Titanខ្សែភាពយន្តបារាំងបែបរន្ធត់ហិង្សា ទទួលរង្វាន់តាល់ប័ត្រមាស ក្នុងមហោស្រពកានទី៧៤
មហោស្រពអន្តរជាតិកាន លើកទី៧៤ បានបង្កើតភាពភ្ញាក់ផ្អើល ដោយបានប្រគល់រង្វាន់ធំរបស់មហោស្រព ទៅឲ្យអ្នកដឹកនាំរឿងកុនបែបហិង្សា រន្ធត់ញាប់ញ័រ។ នៅក្នុងពិធីបិទមហោស្រពភាពយន្ត កាលពីយប់ថ្ងៃសៅរ៍ទី ១៧ កក្កដា ២០២១។ គណៈមេប្រយោគរបស់មហោស្រពកាន ដែលមានអ្នកដឹកនាំរឿងអាមេរិកាំង លោកSpike Lee ជាប្រធាន បានសម្រេចប្រគល់រង្វាន់តាល់ប័ត្រ មាស ទៅឲ្យរឿង Titan ដឹកនាំដោយលោកស្រីសមិទ្ធិករបារាំង Julia Ducournau (ហ្សុយលីយ៉ា ឌុយគួរណូ)។ ចំណែកអ្នកដឹកនាំរឿងថៃ លោកអភិឆាត់ភង់ វរសេដ្ឋាគល់បានទទួលរង្វាន់គណៈមេប្រយោគ សម្រាប់ខ្សែភាពយន្តរបស់លោករឿង Memoria។ រឿងHero របស់អ្នកដឹកនាំរឿងអ៊ីរ៉ង់វិញ បានទទួលរង្វាន់ Grand Prix របស់មហោស្រព។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
ក្នុងវ័យ ៣៧ឆ្នាំ លោកស្រី Julia Ducournau ជាអ្នកដឹកនាំរឿងក្មេងជាងគេបង្អស់ ក្នុងចំណោមអ្នកដឹកនាំរឿង ដែលនាំយកខ្សែភាពយន្តមកប្រកួតសម្រាប់ដណ្តើមរង្វាន់តាល់ប័ត្រមាស។ លោកស្រីជាអ្នកដឹកនាំរឿង ស្រីទី ២ បន្ទាប់ពីអ្នកដឹកនាំអាមេរិកាំង Jane Campion ស្រ្តីដំបូងគេដែលបានទទួលរង្វាន់ តាល់ប័ត្រមាសពីមហោស្រពកាននៅឆ្នាំ ១៩៩៣ សម្រាប់រឿង The Piano។
ដោយប្រគល់តាល់ប័ត្រមាសទៅឲ្យស្នាដៃកុន ប្រភេទ ព្រឺព្រួច ហិង្សា ញាប់ញ័ររន្ធត់ គណៈមេប្រយោគរបស់មហោស្រពកាន បានប្តូរផ្តត់គំនិតចាស់របស់មហោស្រពដែលមានទម្លាប់ផ្តល់រង្វាន់ធំសម្រាប់ខ្សែភាពយន្តបែបមនោសញ្ជេតនា រឿងសង្គមបែបធម្មតា ដែលមិនព្រឺព្រួច ហិង្សា ចាក់សម្លាប់គ្នាឆៅៗ ដូចជារឿង Titan នោះទេ។ រឿងTitan មានគ្រប់រសជាតិ ទាំងអស់នេះ។
អ្នកដឹកនាំរឿង បារាំង លោកស្រី Julia Ducournau ក្នុងសំឡេងអួលដើមក ដោយសារក្តីរំភើបខ្លាំងបានថ្លែងអំណរគុណ គណៈមេប្រយោគ ជាពិសេស លោកប្រធាន Spike Lee សម្រាប់ការបើកទ្វារឲ្យសត្វចម្លែក ចូល ក្នុងពិភពមហោស្រពភាពយន្តកាន។
នៅពេលសមិទ្ធិករ និងតារាភាពយន្ត ដែលបានទទួលរង្វាន់ របស់មហោស្រព រំភើប អរ ថ្លែងអំណរគុណមិនឈប់ ដល់គណៈមេប្រយោគ និងក្រុមការងារថតកុនរបស់ខ្លួន អ្នកដឹកនាំរឿង ជាតិថៃ លោកអភិឆាតភង់ វីរៈសេដ្ឋាគល់ បានឆ្លៀត រំលឹកអ្នកមានវត្តមាននៅក្នុងមហោស្រពភាពយន្តកាន ពីស្ថានភាពកូវីដ នៅប្រទេសកូឡុំប៊ូ ជាទីដែលលោកបានថតរឿង Memoria និងនៅប្រទេសថៃ ប្រទេសកំណើតរបស់លោក។ សម្រាប់អ្នកដឹកនាំរឿង ស្ថានភាពកូវីដនៅប្រទេសទាំងពីរ កំពុងធ្លាក់ដាបខ្លាំងណាស់។ សមិទ្ធិករថៃ ដែលបានទទួលរង្វាន់ គណៈមេប្រយោគ សម្រាប់រឿង Memoria បានអំពាវនាវដល់រដ្ឋាភិបាលរបស់ប្រទេសទាំងអស់ ដែលមានស្ថានភាពដូចប្រទេសថៃ និងកូឡុំប៊ី ភា្ញក់ដឹងខ្លួនឡើង និងធ្វើការដើម្បីប្រជាជនរបស់ខ្លួន នៅពេលនេះ។ សុន្ទរកថា ដ៏រំជួលចិត្តរបស់សមិទ្ធិករថៃត្រូវបានអ្នកចូលរួមទះដៃគាំទ្រ ពេញរោងភាពយន្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ