សង្គ្រាមអ៊ុយក្រែន៖សហគមអន្តរជាតិថ្កោសទោសរុស្ស៊ីថាបានប្រព្រឹត្តអំពើប្រល័យពូជសាសន៍
ក្រោយរុស្ស៊ីដកទ័ពពីរដ្ឋធានីកៀវ កាលពីថ្ងៃសៅរ៍, នៅថ្ងៃអាទិត្យម្សិលមិញ សហគមអន្តរជាតិនិងប្រទេសមហាអំណាចជាច្រើន បានចេញមុខថ្កោសទោសអំពើឃោរឃៅ និងថា រុស្ស៊ីប្រព្រឹត្តអំពើប្រល័យពូជសាសន៍ដែលត្រូវឲ្យតុលាការព្រហ្មទណ្ឌអន្តរជាតិកាត់ទោស។ ប្រតិកម្មរបស់សហគមអន្តរជាតិ បានធ្លាក់មកជាបន្តបន្ទាប់ គឺក្រោយពីបានឃើញរូបភាពដ៏ឃោរឃៅ និងទិដ្ឋភាពដ៏គួរឲ្យអាណោចអាធម្ម នៅតំបន់ដែលរុស្ស៊ីដកជម្លៀសកងទ័ពចេញ។
ចុះផ្សាយនៅថ្ងៃ៖
ស្តាប់ - ០៣:០០
«ប៊ូតឆា» ជាក្រុងមួយជិតនឹងក្រុងកៀវ ដែលទ័ពរុស្ស៊ីបានដកថយចេញ និងក្រុងមួយចំនួនទៀតនៅប៉ែកខាងជើងអ៊ុយក្រែន។ គឺនៅទីនេះហើយ តាមរូបថតរបស់អ្នកកាសែត គេឃើញ មនុស្សដេកស្លាប់រាយបាយតាមដងផ្លូវ។ ចំពោះអ៊ុយក្រែន ជាភាគីជម្លោះ ប្រធានាធិបតី Volodymyr Zelensky ចោទប្រកាន់ដោយពេញៗមាត់តែម្តងថា រុស្ស៊ីបានប្រព្រឹត្តអំពើឧក្រិដ្ឋកម្មប្រល័យពូជសាសន៍ មកលើពលរដ្ឋអ៊ុយក្រែន។ ថ្លែងប្រាប់ទូរទស្សន៍អាមេរិកាំង CBS ប្រមុខរដ្ឋអ៊ុយក្រែន Zelensky ថា ប្រជាជនក្នុងប្រទេសគាត់ មានសញ្ជាតិចម្រុះជាតិសាសន៍ ដល់ជាង១០០សញ្ជាតិ ដូច្នេះ ការកាប់សម្លាប់របស់រុស្ស៊ី គឺជាការកម្ទេចស្ទើរតែគ្រប់ជាតិសាសន៍លើពិភពលោក។ នេះជាអំពើឧក្រិដ្ឋកម្មប្រល័យពូជសាសន៍។
ចំពោះអង់គ្លេស ឃាតកម្មប្រព្រឹត្តិដោយយោធារុស្ស៊ីនេះ គឺរដ្ឋមន្ត្រីការបរទេសអង់គ្លេស Liz Truss បានទាមទារឲ្យតុលាការព្រហ្មទណ្ឌអន្តរជាតិ បើកការស៊ើបអង្កេតចំពោះបទល្មើសឧក្រិដ្ឋកម្មសង្គ្រាម។ ស្រដៀងគ្នានេះដែរ រដ្ឋមន្ត្រីការបរទេសអាមេរិក Antony Blinken បានហៅអំពើរបស់ទ័ពរុស្ស៊ីនៅអ៊ុយក្រែនថាជា ឧក្រិដ្ឋកម្មប្រឆាំងមនុស្សជាតិ និងអាចថា ឧក្រិដ្ឋកម្មប្រល័យពូជសាសន៍ ផង។
ប្រមុខការទូតបារាំង លោក Jean-Yves Le Drian ថាបារាំងក្នុងវេនជាប្រធានសហភាពអឺរ៉ុប នឹងធ្វើការជាមួយដៃគូប្រទេសជាមិត្ត របស់អឺរ៉ុប, សហការប្រទេសសេដ្ឋកិច្ចជឿនលឿនទាំង៧, សហការជាមួយអាជ្ញាធរអ៊ុយក្រែន និងតុលាការអន្តរជាតិ ជាពិសេសតុលាការព្រហ្មទណ្ឌអន្តរជាតិ ដើម្បីកុំឲ្យមាននីទ្ទណ្ឌភាព ហើយជនប្រព្រឹត្តល្មើសត្រូវកាត់ទោសនិងផ្តន្ទាទោស។ បន្ថែមលើរដ្ឋមន្ត្រីរបស់ខ្លួន ប្រធានាធិបតីបារាំង Emmanuel Macron ដែលបានឃើញរូបភាពដ៏តក់ស្លត់ គឺថា មិនអាចទទួលយកបាន និងថែមទាំងបានបញ្ជាក់ថា រដ្ឋអំណាចរុស្ស៊ីត្រូវតែទទួលខុសត្រូវចំពោះបទល្មើសឧក្រិដ្ឋដែលខ្លួនប្រព្រឹត្ត។
ប្រធានក្រុមប្រឹក្សាសហភាពអឺរ៉ុបលោក Charles Michel បរិហារពីភាពឃោរឃៅរបស់រុស្ស៊ី ដោយសរសេរលើទ្វីតធ័រថា លោករន្ធត់តក់ស្លុតចំពោះរូបភាពដ៏ឃោរឃៅដែលទាហានរុស្សីបានបង្កឡើង និងថា សហភាពអឺរ៉ុប និងអង្គការសង្គមស៊ីវិល នឹងប្រមូលភស្តុតាងដាក់ប្តឹងរុស្ស៊ីទៅតុលាការអន្តរជាតិ។
រីឯអគ្គលេខាធិការអង្គការសម្ព័ន្ធមិត្តអូតង់ លោក Jens Stoltenberg វាយតម្លៃថា ទង្វើឃោរឃៅនេះ មិនដែលកើតមាននៅអឺរ៉ុបឡើយនាប៉ុន្មានទសវត្សរ៍ចុងក្រោយនេះ។ តាមមន្ត្រីជាន់ខ្ពស់អូតង់រូបនេះ យោធារុស្ស៊ីយកពលរដ្ឋស៊ីវិលជាផ្ទាំងស៊ីប គឺ មិនអាចទទួលយកបានឡើយ។ សង្គ្រាមដ៏ព្រៃផ្សៃនេះត្រូវតែបញ្ចប់។
ចំណែក អធិការបតីអាល្លឺម៉ង់ លោក អូឡាហ្វ ស្ហុលស៍ (Olaf Scholz) ថា យើងត្រូវតែរកពន្លឺយុត្តិធម៌ចំពោះឧក្រិដ្ឋប្រព្រឹត្តដោយយោធារុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ