បរិស្ថាន៖កញ្ញា Greta Thunberg បរិហារពីភាពអសកម្មនយោបាយក្នុងការប្រឆាំងនឹងការឡើងកម្តៅលើភពផែនដី
នៅថ្ងៃព្រហស្បតិ៍ ទី២០ សីហា សកម្មជនបរិស្ថានកញ្ញា Greta Thunberg ជនជាតិស៊ុយអែត និងក្រុមការងារចំនួន ៣នាក់ទៀតជាជនជាតិអាល្លឺម៉ង់ និងបែលហ្ស៊ិកត្រូវបាននាយករដ្ឋមន្រ្តីអាល្លឺម៉ង់លោកស្រីមែរកិលទទួលជួបក្នុងទីក្រុងប៊ែរឡាំងរយៈពេល ១ម៉ោងកន្លះ។ នៅក្នុងជំនួប កញ្ញា Greta បានព្យាយាមផ្តល់សន្ទុះឡើងវិញនូវចលនាដើម្បីបុព្វហេតុអាកាសធាតុក្រោមឈ្មោះ « Friday for future » របស់កញ្ញាដែលបានចាប់ផ្តើមតាំងពីថ្ងៃទី២០ សីហា ឆ្នាំ ២០១៨ និងដែលកំពុងមានសកម្មភាពរអាក់រអួលដោយវិបត្តិជំងឺកូវីដ-១៩។ ទោះជាយ៉ាងនេះក្តី កញ្ញា Greta មិនញញើតបរិហារពីភាពអសកម្មនយោបាយរបស់ថ្នាក់ដឹកនាំអឺរ៉ុបក្នុងការប្រឆាំងនឹងការឡើងកម្តៅលើផែនដី។
ចុះផ្សាយនៅថ្ងៃ៖
ស្តាប់ - ០២:៣៥
ជម្រើសជួបនាយករដ្ឋមន្រ្តីអាល្លឺម៉ង់លោកស្រីមែរកិលក្នុងថ្ងៃទី២០ សីហាមិនមែនជាជម្រើសចៃដន្យទេ ព្រោះកាលពី ២ឆ្នាំមុន ពោលក្នុងថ្ងៃទី២០ សីហា ឆ្នាំ ២០១៨ កញ្ញា Greta Thunberg ដែលទើបមានអាយុ ១៥ឆ្នាំ និងគ្មាននរណាស្គាល់កាលណោះបានផ្តើមធ្វើកូដកម្មដើម្បីបុព្វហេតុអាកាសធាតុនៅពីមុខសភាស៊ុយអែតក្នុងទីក្រុងស្តុកខុល។ នៅប៉ុន្មានខែក្រោយមក ចលនាក្រោមឈ្មោះ « Friday for future » បានកែនប្រមូលយុវជនអឺរ៉ុបជាច្រើនពាន់នាក់នៅរៀងរាល់សប្តាហ៍។ តែ ២ឆ្នាំក្រោយមក ជោគជ័យមួយនេះហាក់មិនបានធ្វើឲ្យបុព្វហេតុបរិស្ថានរបស់កញ្ញាចម្រើនទៅមុខទេ នេះជាចំណាប់អារម្មណ៍សោកស្តាយរបស់កញ្ញា Greta។
នៅក្នុងលិខិតមួយផ្ញើទៅឲ្យថ្នាក់ដឹកនាំអឺរ៉ុបក្នុងថ្ងៃព្រហស្បតិ៍ ទី២០ សីហា កញ្ញា Greta បានបរិហារពីភាពអសកម្មនយោបាយដែលកំពុងបន្តមានក្នុងការការពារបរិយាកាស និងពីភាពព្រងើយកន្តើយរបស់រដ្ឋាភិបាល។ នៅក្នុងន័យនេះ កញ្ញា Greta បានអំពាវនាវឲ្យសហភាពអឺរ៉ុបធ្វើសកម្មភាពពិតប្រាកដ ហើយអាល្លឺម៉ង់ក្នុងនាមជាប្រធានផ្លាស់វេនក្រុមប្រឹក្សាអឺរ៉ុបត្រូវផ្តួចផ្តើមគំនិតនេះឡើង។ កញ្ញា Greta មានការសោកស្តាយថា វិបត្តិអាកាសធាតុ និងបរិស្ថានមិនត្រូវបានគេចាត់ទុកជាវិបត្តិទេ។ ចំណែកនៅក្នុងជំនួបរយៈពេល ១ម៉ោងកន្លះជាមួយលោកស្រីមែរកិល កញ្ញា Greta រួមទាំងសកម្មជនបរិស្ថាន ៣នាក់ទៀត និងលោកស្រីមែរកិលបានឯកភាពគ្នាថា ការឡើងកម្តៅនៅក្នុងបរិយាកាសជាបញ្ហាប្រឈមមួយរបស់ពិភពលោក ហើយប្រទេសឧស្សាហកម្មទាំងអស់មានការទទួលខុសត្រូវពិសេសនៅក្នុងយុទ្ធនាការប្រឆាំងនឹងបញ្ហានេះ។
កញ្ញា Greta មានការសោកស្តាយពីគម្លាតកាន់តែខ្លាំងពីមួយនាទីទៅមួយនាទីនូវអ្វីដែលគេត្រូវធ្វើ និងអ្វីដែលកំពុងកើតមានជាក់ស្តែងពេលនេះ។ « ទោះបីជាមានការកែនប្រមូល យើងបានបាត់បង់ពេល ២ឆ្នាំបន្ថែមទៀតដោយសារភាពអសកម្មនយោបាយ » នេះជាចំណាប់អារម្មណ៍សោកស្តាយរបស់កញ្ញា Greta ដោយអំពាវនាវដល់គ្រប់ប្រទេសឲ្យបញ្ឈប់ជាបន្ទាន់នូវការវិនិយោគក្នុងវិស័យថាមពលធ្យូងថ្ម។ កញ្ញា Greta បានទទួលស្គាល់ថា ជំងឺកូវីដ-១៩ និងការថមថយសេដ្ឋកិច្ចសកលយ៉ាងគំហុកបានធ្វើឲ្យកម្រិតផ្សែងពុលធ្លាក់ចុះនៅក្នុងបរិយាកាស។ តែវាបានបង្កឲ្យមានការលំបាកដល់ការប្រមូលផ្តុំដើម្បីបុព្វហេតុអាកាសធាតុ ខណៈដែលការភ័យខ្លាចបាត់បង់ការងារជារឿងអាទិភាព។ យ៉ាងណាក៏ដោយ ចលនា « Friday for future » គ្រោងរៀបចំទិវាជួបជុំសកលនៅថ្ងៃទី២៥ កញ្ញាខាងមុខដោយគិតគូរពីវិធានការបង្ការទប់ស្កាត់នឹងការឆ្លងកូវីដ-១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ