ប្រមុខការទូតអាមេរិក ទៅ តួកគី ជាលើកដំបូង ក្រោយឡើងកាន់តំណែងក្រសួងការបរទេស ២ ឆ្នាំ
បន្ទាប់ពីសន្និសីទសន្តិសុខនៅអាល្លឺម៉ង់ រដ្ឋមន្ត្រីការបរទេសសហរដ្ឋអាមេរិក បានធ្វើដំណើរទៅដល់ព្រលានយន្តហោះតួកគី ប៉ែកកើតប្រទេស នៅថ្ងៃអាទិត្យ ហើយនិងបន្តជួបជាមួយប្រធានាធិបតីតួកគី អ៊ែរដូហ្កាន នៅថ្ងៃច័ន្ទ។ នេះគឺជាដំណើរទស្សនកិច្ចផ្លូវការជាលើកទី១ បន្ទាប់ពីលោក អង់តូនី ប្ល៊ីងកិន ឡើងកាន់តំណែងរដ្ឋមន្ត្រីក្រសួងការបរទេសអាមេរិក ២ ឆ្នាំមក។ ក្នុងដំណើរទស្សនកិច្ចប្រមុខការទូតលើកនេះ សហរដ្ឋអាមេរិកប្រកាសផ្តល់ជំនួយដល់ តួកគី ដែលរងគ្រោះដោយរញ្ជួយដី ស្លាប់មនុស្ស ជាង ៤ ម៉ឺននាក់។ ក៏ប៉ុន្តែ នៅមានសំណុំរឿងជាច្រើនទៀត ទាំងពហុភាគី និងទ្វេភាគី ដែល ថ្នាក់ដឹកនាំទាំងពីរប្រទេស ត្រូវគិតគូរ។
ចុះផ្សាយនៅថ្ងៃ៖
ស្តាប់ - ០២:២៤
គ្រាន់តែចុះចតនៅទឹកដីតួកគីភ្លាម រដ្ឋមន្រ្តីក្រសួងការបរទេស បានស្កាត់ទៅជួបនឹងក្រុមសង្គ្រោះអាមេរិក។ សហរដ្ឋអាមេរិក បានបញ្ជូនក្រុមអ្នកសង្គ្រោះ ប្រមាណ ២០០នាក់ និង យន្តហោះកន្ទុំរុយយោធា (ឧទ្ធម្ភាគចក្រ) ច្រើនគ្រឿង ដើម្បីជួយស្រោចស្រង់អាយុជីវិតមនុស្ស ដែលរងគ្រោះរញ្ជួយដី។ គ្រោះថ្នាក់រញ្ជួយដី កើតឡើងកាលពីថ្ងៃ ៦កុម្ភៈ ២សប្តាហ៍មុន។
ទន្ទឹមនឹងគ្នានេះ លោក អង់តូនី ប្ល៊ីងកិន បានប្រកាសផ្តល់ជំនួយ ជាទឹកប្រាក់ចំនួន ១០០លានដុល្លារ បន្ថែមទៀត សម្រាប់បំពេញតម្រូវការជនរងគ្រោះរញ្ជួយដី។ ប្រមុខការទូតអាមេរិក ក៏នឹងជួបសំណេះសំណាល់ជាមួយប្រមុខរដ្ឋតួកគីរេសេប តាយីប អ៊ែរដូហ្កាន នៅថ្ងៃច័ន្ទ។
សូមជ្រាបថា ប្រទេសទាំងពីរ អាមេរិក និងតួកគី មើលមុខគ្នាមិនចំ មិនត្រង់ទេ។ ប្រធានាធិបតីសហរដ្ឋអាមេរិក លោក ចូ បៃដិន ធ្លាប់បានថ្កោលទោសប្រធានាធិបតីតួកគី ថា កាន់អំណាចផ្តាច់ការ និងថា តួកគី ចងសម្ព័ន្ធភាពស្និទ្ធស្នាល់ខ្លាំងនឹង រុស្ស៊ី ដែលជាគូសត្រូវនឹងអាមេរិក។ ដូច្នេះ អាមេរិក ត្រូវនៅឆ្ងាយពីតួកគី។
នៅពេលក្រោយមក គឺ វិបត្តិនៃសង្គ្រាមអ៊ុយក្រែន បានកែប្រែការយល់ឃើញរបស់អាមេរិក គឺនៅត្រង់ថា ដោយសារតែថ្នាក់ដឹកនាំ តួកគី បានជួយអន្តរាគមន៍ ទើបអាចធ្វើឲ្យ អង្គការសហប្រជាជាតិ នាំស្បៀងអាហារនិងគ្រាប់ធញ្ញជាតិ ចេញពីកំពង់ផែ អ៊ុយក្រែន និង កំពង់ផែ រុស្ស៊ី ។ ជាការតបស្នង រដ្ឋបាលអាមេរិក បានជួយសម្រួលឲ្យ តួកគី ទិញយន្តហោះចម្បាំងដ៏ទំនើបរបស់ខ្លួន ប្រភេទ F16 ។ ក៏ប៉ុន្តែ សំណើទិញនេះ ត្រូវ សភាអាមេរិក បដិសេធជំទាស់ ព្រោះតែព្រួយបារម្ភពីបញ្ហាសិទ្ធិមនុស្សនៅតួកគី និងជម្លោះនៅព្រំដែនជាមួយ ក្រិច។
អាស្រ័យហេតុនេះ ដំណើរទស្សនកិច្ច របស់ លោក អង់តូនី ប្ល៊ីងកិន ទៅ តួកគី លើកនេះ គឺ មួយចំណែក ដើម្បីផ្សះផ្សារបួសអធិករណ៍ចាស់ៗខ្លះ រវាង សហរដ្ឋអាមេរិក ជាមួយ តួកគី ហើយនិងមួយចំណែកទៀត គឺដើម្បីធ្វើជាអន្តរការីសម្រួលទំនាក់ទំនង តួកគី និង ក្រិច។ ក្រិច ជាប្រទេសដែលប្រមុខរដ្ឋអាមេរិក នឹងបន្តដំណើរ នៅល្ងាចថ្ងៃច័ន្ទ និងថ្ងៃអង្គារ។
តាំងតែពីថ្ងៃព្រហស្បតិ៍ មកម្ល៉េះ ដែល នាយករដ្ឋមន្ត្រីក្រិច បានលើកឡើងថា គ្រោះរញ្ជួយដីនៅព្រំដែនតួកគីនិងស៊ីរី ជាឱកាសមួយដែលអាចឲ្យ រដ្ឋធានីអាថែន និង អង់ការ៉ា ផ្សាភ្ជាប់ទាក់ទងនឹងគ្នាឡើងវិញ។ សូមជ្រាបដែរ ថា តាំងពីថ្ងៃគ្រោះរញ្ជួយដីដំបូងម្ល៉េះ ដែល ក្រិច បោះដៃផ្តល់ជំនួយសង្គ្រោះដល់ តួកគី មុនគេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ