តើវីតាមីនសេ (Vitamine C) ពិតជាអាចការពារនិងព្យាបាលជំងឺកូវីដ១៩មែនឬ ?
ចុះផ្សាយនៅថ្ងៃ៖
ស្តាប់ - ០៩:៤៤
តាំងពីកូវីដ១៩បានផ្ទុះឡើង មានពាក្យចចាមអារាម និងព័ត៌មានគ្រប់បែបយ៉ាង ខ្លះពិត ខ្លះមិនពិត ទាក់ទងនឹងវិធីការពារនិងព្យាបាល ជាច្រើន បង្ហោះផ្សាយតាមប្រព័ន្ធសង្គម។ នៅក្នុងចំណោមនោះ មានការផ្សព្វផ្សាយមួយ បានអះអាង ថាវីតាមីនសេ (Vitamine C)អាចកម្ចាត់ជំងឺកូវីដ១៩បាន។ តើជាព័ត៌មានពិតឬយ៉ាងណា ? តើ វីតាមីនសេជាអ្វី ? និងត្រូវប្រើប្រាស់យ៉ាងដូចម្តេច ?
ពុំទាន់មានទេថ្នាំព្យាបាល និងថ្នាំបង្ការ ជំងឺកូវីដ១៩ ដែលបង្កឡើងដោយមេរោគកូរ៉ូណាថ្មី Sars-CoV-2។ អ្នកវិទ្យាសាស្ត្រ កំពុងសាកល្បងថ្នាំជាច្រើនមុខ។ សូម្បីតែថ្នាំអ៊ីដ្រូស៊ីក្លរ៉ូគីន ឬក្លរ៉ូគីន ដែលគេស្គាល់ច្បាស់ថាជាថ្នាំព្យាបាលជំងឺគ្រុនចាញ់ និងដែលបានឆ្លងកាត់ការសាកល្បងនៅចិននិងនៅបារាំងដោយសាស្ត្រាចារ្យ រ៉ាអ៊ូល បានទទួលលទ្ធផលវិជ្ជមានក៏ដោយ ក៏អ្នកវិទ្យាសាស្ត្រនៅប្រទាញប្រទង់គ្នាខ្លាំងនៅឡើយ។ ថ្នាំនេះមិនទាន់អាចចាត់ទុកបានថាជាថ្នាំព្យាបាលជំងឺកូវីដ១៩ដែរ។ ឯចំណែកវីតាមីនសេ ក៏ដូចគ្នា។ មកទល់ពេលបច្ចុប្បន្នេះ គ្មានការសិក្សាណាមួយស្តីពីការព្យាបាលជំងឺកូវីដ១៩ ដោយថ្នាំវីតាមីនសេ តែឯងទេ។
ពាក្យចចាមអារាមទាក់ទងនឹងការប្រើថ្នាំវីតាមីសេ បានចាប់លាន់ឮឡើងខ្លាំងកាលពីដើមខែមីនា តាមរយៈខ្សែអាត់វីដេអូមួយរបស់គ្រូពេទ្យអាមេរិក ដើមកំណើតចិន លោក រីឆា ចេង Richard Cheng ដែលបានលើកឡើងថា មានស្ត្រីអ្នកជំងឺកូវីដ១៩ចិនម្នាក់ ចំណាស់៧១ឆ្នាំ នៅវូហាន បានជាសះស្បើយពីជំងឺ និងមិនចម្លងទៅមេរោគទៅដល់ក្រុមគ្រួសារសោះ បន្ទាប់ពីបានទទួលទានថ្នាំវីតាមីនសេ ក្នុងកំរិតដូសដ៏ច្រើនលើសលុប ដោយបូកផ្សំជាមួយថ្នាំព្យាបាលជាច្រើនមុខផ្សេងទៀត។ បើតាមវេជ្ជបណ្ឌិតចេង ក្នុងអំឡុងពេលសម្រាកនៅមន្ទីរពេទ្យ ស្ត្រីចិននោះទទួលថ្នាំវីតាមីនសេ ចំនួនជិត ១០ក្រាម ក្នុងមួយថ្ងៃ ពោលគឺជាង៩០ដងច្រើនជាងកំរិតអនុញ្ញាត។ ចំណែកកូនស្រីរបស់ស្ត្រីនោះ ក៏បានប្រើវីតាមីនសេ ពីរដងច្រើនជាងម្តាយទើបមិនឆ្លងមេរោគកូរ៉ូណាថ្មីសោះ។
នៅក្នុងការផ្សព្វផ្សាយថ្មីមួយទៀត វេជ្ជបណ្ឌិតអាមេរិកកាត់ចិនដដែលនេះ បានពន្យល់ថាក្រុមអ្នកជំនាញសុខភាពចិន បានចេញសេចក្តីសន្និដ្ឋានថាការប្រើថ្នាំវីតាមីនសេ ក្នុងបរិមាណដ៏ខ្ពស់ខ្លាំង អាចមានប្រសិទ្ធភាពព្យាបាលជំងឺកូវីដ១៩ ដែលមានទម្រង់ស្រាលនិងធ្ងន់។ គ្រូពេទ្យរូបនោះបានអះអាងទៀតថា មានអ្នកជំងឺជាង៥០នាក់ នៅសៀងហៃ បានជា បន្ទាប់ពីបានទទួលការព្យាបាលដោយការចាក់ថ្នាំវីតាមីនសេ តាមសរសៃ។ ប៉ុន្តែគេពុំអាចផ្ទៀងផ្ទាត់ព័ត៌មាននេះបានទេ។
គំនិតចង់យកវីតាមីនសេ មកប្រើដើម្បីប្រយុទ្ធប្រឆាំងនឹងមេរោគ មិនចម្លែក និងមិនថ្មីទេ ពីព្រោះវីតាមីនសេ អាចជួយពង្រឹងប្រព័ន្ធការពារខ្លួន។ ប៉ុន្តែមកទល់ពេលនេះ គ្មានអ្វីដែលអាចបញ្ជាក់បានថាវីតាមីនសេ អាចព្យាបាលជំងឺកូវីដ១៩បានឡើយ។ វិទ្យាស្ថានប៉ាស្ទ័របារាំង បានរំលឹកថា គ្មានការសិក្សាតាមបែបវិទ្យាសាស្ត្រណាមួយ ត្រូវសម្រេចទទួលស្គាល់ជាផ្លូវការទេ ហើយក៏ពុំទាន់មានព័ត៌មានអ្វីគ្រប់គ្រាន់ ឬគំនិតអ្វីសមស្របសម្រាប់សន្និដ្ឋាននិងវាយតម្លៃ លើសម្មតិកម្មព្យាបាលកូវីដ១៩ដោយប្រើវីតាមីនសេ ដែរ។
បើតាមទស្សនាវដ្តី Science et Avenir របស់បារាំង មានការធ្វើតេស្តសាកល្បងលើអ្នកជំងឺជាង២០០នាក់នៅចិន ក្នុងចន្លោះពីចុងខែមករា ដល់ចុងខែកុម្ភៈ ដើម្បីស្វែងរកថ្នាំព្យាបាលជំងឺកូវីដ១៩។ នៅក្នុងចំណោមនោះ មានអ្នកជំងឺខ្លះទទួលការព្យាបាលសាកល្បងដោយថ្នាំវីតាមីនសេមួយមុខដែរ។ តែគេត្រូវរង់ចាំរហូតដល់ខែកញ្ញាយ៉ាងឆាប់ទើបអាចមានលទ្ធផល។
នៅសហរដ្ឋអាមេរិក ដោយសារស្ថានភាពធ្ងន់ធ្ងរ បន្ទាន់ខ្លាំង និងដោយមិនរង់ចាំលទ្ធផលសិក្សាសាកល្បង មន្ទីរពេទ្យនៅរដ្ឋញូវយ៉ក បានចាប់ផ្តើមចាក់ថ្នាំវីតាមីនសេ ក្នុងកំរិតដូសខ្ពស់ខ្លាំងលើអ្នកជំងឺដែលស្ថិតក្នុងស្ថានភាពសង្គ្រោះបន្ទាន់ ក្នុងក្របខ័ណ្ឌនៃការព្យាបាលដកពិសោធន៍ដូចអ្វីដែលមន្ទីរពេទ្យសៀងហៃបានធ្វើលើអ្នកជំងឺកូវីដ១៩។ នេះបើតាមសម្រង់សារព័ត៌មានញូវយ៉កប៉ុស្តិ៍។ គ្រូពេទ្យទទួលបន្ទុកព្យាបាលផ្នែកកូវីត បានប្រកាសថាមានអ្នកជំងឺខ្លះបានទទួលថ្នាំវីតាមីនសេ បន្ថែមពីលើការព្យបាលដោយថ្នាំអ៊ីដ្រូស៊ីក្លរ៉ូគីន និងថ្នាំផ្សះអាស្ហ៊ីត្រូមីស៊ីន Azithromycine។
ជាសរុបមក វីតាមីនសេ មិនមែនជាថ្នាំព្យាបាលជំងឺកូវីដ១៩ទេ។ អ្នកវិទ្យាសាស្ត្រាសុខាភិបាល ក៏មិនណែនាំដល់សាធារណជនទូទៅ ឱ្យទទួលទានវីតាមីនសេ ដើម្បី ការពារខ្លួនពី កូរ៉ូណាវីរុសដែរ។ លោកអ្នកអាចទទួលទាន វីតាមីនសេ ដើម្បីពង្រឹងប្រព័ន្ធការពារខ្លួន ជាប្រចាំ តាមទម្លាប់របស់អ្នកបាន ប៉ុន្តែសូមប្រយ័ត្ន សូមកុំលេបថ្នាំវីតាមីនសេ ឱ្យលើសពី ១១០មីល្លីក្រាមក្នុងមួយថ្ងៃឱ្យសោះ។ ហាមដាច់ខាតមិនឱ្យលេបថ្នាំវីតាមីនសេ ក្នុងបរិមាណខ្ពស់ ដោយគ្មានវេជ្ជបញ្ជា និងការតាមដានរបស់គ្រូពេទ្យ។ វីតាមីនសេ ក៏ដូចជាថ្នាំផ្សេងទៀត សុទ្ធតែអាវុធមុខពីរ អាចផ្តល់ផលអាក្រក់ដល់សុខភាពវិញ បើយើងប្រើប្រាស់មិនត្រឹមត្រូវ។
តើវីតាមីនសេ (Vitamine C) ជាអ្វី ?
វីតាមីនសេ ជាអង់ទីអុកស៊ីដង់ ជាសារធាតុប្រឆាំងនឹងស្ត្រេស ប្រឆាំងនឹងការនឿយហត់។ វីតាមីនសេ គឺជាអង់ទីអុកស៊ីដង់ដ៏ប្រពៃបំផុតមួយ ដែលអាចប្រយុទ្ធប្រឆាំងនឹងភាពចាស់ជរារបស់កោសិកា។ ឧស្សាហកម្មចំណីអាហារ ប្រើវីតាមីនសេនេះច្រើនណាស់ ដើម្បីជាជំនួយខាងផ្នែករក្សាទុកបានយូរ ក្រោមឈ្មោះថាបច្ចេកទេស ថា អាស៊ីត អាស្កប៊ិច Acide Ascorbique ឬជាអក្សរកូដសម្ងាត់ដែលចាប់ផ្តើមដោយE300។ សមត្ថភាពផ្នែករក្សាទុករបស់វីតាមីនសេ ក៏មានឃើញប្រើ ជាលក្ខណៈគ្រួសារ ក្បួនបូរាណរបស់មនុស្សចាស់ ដូចជា ច្របាច់ក្រូចឆ្មា លើបន្លែ ឬផ្លែឈើ ចិតសំបករួច ដើម្បីកុំឱ្យឆាប់ខ្មៅ។ នេះហើយជាតួនាទី និងប្រយោជន៍មួយរបស់វីតាមីនសេ ដែលមិនត្រឹមតែជាអង់ទីអង់ស៊ីដង់ទេ តែក៏ជាអង់ទីអ៊ុកស៊ីតទៀត។
ចំពោះមនុស្សវិញ កង្វះវីតាមីន អាចស្តែងឱ្យដឹងបាន ដរាបណាយើងទទួលទាន(អាហារមាន) វីតាមីសេតិចជាង១០មីល្លីក្រាមក្នុងមួយថ្ងៃ។ រោគសញ្ញាដែលអាចសម្គាល់បានថាមនុស្សម្នាក់ជួបគ្រោះខ្វះសារជាតិវីតាមីនសេ មានជាអាទិ៍ ការសន្តកជើងធ្មេញ អញ្ចាញហើមខ្ទុះ មានហូរឈាម និងបើកាន់តែធ្ងន់ធ្ងរអាចបង្កឱ្យស្លាប់។ ប៉ុន្តែមនុស្សសម័យបច្ចុប្បន្ន មិនថានៅក្នុងប្រទេសជឿនលឿន និងប្រទេសកំពុងអភិវឌ្ឍន៍ កម្រមានករណីខ្វះជាតិ វីតាមីនសេ ណាស់។
វីតាមីនសេ មិនមែនមានតែនៅក្នុងថ្នាំទេ។ វីតាមីនសេ មាននៅក្នុងធម្មជាតិ ក្នុងស្ទើរគ្រប់បន្លែ និងផ្លែឈើ ឆៅ។ ខ្លួនប្រាណមនុស្ស មិនចេះស្តុកវីតាមីនសេទុកទេ ហើយក៏មិនចេះផលិតវីតាមីនដែរ។ មានតែការទទួលទានអាហារម្យ៉ាងគត់ ដែលជាប្រភពផ្តល់វីតាមីនសម្រាប់ទៅចិញ្ចឹមរាងកាយជាប្រចាំ។ ដើម្បីទ្រទ្រង់សុខភាពរាងកាយឱ្យមានរឹងមាំ សូមផ្តល់វីតាមីនសេឱ្យបាន២០០មីល្លីក្រាមក្នុងមួយថ្ងៃ។
បន្លែផ្លែឈើ ដែលមានផ្ទុកវីតាមីនសេ ច្រើនជាងគេនៅប្រទេសកម្ពុជា គឺ ផ្លែត្របែក (ត្របែកមួយខាំផ្តល់វីតាមីនសេ ដល់ទៅ ២៤០មីល្លីក្រាម) និងម្ទេសប្លោកបារាំងពណ៌ក្រហម (មួយខាំផ្តល់១៦៥មីល្លីក្រាម) និងបន្តបន្ទាប់មកមានដូចជាផ្កាស្ពៃខៀវ ប្រូកូលី ស្ពៃក្តោបខៀវ ឬផ្លែគីវី និងពពួកផ្លែក្រូច។ ជាឧទាហរណ៍ជាក់ស្តែង ក្នុងមួយថ្ងៃ យើងទទួលទានផ្លែឈើស្រស់ពីរផ្លែ (ចេកមួយ ប៉ោមមួយ ឬក្រូចមួយ ត្រសក់ស្រូវមួយជ្រុង) និងបន្លែឆៅពីរបីមុខ សាលាដ ត្រសក់ ប៉េងបោះ ជីរ... គឺគ្រប់គ្រាន់សម្រាប់ផ្គត់ផ្គង់វីតាមីនសេដល់ខ្លួនប្រាណហើយ។
ដោយសារតែគុណប្រយោជន៍ដ៏មហាសាលរបស់វីតាមីនសេ បានមនុស្សទូទៅ មិនថានៅសុក្រក្តៅ សុ្រកត្រជាក់ ប្រទេសជឿនលឿនឬក្រីក្រកំពុងអភិវឌ្ឍន៍ទេ តែស្វែងរកថ្នាំ វីតាមីនសេ ជាគ្រាប់ថ្នាំមកលេបជាជំនួយសុខភាព ខ្លាចក្រែងចំណីអាហារដែលយើងទទួលផ្តល់វីតាមីនសេមិនគ្រាន់។ ក្តៅខ្លួន មានអារម្មណ៍នឿយហត់ ចង់ផ្តាសាយ និងក្នុងបរិបទនៃវិបត្តិកូវីដ១៩ គេក៏នឹកឃើញភ្លាម ចង់ទៅបៀម ឬលេបថ្នាំវីតាមីនសេ។ ប៉ុន្តែសូមប្រយ័ត្ន វីតាមីនសេ ឬ ឡារូស្កូបីន ដែលគេស្គាល់ខ្លាំងនៅប្រទេសកម្ពុជា ជាថ្នាំ។
ឡារ៉ូស្កូប៊ីន ឬ អាស៊ីត អាស្កប៊ិច ឬវីតាមីនសេ មានឈ្មោះច្រើនហៅផ្សេងៗ ទៅតាមម៉ាករបស់ក្រុមហ៊ុនឱសថសាស្ត្រ ខ្លះជាថ្នាំគ្រាប់សម្រាប់លេប បៀម គ្រាប់ដាក់ទឹកពុះ ឬជាថ្នាំចាក់ ជាថ្នាំដែលលក់ដាច់ជាងគេនៅលើពិភពលោក។ ទីផ្សារលក់ថ្នាំវីតាមីនសេ មានទំហំដល់៤០ពាន់លានដុល្លារក្នុងមួយឆ្នាំ ៗ ប៉ុន្តែតាមការពិតទៅនោះថ្នាំវីតាមីនសេ មិនអាចផ្តល់គុណប្រយោជន៍ពិត ដូចដែលគ្រប់គ្នាយល់ឃើញនោះទេ។ ការទទួលទានថ្នាំវីតាមីនសេ ច្រើនហួសចំណុះពេក មិនល្អទេ។ ទទួលទានថ្នាំវីតាមីនសេ ច្រើនជ្រុល អាចនឹងធ្វើឱ្យមានផលប៉ះពាល់ជាច្រើន ដូចជាមានរោគរាករូស ឬមានគ្រួសក្នុងតម្រងនោម។ សរីរាង្គកាយមនុស្សយើង ត្រូវការយ៉ាងច្រើនបំផុតជីវជាតិវីតាមីនសេ ២០០មីល្លីក្រាម ក្នុងមួយថ្ងៃ ទោះបីជាយើងឈឺក៏ដោយ។ ពោលគឺស្មើនឹងការបរិភោគផ្លែគីវី ពីរ ឬផ្លែក្រូចឃ្វិចបួន ក្រូចពោធិសាត់មួយផ្លែ (៣០០ក្រាម) ក្នុងមួយថ្ងៃ នេះមិនរាប់ពីវីតាមីនសេ ដែលមានផ្ទុកក្នុងម្ហូបអាហារ បន្លែផ្លែឈើ ដែលយើងទទួលពេញមួយថ្ងៃផង។ ដូច្នេះការទទួលទានថ្នាំវីតាមីនសេ បន្ថែមគឺគ្រាន់តែដើម្បីចិញ្ចឹមក្រុមហ៊ុនឱសថ និង មិនប្រាកដថាអាចជួយការពារខ្លួនប្រាណទប់ទល់នឹងជំងឺកូវីដ១៩នោះ។
ដើម្បីការពារកុំឱ្យឆ្លងកូវីដ១៩ អង្គការសុខភាពពិភពលោក សូមណែនាំពលរដ្ឋទាំងអស់ ឱ្យប្រកាន់ខ្ជាប់នូវកាយវិការការពារការចម្លងរោគ ដោយត្រូវលាងដៃនឹងសាប៊ូឱ្យបានញឹកញាប់ ឬជាមួយនឹងល្បាយអាល់លកុល បើគ្មានទឹកគ្មានសាប៊ូ។ ត្រូវខ្ទប់មាត់នៅក្អកកណ្តាស់ដោយប្រើកន្សែងក្រដាស ឬខ្ទប់នឹងកែងដៃ។ កាត់បន្ថយការជួបជុំគ្នាច្រើន នៅតែផ្ទះក្នុងអំឡុងពេលមានការរាតត្បាត និងរក្សាគម្លាតសុវត្ថិភាព នៅឱ្យឆ្ងាយពីមនុស្សម្នាក់ទៅមនុស្សម្នាក់ យ៉ាងហោចមួយម៉ែត្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ