ណូបែលរូបវិទ្យា២០២០បានទៅរូបវិទូ៣នាក់សម្រាប់ការស្រាវជ្រាវរកឃើញ « ប្រហោងខ្មៅ »
នៅថ្ងៃអង្គារ ទី៦ តុលា គណៈកម្មការណូបែលក្នុងប្រទេសស៊ុយអែតបានសម្រេចប្រគល់រង្វាន់ណូបែលរូបវិទ្យាឲ្យអ្នកស្រាវជ្រាវចំនួន ៣នាក់ គឺជនជាតិអង់គ្លេស លោក Roger Penrose មានអាយុ ៨៩ឆ្នាំ ជនជាតិអាល្លឺម៉ង់លោក Reinhard Genzel មានអាយុ ៦៨ឆ្នាំ និងជនជាតិអាមេរិកលោកស្រី Andrea Ghez មានអាយុ ៥៥ឆ្នាំ។ ស្នាដៃរបស់អ្នកវិទ្យាសាស្រ្តទាំង ៣នាក់ គឺការស្រាវជ្រាវរកឃើញ « ប្រហោងខ្មៅ » ឬហៅជាភាសាអង់គ្លេស « Black Hole »។ តែគណៈកម្មការណូបែលបានបញ្ជាក់ថា ប្រាក់សម្រាប់រង្វាន់ណូបែលដែលមាន ១លានអឺរ៉ូប្រគល់ឲ្យលោក Penrose ចំនួនពាក់កណ្តាល គឺ ៥០ម៉ឺន ហើយនៅសល់ពាក់កណ្តាលទៀតត្រូវចែកជាពីររវាងលោក Genzel និងលោកស្រី Ghez។
ចុះផ្សាយនៅថ្ងៃ៖
ស្នាដៃរបស់លោក Roger Penrose គឺការបញ្ជាក់ពីវត្តមានប្រហោងខ្មៅ ឬហៅជាភាសាអង់គ្លេស « Black Hole » ដោយផ្អែកតាមទ្រឹស្តី General Relativity របស់លោក Einstein។ យោងតាមទ្រឹស្តី General Relativity នៅក្នុងប្រហោងខ្មៅ ឬ « Black Hole » គឺគ្មានអ្វីដែលអាចយកឈ្នះពីកម្លាំងទំនាញបានទេ មានន័យថា កម្លាំងទំនាញនឹងធ្វើឲ្យគ្រប់សារធាតុទាំងអស់នៅក្នុងប្រហោងខ្មៅត្រូវប្រមូលផ្តុំចូលគ្នាយ៉ាងហាប់ណែនជាចំណុចដ៏តូចបំផុតគ្មានទីបញ្ចប់ដែលគេឲ្យឈ្មោះថា “Singularity”។ លោក Roger Penrose ធ្លាប់បានបង្ហាញតាំងពីឆ្នាំ ១៩៦៥ ថា កម្លាំងទំនាញរបស់ « Black Hole » គឺខ្លាំងក្លាដោយគ្មានអ្វីអាចគេចផុតឡើយ សូម្បីតែពន្លឺ។
ចំណែកស្នាដៃរបស់លោក Reinhard Genzel លោកស្រី Andrea Ghez គឺការបញ្ជាក់ពីម៉ាស់ដ៏ធំមហិមារបស់ « Black Hole » ដែលមានប្រមាណ ៤លានដងធំជាងម៉ាស់របស់ព្រះអាទិត្យ។ តាំងពីដើមទសវត្ស ៩០ លោក Reinhard Genzel លោកស្រី Andrea Ghez បានធ្វើការស្រាវជ្រាវរួមគ្នាលើតំបន់មួយដែលគេឲ្យឈ្មោះថា « Sagittaite A »។ តាមលោកស្រី Andrea គេមិនថាមានអ្វីខ្លះនៅក្នុងប្រហោងខ្មៅ ហើយគេក៏ពិបាកស្មានដែរ។ គឺអាថ៌កំបាំង និងភាពនៅស្រពិចស្រពិលនេះហើយដែលបានធ្វើឲ្យក្រុមអ្នកស្រាវជ្រាវបន្តប្រឹងប្រែងស្រាវជ្រាវជាបន្តទៀត នេះជាការបន្ថែមរបស់លោកស្រី Andrea។
ក្រុមអ្នកវិទ្យាសាស្រ្តគិតថា កម្លាំងទំនាញរបស់ប្រហោងខ្មៅ ឬ « Black Hole » បានលេបត្របាក់ក្នុងល្បឿនដូចផ្លេកបន្ទោរនូវបរិមាណឧស្ម័នដ៏ក្រាស់ឃ្មឹកដែលព័ទ្ធជុំវិញ។ គួរបញ្ជាក់ថា រូបភាពប្រហោងខ្មៅលើកទី១ ត្រូវបានបង្ហាញឲ្យពិភពលោកឃើញកាលពីខែមេសា ឆ្នាំ ២០១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ