ចិនព្រមានអង់គ្លេសពីគម្រោងបញ្ជូននាវាដឹកយន្តហោះចម្បាំងទៅមហាសមុទ្រប៉ាស៊ីហ្វិក
អង់គ្លេស និងចិនកំពុងបន្តដំឡើងសាច់ដុំដាក់គ្នា។ នៅថ្ងៃសៅរ៍ ទី១៨ កក្កដា ចិនតាមរយៈឯកអគ្គរដ្ឋទូតប្រចាំទីក្រុងឡុងដ៏លោកលីវ សៀវម៉ីងបានជំរុញអង់គ្លេសឲ្យបោះបង់ចោលនូវគម្រោងចង់បញ្ជូននាវាដឹកយន្តហោះចម្បាំងទៅកាន់មហាសមុទ្រប៉ាស៊ីហ្វិក។ លោកលីវ សៀវម៉ីងបានគូសបញ្ជាក់ថា អ្វីដែលអង់គ្លេសចង់ធ្វើនេះជាកាយវិការដ៏គ្រោះថ្នាក់ខ្លាំងណាស់ និងអាចធ្វើឲ្យទំនាក់ទំនងរវាងប្រទេសទាំងពីរដែលកំពុងតានតឹងស្រាប់រឹតតែឡើងខ្លាំងមួយកម្រិតទៀត។ គួរបញ្ជាក់ថា ទីក្រុងប៉េកាំងកំពុងបន្តខឹងសម្បារនឹងទីក្រុងឡុងដ៏ដែលបានបរិហារចិនក្នុងរឿងហុងកុង និងបានឈប់បំពាក់ប្រព័ន្ធ ៥G របស់ក្រុមហ៊ុនចិន Huawei។
ចុះផ្សាយនៅថ្ងៃ៖
ស្តាប់ - ០២:១៤
ការព្រមានរបស់លោកលីវ សៀវម៉ីងបានធ្វើឡើងនៅក្នុងបទសម្ភាសន៍ជាមួយកាសែតប្រចាំថ្ងៃ The Times។ « បន្ទាប់ពីអង់គ្លេសទទួលបានជោគជ័យក្នុងការចាកចេញពីសហភាពអឺរ៉ុបនាដំណាច់ខែមករា ខ្ញុំគិតថាអង់គ្លេសនៅតែចង់ដើរតួនាទីសំខាន់ក្នុងលោក » នេះជាការថ្លែងរបស់លោកលីវ សៀវម៉ីង មុននឹងបន្ថែមថា អ្វីដែលអង់គ្លេសចង់ធ្វើនេះមិនមែនជាវិធីដើរតួនាទីសំខាន់មួយទេ និងបានព្រមានអង់គ្លេសត្រង់ៗកុំឲ្យភ្ជាប់ខ្លួនជាមួយសហរដ្ឋអាមេរិកដើម្បីប្រឆាំងចិន។ ប្រតិកម្មខ្លាំងៗរបស់ឯកអគ្គរដ្ឋទូតចិនប្រចាំទីក្រុងឡុងដ៏នេះបានធ្វើឡើង បន្ទាប់ពីកាសែត The Times បានចុះផ្សាយព័ត៌មានមួយក្នុងសប្តាហ៍នេះដែលថា អង់គ្លេសគ្រោងបញ្ជូននាវាដឹកយន្តហោះចម្បាំងឈ្មោះ HMS Queen Elizabeth ទៅកាន់មហាសមុទ្រប៉ាស៊ីហ្វិកក្នុងក្របខណ្ឌនៃសម្ព័ន្ធអន្តរជាតិសំដៅប្រឆាំងចិន។
នាវា HMS Queen Elizabeth គ្រោងចូលរួមធ្វើលំហាត់សឹកជាមួយប្រទេសជប៉ុន និងសហរដ្ឋអាមេរិក។ រឿងរ៉ាវថ្មីមួយនេះបានធ្លាក់មក ខណៈដែលចិនកំពុងបន្តខឹងសម្បារនឹងអង់គ្លេសដែលបានលូកដៃចូលជ្រៀតជ្រែកកិច្ចការផ្ទៃក្នុងហុងកុង និងការដែលអង់គ្លេសបានសម្រេចឈប់បំពាក់ប្រព័ន្ធ ៥G របស់ក្រុមហ៊ុនចិន Huawei។ ទាក់ទងនឹង Huawei ត្រូវបានលោកលីវ សៀវម៉ីងព្រមានថា ការដែលអង់គ្លេសបានទាត់ចោល Huawei នឹងធ្វើឲ្យការវិនិយោគរបស់ចិននៅអង់គ្លេសធ្លាក់ចុះ។ គួរបញ្ជាក់ថាក្នុងនាមជាអតីតអាណាព្យាបាលហុងកុង អង់គ្លេសបានបរិហារចាស់ដៃលើចិនដីគោកដែលទើបបានបង្កើតច្បាប់សន្តិសុខជាតិលើហុងកុង។
បន្ទាប់មក ទីក្រុងឡុងដ៏បានសន្យាពិនិត្យមើលឡើងវិញលើច្បាប់អន្តោប្រវេសន៍ដើម្បីអនុញ្ញាតឲ្យពលរដ្ឋហុងកុងរាប់លាននាក់អាចសុំសញ្ជាតិអង់គ្លេស។ ថ្មីៗនេះ ពោលក្រោយពីច្បាប់សន្តិសុខជាតិចូលជាធរមាន អង់គ្លេសបានអនុញ្ញាតឲ្យសកម្មជនអ្នកប្រជាធិបតេយ្យហុងកុងម្នាក់ឈ្មោះណាតាន ឡដ៏ជ្រកកោណ។ លោកណាតាន ឡដ៏បាននិយាយប្រាប់កាសែតប្រចាំថ្ងៃអង់គ្លេស The Times ថា លោកភៀសខ្លួនទៅអង់គ្លេសដើម្បីបន្តបញ្ចេញមតិដោយសេរីតាំងនាមឲ្យពលរដ្ឋហុងកុង។ លោកណាតាន ឡដ៏បានបន្ថែមថានៅហុងកុង ពលរដ្ឋលែងមានសេរីភាពក្នុងការបញ្ចេញមតិ រងការបំភិតបំភ័យ ការចាប់ខ្លួន និងការឃុំខ្លួនដោយកម្លាំងប៉ូលិស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ