Oxfam រិះគន់ភាពអសកម្មរបស់រដ្ឋាភិបាលលើពិភពលោក ក្នុងការលុបបំបាត់វិសមភាពសង្គម
នៅក្នុងរបាយការណ៍ចេញផ្សាយ នាថ្ងៃអង្គារទី ១១ តុលា ២០២២នេះ អង្គការOxfam បានបរិហារភាពអសកម្មរបស់បណ្តារដ្ឋាភិបាលនៅលើពិភពលោក ក្នុងការលុបបំបាត់វិសមភាព។ តាំងពីផ្ទុះវិបត្តិកូវីដមក វិសមភាពសង្គមមានកាន់តែធ្ងន់ធ្ងរ។ អ្នកក្រីក្រ និងទន់ខ្សោយខ្លាំង រងគ្រោះខ្លាំងជាពិសេសជាងគេ ប្រឈមនឹងជំងឺផង និងបញ្ហាថវិកាផង។
ចុះផ្សាយនៅថ្ងៃ៖
ចេញផ្សាយជារៀងរាល់ពីរឆ្នាំម្តង របាយការណ៍វាស់វែងសកម្មភាពលុបបំបាត់វិសមភាពសង្គម ប្រចាំឆ្នាំ២០២២ បានបង្ហាញឱ្យឃើញយ៉ាងច្បាស់ថា រដ្ឋាភិបាលនៃបណ្តាប្រទេសជាច្រើននៅលើពិភពលោក មិនបានចាត់វិធានការហ្មត់ចត់ ទ្រង់ទ្រាយធំ ដើម្បីកាត់បន្ថយវិសមភាពសង្គមទេ។ កាន់តែអាក្រក់បំផុតទៅទៀត ដោយហេតុមានជំងឹរាតត្បាតសកលដ៏ធ្ងន់ធ្ងរមិនធ្លាប់ប្រទះក្នុងសតវត្សរ៍នេះ ប្រទេសក្រីក្រនិងមានចំណូលមធ្យមចំនួនពាក់កណ្តាល កាត់បន្ថយចំណាយសាធារណៈផ្នែកសុខភាព ក្នុងពេលកំពុងមានវិបត្តិកូវីដ និងកាត់បន្ថយ៧០%ចំណាយក្នុងវិស័យអប់រំ។ នេះបើតាមការលម្អិតបន្ថែមក្នុងរបាយការណ៍របស់អង្គការOxfamដដែល ដែលព្រមានថាវិសមភាពនឹងជំរុញឱ្យមនុស្សចំនួន ២៦៣លាននាក់បន្ថែមទៀតធ្លាក់ក្នុងភាពក្រីក្រខ្លាំង នៅដំណាច់ឆ្នាំ។
ជាងនេះទៅទៀត បើទោះបីប្រទេសបានទទួលចំណូលពន្ធដារទាបជាងធម្មតា ហើយក្រុមអ្នកមាន និងក្រុមហ៊ុនធំៗ កើនប្រាក់កាន់តែខ្លាំង ប្រទេសចំនួន១៤៣ក្នុងចំណោម១៦១នៅប្រទេសនៅលើពិភពលោក មិនបានបង្កើនការទារពន្ធពីក្រុមអ្នកមានខ្លាំងទេ។ ១១ប្រទេសបានថែមទាំងបន្ថយពន្ធឱ្យអ្នកមានផង។
ដោយគ្មានការភ្ញាក់ផ្អើល បើតាមOxfam ក្រុមប្រទេសជឿនលឿនដែលមានមធ្យោបាយនយោបាយសាធារណៈច្រើនក្នុងការលុបបំបាត់វិសមភាព ជាប់ចំណាត់ខ្ពស់ៗ នាំមុខគេបង្អស់ដោយ ន័រវែស និងបន្តដោយអូស្តា្រលី ប៊ែលហ្សិក និងកាណាដា។ បារាំងបានធ្លាក់ចំណាត់ថ្នាក់ពីលេខ៥ទៅលេខ១២ ដោយមកពីបន្ថយពន្ធពីក្រុមហ៊ុននិងអ្នកមាន តាំងពីឆ្នាំ២០១៩មក។ ចំណែកក្រុមប្រទេសក្រីក្រកំពុងអភិវឌ្ឍ ដែលកំពុងមានជម្លោះប្រដាប់អាវុធ ឬអស្ថិរភាពនយោបាយ ជាសិស្សអាក្រក់ជាងគេ ដោយមានស៊ូដង់ខាងត្បូងជាប់លេខចុងប៉ូចបំផុត ពីក្រោយប្រទេសនីហ្សេរីយ៉ា។ សកម្មភាពប្រយុទ្ធប្រឆាំងនឹងវិសមភាពបានធ្លាក់ចុះជាគំហុក ក្នុង១៨ប្រទេស ព្រមទាំងក្នុងដែនដីមួយចំនួន ជាក់ស្តែងគឺហុងកុង។ តែប្រទេសមានប្រាក់ចំណូលទាប ដូចយ៉ាងតាដជីគីស្ថាន និងប្រទេសមានចំណូលមធ្យមបួន មានសកម្មភាពប្រសើរឡើងក្នុងកាត់បន្ថយគម្លាតសង្គម។
អង្គការក្រៅរដ្ឋាភិបាល Oxfam បានអំពាវនាវឱ្យរដ្ឋាភិបាលផ្តើមសកម្មភាពជាបន្ទាន់ បើមិនចង់ខាតបង់នូវអ្វីបានប្រឹងប្រែងជាង១០ឆ្នាំកន្លងមក ដោយត្រូវបង្កើនចំណាយសាធារណៈសង្គម ដំឡើងពន្ធពីអ្នកមាន ការពារសិទ្ធិរបស់ពលករនិងធានាផ្តល់ប្រាក់ខែដែលអនុញ្ញាតឱ្យពួកគេបានរស់សមរម្យ លើបន្ទាត់នៃភាពក្រីក្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ