រុស្ស៊ីចោទអ៊ុយក្រែន ថាបានបាញ់មីស៊ីល កម្ទេចស្ថានីយ៍ស្តុកប្រេង ក្នុងទឹកដីរុស្ស៊ី
កាលពីព្រឹកថ្ងៃសុក្រ ទី១មេសា រុស្ស៊ីបានចោទថាកងទ័ពអ៊ុយក្រែន បានប្រើឧត្ថម្ភាគចក្រ បាញ់មីស៊ីលជាច្រើនគ្រាប់ ទៅលើស្ថានីយ៍ស្តុកប្រេងមួយនៅក្នុងទឹកដីរុស្ស៊ី។ រុស្ស៊ីអះអាងថាទង្វើរបស់អ៊ុយក្រែននេះ នឹងជះផលអាក្រក់ ទៅលើដំណើរការចរចាគ្នា រវាងអ៊ុយក្រែន និងរុស្ស៊ីជាក់ជាមិនខាន។ តែយ៉ាងណា រហូតដល់ល្ងាចថ្ងៃសុក្រ ភាគីអ៊ុយក្រែន បានបដិសេធមិនធ្វើអត្ថាធិប្បាយ ប្រកែក ឬទទួលស្គាល់ ថាខ្លួនបានវាយប្រហារនៅលើទឹកដីរុស្ស៊ី ពិតមែននោះទេ។
ចុះផ្សាយនៅថ្ងៃ៖
ស្តាប់ - ០២:៣៦
ទីស្តាំងស្តុកប្រេងឥន្ទនៈមួយកន្លែង នៅទីក្រុង Belgorod ដែលស្ថិតនៅចំងាយប៉ុន្មាន ៤០គីឡូម៉ែត្រ ពីព្រំដែនអ៊ុយក្រែន ត្រូវបានអគ្គីភ័យឆាបឆេះ នៅវេលាម៉ោង៦ទៀបភ្លឺ ថ្ងៃសុក្រ ទី១មេសា។ អគ្គីភ័យនេះ បានបង្កឡើងដោយគ្រាប់មីស៊ីល ជាច្រើនគ្រាប់ បាញ់ចេញពីឧត្ថម្ភាគចក្រចំនួន២គ្រឿង ដែលរុស្ស៊ីចោទថា ជារបស់កងទ័ពអ៊ុយក្រែន។ នេះបើផ្អែកតាមការបង្ហោះសារ នៅលើតេឡេក្រាម របស់លោកអភិបាលតំបន់នេះ។
នៅក្នុងសារមួយទៀត បានសរសេរថា ហេតុការណ៍នេះ បានបង្កឲ្យបុគ្គលិកស្ថានីយ៍ស្តុកប្រេងឥន្ធនៈចំនួន២នាក់ រងរបួស។ ក្រសួងគ្រប់គ្រងគ្រោះមហន្តរាយរុស្ស៊ី បានបង្ហោះផ្សាយវីដេអូ ក្រុមពន្លត់អគ្គីភ័យ មានគ្នាប្រមាណ១៧០នាក់ កំពុងព្យាយាម ពន្លត់ភ្លើងយ៉ាងលំបាកលំបាក។ ដោយឡែក ប្រភពពីប្រធានក្រុមហ៊ុនមួយ ដែលមានទីតាំងនៅក្នុងតំបន់Belgorod ដែរ បានអះអាងថា ទីតាំងខ្លួន ក៏បានរងគ្រាប់មីស៊ីលបាញ់ចេញពីឧត្ថម្ភាគចក្ររបស់អ៊ុយក្រែនដែរ។ នៅតាមបណ្តាញសង្គមវិញ គេឃើញមានការចែកចាយវីដេអូ ដែលគេអះអាងថាថតបានក្នុងពេលកើតហេតុ ដោយឃើញមីស៊ីលបាញ់ចេញពីឧត្ថម្ភាគចក្រ ហើយបណ្តាលឲ្យមានអគ្គីភ័យផ្ទុះឆាបឆេះ។
គួររំលឹកថា កាលពីថ្ងៃទី២៥ កុម្ភៈ បណ្តាញព័ត៌មានរុស្ស៊ី និងអ៊ុយក្រែន ធ្លាប់បានផ្សាយថា កងទ័ពអ៊ុយក្រែន បានវាយប្រហារទៅលើមូលដ្ឋានទ័ពអាកាសរបស់រុស្ស៊ី នៅទីក្រុង Rostov។ តែយ៉ាងណាគ្មានការបញ្ជាក់ណាមួយ ជាផ្លូវការទេ ពីសំណាក់ភាគីទាំងសងខាង។ សម្រាប់លើកនេះ បើដូចអ្វីដែលភាគីរុស្ស៊ីបានអះអាងមែន គឺថានេះជាលើកដំបូងហើយ ដែលកងទ័ពអ៊ុយក្រែន បើកការវាយប្រហារ នៅលើទឹកដីរុស្ស៊ី បើគិតចាប់ពីថ្ងៃដែលរុស្ស៊ី បានលើកទ័ពឈ្លានពានអ៊ុយក្រែន។
ដោយឡែក កាលពីថ្ងៃពុធ គេសង្កេតឃើញមានករណីផ្ទុះ នៅទីតាំងស្តុកគ្រាប់រំសេវមួយកន្លែង នៅក្នុងទីក្រុង Belgorod របស់រុស្ស៊ីនេះដែរ។ តែអាជ្ញាធររុស្ស៊ី មិនបានបញ្ជាក់ពីមូលហេតុទេ។ ក្រុងនេះស្ថិតនៅចំងាយប្រមាណ៨០គូឡូម៉ែត្រពីក្រុងការគីវរបស់អ៊ុយក្រែ។
យ៉ាងណាក៏ដោយ ទីភ្នាក់ងារព័ត៌មានបរទេស មិនអាចមានលទ្ធភាពទទួលបានប្រភពឯករាជ្យ មកបញ្ជាក់បានទេ ថាវាពិតជាស្នាដៃរបស់កងទ័ពអ៊ុយក្រែន។ នៅរសៀលថ្ងៃសុក្រ លោក Dmytri Kouleba រដ្ឋមន្ត្រីការបរទេសអ៊ុយក្រែន បានប្រាប់អ្នកយកព័ត៌មានបារាំងថា លោកមិនអាចបដិសេធ ហើយក៏មិនអាចទទួលស្គាល់ថា អ៊ុយក្រែនមានពាក់ព័ន្ធនឹងករណីនេះឬអត់ទេ ព្រោះលោកមិនមានធាតុផ្សំព័ត៌មានគ្រប់គ្រាន់ មកបញ្ជាក់ឡើយ។ ដូចគ្នាដែរ លោក Oleksandre Motouzianyk អ្នកនាំពាក្យក្រសួងការពារជាតិអ៊ុយក្រែន ក៏បានប្រកែកមិនឆ្លើយដែរ ដោយគ្រាន់តែបានលើកឡើងថា អ៊ុយក្រែនគ្មានរឿងអ្វីទៅប្រកាសទទួលខុសត្រូវ ចំពោះការវាយប្រហារខុសទិសដៅ ឬ គ្រោះថ្នាក់កើតឡើង បណ្តាលមកពីកំហុសបច្ចេកទេសណាមួយ នៅក្នុងទឹកដីរុស្ស៊ី នោះទេ។
វិមានក្រេមឡាំង បានអះអាងថា ហេតុការណ៍វាយប្រហារមកលើស្ថានីយ៍ប្រេងរុស្ស៊ី ពីសំណាក់កងទ័ពអ៊ុយក្រែននេះ នឹងប្រាកដជាជះផលអាក្រក់ ទៅលើការចរចា។ ការចរចា ដែលបានចាប់ផ្តើមធ្វើឡើងវិញ ពីចំងាយ រវាងភាគីអ៊ុយក្រែន និងរុស្ស៊ី កាលពីថ្ងៃសុក្រ ទី១មេសា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ