សហភាពអឺរ៉ុបបើកយុទ្ធនាការការទូតស្តីពីការប្រែប្រួលអាកាសធាតុ
សហភាពអឺរ៉ុប និងរដ្ឋជាសមាជិករបស់ខ្លួន នៅថ្ងៃទី១៧ មិថុនានេះ បានដាក់ចេញនូវរបៀបវារៈសម្រាប់យុទ្ធនាការសហភាពអឺរ៉ុប ដើម្បីលើកកម្ពស់ការយល់ដឹងអំពី សន្និសីទលើកទី២១ នៃភាគីហត្ថលេខីស្តីពីការប្រែប្រួលអាកាសធាតុ ហៅកាត់ថា COP ២១ ។សន្និសីទនេះ នឹងត្រូវធ្វើឡើងនៅថ្ងៃទី ៣១ វិច្ឆិកា ដល់ថ្ងៃទី ១១ ធ្នូចុងឆ្នាំ២០១៥នេះ នៅក្នុងទីក្រុងប៉ារីស ដែលមានគោលបំណងសម្រេចឲ្យបានភាពជោគជ័យចម្បងៗមួយចំនួន ក្នុងយុទ្ធនាការសកលក្នុងការឆ្លើយតបទៅនឹងការប្រែប្រួលអាកាសធាតុ។
ចុះផ្សាយនៅថ្ងៃ៖
ស្តាប់ - ០១:៣៨
ប្រធានបទនៃយុទ្ធនាការការទូតស្តីពីការប្រែប្រួលអាកាសធាតុនេះគឺ «យើងត្រូវចាប់ផ្តើមឥឡូវនេះ!» ។ យុទ្ធនាការនេះ រួមមានការប្រកួតប្រជែងរូបថតដែលផ្តោតលើការប្រែប្រួលអាកាសធាតុ ដែលនឹងត្រូវចាប់ផ្តើមពីថ្ងៃទីនេះតទៅ។ កម្មវិធីនេះត្រូវបានដាក់ចេញ បន្ទាប់ពីដាក់ឲ្យដំណើរការកម្មវិធីទូរស័ព្ទ ការរាប់ថយក្រោយចំនួន ១០០ ថ្ងៃមុនដល់ថ្ងៃសន្និសីទលើកទី២១ នៃភាគីហត្ថលេខីស្តីពីការប្រែប្រួលអាកាសធាតុ ដែលនឹងត្រូវចាប់ផ្តើមពីថ្ងៃទី២១ ខែសីហាខាងមុខនេះតទៅ។
លោកហ្សង់ ហ្វ្រង់ស័រ កូតាំង ឯកអគ្គរដ្ឋទូតនៃសហភាពអឺរ៉ុបប្រចាំកម្ពុជាបានមានប្រសាសន៍ថា ក្នុងនាមជាដៃគូឈានមុខគេរបស់កម្ពុជា សហភាពអឺរ៉ុបគាំទ្រកម្ពុជាក្នុងការប្រយុទ្ធប្រឆាំងនិងការប្រែប្រួលអាកាសធាតុ និងកាត់បន្ថយការប្រឈមនឹងគ្រោះមហន្តរាយ។ នេះគឺជាមូលហេតុដែលប្រតិភូសហភាពអឺរ៉ុប និងបណ្តាស្ថានទូតនៃរដ្ឋជាសមាជិករបស់ខ្លួនចាប់ផ្តើមចាប់ដៃជាមួយប្រជាជនកម្ពុជា ក្នុងការបើកយុទ្ធនាការទូតអំពីអាកាសធាតុក្រោមប្រធានបទ «យើងត្រូវចាប់ផ្តើមឥឡូវនេះ!»។
លោកហ្សង់ ហ្វ្រង់ស័រ កូតាំងក៏បានបន្ថែមទៀតថា ការប្រកួតប្រជែងរូបថតនឹងជួយលើកទឹកចិត្តដល់បុគ្គលម្នាក់ៗនៅក្នុងប្រទេសកម្ពុជាឲ្យចាប់ផ្តើមសកម្មភាពរបស់ខ្លួនក្នុងការឆ្លើយតបនឹងការប្រែប្រួលអាកាសធាតុ និងបង្ហាញទៅកាន់ពិភពលោកថាកម្ពុជា «ចាប់ផ្តើមឥឡូវនេះ!»។
សូមបញ្ជាក់ថាការចូលរួមប្រកួតប្រជែងរូបថត នឹងត្រូវផុតកំណត់ត្រឹមថ្ងៃចន្ទ ទី១៧ សីហា ហើយការប្រគល់រង្វាន់នឹងធ្វើឡើងនៅថ្ងៃសុក្រទី ២១ សីហា ដែលជាថ្ងៃដាក់ឲ្យដំណើរការកម្មវិធីការរាប់ថយក្រោយចំនួន១០០ថ្ងៃ មុនដល់សន្និសីទលើកទី២១ ឬជាភាសាអង់គ្លេស 100-day countdown to COP21៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ