RSF៖ ក្នុងរយៈពេល ២០ឆ្នាំ អ្នកកាសែតជិត១៧០០នាក់ នៅក្នុងពិភពលោក ត្រូវគេសម្លាប់
ចុះផ្សាយនៅថ្ងៃសុក្រ ទី ៣០ធ្នូ នេះ របាយការណ៍បូកសរុបរបស់អង្គការអ្នកកាសែតគ្មានព្រំដែន បានបង្ហាញថា អ្នកកាសែតជិត ១៧០០នាក់ នៅក្នុងពិភពលោកត្រូវគេសម្លាប់ នៅក្នុងរយៈពេល ២០ឆ្នាំចុងក្រោយ។ ៨០%នៃអ្នកកាសែតដែលត្រូវគេសម្លាប់ នៅ ២ទសវត្សរ៍មកនេះ ប្រមូលផ្តុំតែនៅក្នុងប្រទេសចំនួន ១៥ នៅក្នុងពិភពលោក។ ដោយសារសង្រ្គាម និងជម្លោះប្រដាប់អាវុធ ស៊ីរី និងអ៊ីរ៉ាក់នាំមុខគេ ក្នុងនាមជាតំបន់ដ៏គ្រោះថ្នាក់ សម្រាប់អ្នកកាសែត។
ចុះផ្សាយនៅថ្ងៃ៖
ស្តាប់ - ០២:៥៦
ក្នុងរយៈពេល ២០ឆ្នាំ គិតចាប់តាំងពីឆ្នាំ ២០០៣ ដល់ឆ្នាំ ២០២២ អ្នកកាសែតចំនួន ១៦៦៨នាក់ត្រូវគេសម្លាប់ នៅក្នុងពេលកំពុងបំពេញការងាររបស់ខ្លួន ពោលគឺប្រមាណ ៨០នាក់ ក្នុងមួយឆ្នាំ។ តាមរបាយការណ៍បូកសរុបរបស់អង្គការអ្នកកាសែតគ្មានព្រំដែន ហៅកាត់ជាភាសាបារាំង RSF អ្នកកាសែតរងគ្រោះស្លាប់ដោយសារអំពើឃាតកម្ម ការសម្លាប់ជំរះបញ្ជី ការលួចវាយប្រហារ សង្រ្គាម ជម្លោះប្រដាប់អាវុធ។
ឆ្នាំ២០១២ និងឆ្នាំ ២០១៣ ជាឆ្នាំខ្មៅដ៏ងងឹតសម្រាប់អ្នកកាសែត ជាមួយចំនួនអ្នកកាសែតត្រូវគេសម្លាប់ ១៤៤នាក់ នៅឆ្នាំ ២០១២ និង១៤២នៅឆ្នាំ ២០១៣។ តាមការពន្យល់របស់អង្គការអ្នកកាសែតគ្មានព្រំដែន ការផ្ទុះសង្រ្គាម នៅស៊ីរី ជាហេតុផលចំបង ដែលធ្វើឲ្យមានចំនួនអ្នកកាសែតស្លាប់ច្រើនបែបនេះ។
សង្រ្គាម និងជម្លោះប្រដាប់អាវុធ ក៏ជាមូលហេតុធ្វើឲ្យស៊ីរី និងអ៊ីរ៉ាក់ជាប់ចំណាត់ថ្នាក់លើគេ ក្នុងនាមជាប្រទេសដ៏គ្រោះថ្នាក់សម្រាប់អ្នកកាសែត។ ចំនួនអ្នកកាសែតដែលត្រូវគេសម្លាប់ នៅក្នុងប្រទេសទាំងពីរ មានចំនួន៥៧៨នាក់ ស្មើនឹងមួយភាគបី នៃអ្នកកាសែតសរុប ដែលត្រូវគេសម្លាប់ នៅក្នុងពិភពលោក។ ម៉ិចស៊ិក ជាប់ចំណាត់ថ្នាក់ទី៣ ដោយមានអ្នកកាសែតត្រូវគេសម្លាប់ ចំនួន ១២៥នាក់ ចំណែកហ្វីលីពីនជាប់ចំណាត់ថ្នាក់ទី ៤ នាំមុខប៉ាគីស្ថាន និងអាហ្វហ្កានីស្ថាន។
តាមរបាយការណ៍របស់អង្គការអ្នកកាសែតគ្មានព្រំដែន បន្ទាប់ពីធូរស្រាល ល្អប្រសើរ ចាប់តាំងពីឆ្នាំ ២០១៩ ចំនួនអ្នកកាសែតដែលត្រូវគេសម្លាប់ ក៏ចាប់កើនឡើងវិញ នៅឆ្នាំ ២០២២ ដោយសារសង្រ្គាមអ៊ុយក្រែន ជាទីដែល អ្នកកាសែត ៨នាក់ ស្លាប់ដោយសារគ្រាប់កាំភ្លើង ការបំផ្ទុះគ្រាប់ ចាប់តាំងពីការធ្វើសង្រ្គាមឈ្លានពានរបស់រុស្ស៊ី នៅ ចុងខែកុម្ភៈ។ សង្រ្គាមធ្វើឲ្យអ៊ុយក្រែនជាប់ចំណាត់ថ្នាក់ទី ២ នៅក្នុងចំណោមប្រទេសនៅអឺរ៉ុប នៅពីក្រោយរុស្ស៊ី។ តាមរបាយការណ៍របស់អង្គការRSF រុស្ស៊ី នៅក្រោមអំណាចដឹកនាំរបស់លោកពូទីន បានផ្តើមយុទ្ធនាការរឹតត្បិតសិទ្ធិសេរីភាពសារព័ត៌មាន ប្រឆាំងអ្នកកាសែតប្រឆាំង។
សម្រាប់អង្គការអ្នកកាសែតគ្មានព្រំដែន ជាការពិត អ្នកកាសែតប្រឈមខ្លាំងនឹងគ្រោះថ្នាក់បាត់បង់ជីវិត នៅក្នុងពេលចុះយកព័ត៌មាននៅតាមតំបន់ដែលមានសង្រ្គាម ជម្លោះប្រដាប់អាវុធ។ ប៉ុន្តែ ប្រទេសដែលគ្មានសង្រ្គាម ក៏មិនមែនជាកន្លែងសុខសុវត្ថិភាព សម្រាប់អ្នកកាសែតដែរ។ ជាក់ស្តែង អ្នកកាសែត នៅម៉ិកស៊ិក ប្រេស៊ីល កូឡុំប៊ី និងហុងឌុយរ៉ាស ជាដើម ត្រូវគេលួចធ្វើឃាត ច្រើន ដោយសារតែអត្ថបទស៊ើបអង្កេតរបស់ពួកគេទាក់ទងនឹងរឿងពុករលួយ ឬក្រុមឧក្រិដ្ឋ ជួញដូរគ្រឿងញៀន ជួញដូរមនុស្ស។ ជារួម ទ្វីបអាមេរិក ដែលគ្មានសង្រ្គាមស៊ីវិលសោះ បានក្លាយជាតំបន់ដ៏គ្រោះថ្នាក់ មានចំនួនអ្នកកាសែតត្រូវគេសម្លាប់ ច្រើនជាងនៅតំបន់ដែលជួបសង្រ្គាមទៅទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ