយល់ពីគ្រោះថ្នាក់ និង រកមើលមូលហេតុពិតនៃសោកនាដកម្ម។ នេះបើតាមនាយកគ្រប់គ្រងរថភ្លើងនៅមូលដ្ឋាន។
នៅថ្ងៃពុធ រដ្ឋមន្ត្រីសុខាភិបាលក្រិក បានចុះទៅផ្ទាល់នៅកន្លែងកើតហេតុ ខណៈពេលរដ្ឋមន្ត្រីមហាផ្ទៃ បានកោះប្រជុំជាបន្ទាន់ ដើម្បីដោះស្រាយវិបត្តិ។
នៅក្រិក កាលពី៥១ឆ្នាំមុន ក្នុងក្រុងឡារីស្សាដដែលនេះ ក៏មាន រថភ្លើង ២ បុកគ្នាម្តងរួចហើយដែរ ។ កាលនោះ ស្លាប់មនុស្ស ១៩ នាក់។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ