ជំងឺកូវីដ១៩៖ អ្នកជំនាញពេទ្យបារាំងអំពាវនាវឲ្យផ្តល់វីតាមីន D ដល់ប្រជាជន
តើវីតាមីន D នឹងជួយប្រយុទ្ធប្រឆាំងនឹងជំងឺកូវីដ១៩ដែរឬទេ? វីតាមីនD នឹងមិនអាចទៅជំនួស វ៉ាក់សាំង បង្ការជំងឺកូវីដបាននោះទេ។ ប៉ុន្តែ ក្នុងកាលៈទេសៈ ដែលគេគ្មានថ្នាំព្យាបាល ជំងឺកូវីដ ហើយ យុទ្ធនាការចាក់វ៉ាក់សាំង ត្រូវយឺតយ៉ាវ ដោយសារតែក្រុមហ៊ុនផលិតវ៉ាក់សាំង ពន្យារពេល អ្នកជំនាញពេទ្យបារាំង មួយក្រុមបានដាក់ញត្តិ អំពាវនាវឲ្យគេផ្តល់វីតាមីន D សម្រាប់ប្រជាជនបារាំងជាទូទៅ។ សម្រាប់អ្នកជំនាញបារាំងដែលជាម្ចាស់ញត្តិ វីតាមីន Dមានប្រសិទ្ធភាព ជួយកាត់បន្ថយ ការបង្ករោគ អាំងហ្វិចស្យុង ដែលបង្កឡើងដោយជំងឺកូវីដ ១៩។
ចុះផ្សាយនៅថ្ងៃ៖
ស្តាប់ - ០២:៣៩
នៅ សប្តាហ៍មុន គ្រូពេទ្យ និងអ្នកជំនាញសុខភាពបារាំង ចំនួន ៧៣នាក់ បានដាក់ញត្តិស្នើឲ្យគេផ្តល់វីតាមីនD ដល់ប្រជាជនបារាំង ជាទូទៅ ជាពិសេស មនុស្សចាស់ ដែលជាក្រុមមនុស្សងាយនឹងរងគ្រោះថ្នាក់ ស្លាប់ ដោយសារជំងឺកូវីដ។ សម្រាប់ក្រុមគ្រូពេទ្យដែលជាម្ចាស់ញត្តិ វីតាមីន D អាចជួយកាត់បន្ថយ ការបង្ករោគ Infection បង្កឡើងមេរោគកូវីដ ជួយកាត់បន្ថយគ្រោះថ្នាក់ធ្លាក់ខ្លួនឈឺធ្ងន់ធ្ងរ ឬស្លាប់ ដោយសារ ជំងឺកូវីដ ១៩។ ក្រុមគ្រូពេទ្យបារាំង បានពឹងផ្អែកលើការសិក្សាសង្កេតមួយចំនួនដែលថា នៅក្នុងចំណោមមនុស្សចាស់ដែលបានទទួលវីតាមីនD ទៀងទាត់ ហានិភ័យ ធ្វើឲ្យពួកគាត់ធ្លាក់ខ្លួនឈឺធ្ងន់ធ្ងរ ដោយសារកូវីដ ត្រូវកាត់បន្ថយ ដល់ទៅ ៩០ភាគរយ។
ការសិក្សាកន្លងមករបស់ក្រុមគ្រូពេទ្យអេស្ប៉ាញ បានបង្ហាញថា នៅក្នុងចំណោមអ្នកជំងឺកូវីដ១៩ជាតិអេស្ប៉ាញ ដែលគេជ្រើសរើសយកមកសិក្សា មានដល់ទៅ ៨២,២% ដែលមានបញ្ហាខ្វះវីតាមីនD ពោលគឺក្រោម ១៣,៨% (២០,៩% ជាកំរិតធម្មតា) ទល់នឹង៤៧,៧%សម្រាប់ប្រជាពលរដ្ឋទូទៅ។ ការសិក្សាមួយទៀតបានសន្និដ្ឋានថា កង្វះវីតាមីនD ទំនងជា បានបង្កើនហានិភ័យ១៥%បន្ថែម ធ្វើឱ្យអ្នកជំងឺ កូវីដ១៩ធ្លាក់ខ្លួនឈឺធ្ងន់ធ្ងរ និងបង្កើនគ្រោះមរណៈ លើសអ្នកជំងឺកូវីដ១៩ ដែលមានវីតាមីនD គ្រប់គ្រាន់។
នៅបណ្តាប្រទេសអឺរ៉ុប ជាពិសេស នៅប្រទេសបារាំង ប្រជាជនពាក់កណ្តាលជូបបញ្ហា ខ្វះវីតាមីន D ដោយសារខ្វះពន្លឺថ្ងៃ នៅរដូវត្រជាក់ (យប់មានរយៈពេលវែងជាងថ្ងៃ)។
សម្រាប់វេជ្ជបណ្ឌិតបារាំង លោក Cédric Annweiler ប្រធានផ្នែកព្យាបាលមនុស្សចាស់ នៅមន្ទីរពេទ្យ Angers វីតាមីនD មានសារធាតុសំខាន់ជួយ ធ្វើឲ្យប្រព័ន្ធភាពស៊ាំក្នុងខ្លួនមនុស្សដំណើរការល្អ។ វីតាមីនមិនអាចជំនួស វ៉ាក់សាំង ឬ ព្យាបាលអ្នកជំងឺកូវីដ ឲ្យជាសះស្បើយ នោះទេ ប៉ុន្តែ បើសិនវីតាមីនD អាចជួយពង្រឹងភាពស៊ាំ ដែលដើរតួនាទី ចាំបាច់ សម្រាប់ទប់ទល់មេរោគកូវីដ នោះ គេមិនត្រូវមើលរំលងពីសារៈប្រយោជន៍របស់វានោះទេ។
នៅក្នុងសេចក្តីថ្លែងការណ៍ កាលពីពាក់កណ្តាលឆ្នាំ មុនរដ្ឋបណ្ឌិតសភាវេជ្ជសាស្ត្របារាំង បានបញ្ជាក់ហើយថា វីតាមីនD ពិតជាអាចមានសកម្មភាពលើដំណើរការរបស់ប្រព័ន្ធភាពស៊ាំ និងមានតួនាទីសម្របសម្រួល លុបបំបាត់ការរោលរលាកខ្លាំងcytokinesដែលជាដើមហេតុជំរុញឱ្យអ្នកជំងឺកូវីដ១៩ធ្លាក់ខ្លួនឈឺធ្ងន់ធ្ងរខ្លាំងនិងស្លាប់មែន។ ប៉ុន្តែរដ្ឋបណ្ឌិតសភាវេជ្ជសាស្ត្រ មិនបានចាត់ទុក និងណែនាំឱ្យប្រើ វីតាមីនដេ ជាកិច្ចការពារ ឬថ្នាំព្យាបាលជំងឺកូវីដ១៩ទេ។ នៅថ្ងៃព្រហស្បតិ៍ គ្រូពេទ្យ Jérémy Descoux ស្ថាបនិកក្រុមប្រឆាំង ព័ត៌មានមិនពិតទាក់ទងនឹងការប្រើថ្នាំ បាននិយាយក្រើនរំលឹកឲ្យគេប្រុងប្រយ័ត្ន ព្រោះថា ការជ្រួលជ្រើម ប្រើប្រាស់ វីតាមីនD ច្រើនហួស កម្រិតនឹងបង្កឲ្យមានបញ្ហាសុខភាព ជាពិសេស ក្នុងចំណោមកុមារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ