សភាអឺរ៉ុបរិះគន់លើកិច្ចព្រមព្រៀងវិនិយោគរវាងសហភាពអឺរ៉ុប និងប្រទេសចិន
សភាអឺរ៉ុបបានយល់ឃើញនៅថ្ងៃព្រហស្បតិ៍ ទី២១ មករាថា កិច្ចព្រមព្រៀងវិនិយោគរវាងសហភាពអឺរ៉ុប និងប្រទេសចិនបង្កគ្រោះថ្នាក់ដល់តម្លៃ និងភាពជឿជាក់របស់អឺរ៉ុបក្នុងរឿងសិទ្ធិមនុស្ស។ នៅក្នុងសេចក្តីសម្រេចមួយដែលអនុម័តនៅក្នុងជំនួបកំពូលតាមអនឡាញ សភាអឺរ៉ុបបានថ្កោលទោសចិនពីបទបង្រ្កាបលើក្រុមសកម្មជនអ្នកប្រជាធិបតេយ្យនៅហុងកុង ការធ្វើទុក្ខបុកម្នេញលើជនជាតិភាគតិចអ៊ុយហ្គួរក្នុងខេត្តស៊ីនជាំង និងស្ថានការណ៍សិទ្ធិមនុស្សនៅទីបេ។
ចុះផ្សាយនៅថ្ងៃ៖
ស្តាប់ - ០១:៥៥
សភាអឺរ៉ុបមិនបានជំទាស់នឹងកិច្ចព្រមព្រៀងវិនិយោគរវាងសហភាពអឺរ៉ុប និងប្រទេសចិនទេ។ តែចង់ឲ្យសមាជិកអឺរ៉ុបទាំង ២៧ប្រទេសកុំភ្លេចគិតគូរពីស្ថានភាពសិទ្ធិមនុស្សនៅចិន ពោលកុំផ្តោតខ្លាំងតែរឿងសេដ្ឋកិច្ច។ ស្ថានភាពសិទ្ធិមនុស្សនៅចិនដែលសភាអឺរ៉ុបចង់និយាយ គឺការបង្រ្កាបរបស់រដ្ឋអំណាចចិនលើក្រុមសកម្មជនអ្នកប្រជាធិបតេយ្យនៅហុងកុង ការធ្វើទុក្ខបុកម្នេញលើជនជាតិភាគតិចចិនអ៊ុយហ្គួរអ្នកកាន់សាសនាអ៊ីស្លាមដែលរស់ក្នុងខេត្តស៊ីនជាំង និងស្ថានការណ៍សិទ្ធិមនុស្សនៅទីបេ។ សភាអឺរ៉ុបយល់ថា នៅពេលដែលសហភាពអឺរ៉ុបមិនចាប់អារម្មណ៍ ឬមិនផ្តោតការយកចិត្តទុកដាក់លើរឿងសិទ្ធិមនុស្សនៅចិននឹងបង្កគ្រោះថ្នាក់ដល់តម្លៃ និងភាពជឿជាក់របស់អឺរ៉ុបក្នុងរឿងសិទ្ធិមនុស្សនេះ។
នៅក្នុងសេចក្តីសម្រេចមួយដែលបានអនុម័តនាជំនួបកំពូលតាមអនឡាញកាលពីថ្ងៃព្រហស្បតិ៍ ទី២១ មករា សភាអឺរ៉ុបបានជំរុញសមាជិកអឺរ៉ុបទាំង ២៧ប្រទេសឲ្យពិចារណាឆាប់រហ័សពីការដាក់ទណ្ឌកម្មផ្ទាំងស៊ីបប្រឆាំងអ្នកទទួលខុសត្រូវនៅហុងកុង និងនៅចិនដីគោក។ នៅហុងកុង សេចក្តីសម្រេចរបស់សភាអឺរ៉ុបបានលើកឈ្មោះប្រមុខដឹកនាំលោកស្រីការី ឡាំ និងសមាជិកផ្សេងទៀតក្នុងរដ្ឋាភិបាលហុងកុងដែលស្មោះស្ម័គ្រនឹងចិនដីគោក។ គួរបញ្ជាក់ថា កិច្ចព្រមព្រៀងវិនិយោគដែលសហភាពអឺរ៉ុប និងចិនបានចុះហត្ថលេខាកាលពីថ្ងៃទី៣០ ធ្នូ ឆ្នាំ ២០២០ នឹងត្រូវដាក់ឲ្យសភាអនុម័តនាពេលខាងមុខ។
ទំរាំទទួលបានកិច្ចព្រមព្រៀងមួយនេះ សហភាពអឺរ៉ុប និងចិនបានជួបចរចាគ្នាអស់រយៈពេលជាច្រើនឆ្នាំ។ សហភាពអឺរ៉ុបបានចេញមុខការពារលើកិច្ចព្រមព្រៀងវិនិយោគជាមួយចិនដោយបញ្ជាក់ថា ចិនបានសន្យាប្រឹងប្រែងគោរពតាមសន្ធិសញ្ញារបស់អង្គការពលកម្មអន្តរជាតិស្តីពីការងារដោយបង្ខំ។ តាមរយៈកិច្ចព្រមព្រៀងមួយនេះ សហភាពអឺរ៉ុបសង្ឃឹមទទួលបានសមភាពជាមួយចិននៅក្នុងវិស័យវិនិយោគ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ