វិបត្តិហុងកុង៖ ចិនរិះគន់អង់គ្លេស ថាលូកដៃចូលកិច្ចការផ្ទៃក្នុងគេ ដោយឥតអៀនខ្មាស
អគ្គរដ្ឋទូតចិនប្រចាំទីក្រុងឡុងដ៍ បានថ្លែងថ្កោលទោសរដ្ឋាភិបាលអង់គ្លេស ថាកំពុងតែលូកដៃ កកូរកកាយកិច្ចការផ្ទៃក្នុងរបស់ចិន ដោយឥតអៀនខ្មាស។ ការថ្លែងថ្កោលទោសបែបនេះ គឺបន្ទាប់ពីតំណាងរដ្ឋាភិបាលអង់គ្លេស បានបញ្ជាក់ថា គេនឹងសើរើច្បាប់អន្តោប្រវេសន៍ ដើម្បីសម្រួលអនុញ្ញាតឲ្យប្រជាជនហុងកុង ដែលកាន់លិខិតឆ្លងដែនពិសេសរបស់អង់គ្លេស អាចមករស់នៅ និងសុំសញ្ជាតិអង់គ្លេសបាន ដោយងាយ។
ចុះផ្សាយនៅថ្ងៃ៖
ស្តាប់ - ០២:៣៣
នៅចំពោះមុខអ្នកកាសែត រសៀលថ្ងៃទី៦កក្កដា លោក Liu Xiaoming ឯកអគ្គរដ្ឋទូតចិនប្រចាំទីក្រុងឡុងដ៍ បាននិយាយថា វិធានាការដែលរដ្ឋាភិបាលអង់គ្លេស បានសម្រេច គឺជាការលូកដៃកកូរកកាយ ដោយឥតខ្មាសអៀន មកក្នុងកិច្ចការផ្ទៃក្នុងរបស់ប្រទេសចិន។ លោកបន្តថា អង់គ្លេស គ្មានសិទ្ធិអំណាចអ្វីទាំងអស់ ទៅលើដែនដីហុងកុង។ ការបំពានចូលក្នុងកិច្ចការផ្ទៃក្នុងចិននេះ គឺអង់គ្លេសធ្វើខុស នឹងវិធានគ្រប់គ្រងវិស័យការទូតអន្តរជាតិ។
អ្នកនាំពាក្យខុទ្ទការល័យលោកបូរីស ចនសុននាយករដ្ឋមន្ត្រីអង់គ្លេស បានលើកឡើងថា ច្បាប់សន្តិសុខជាតិ ដែលចិនទើបអនុម័ត គឺជាការបញ្ជាក់ថា ចិនបានរំលោភពាក្យសន្យារបស់ខ្លួន នៅសេចក្តីថ្លែងការរួមគ្នាជាមួយអង់គ្លេស នៅឆ្នាំ១៩៨៤។ អង់គ្លេសបានសន្យាជាមួយប្រជាជនហុងកុងថា បើចិនអនុវត្តច្បាប់សន្តិសុខជាតិ នោះអង់គ្លេស នឹងធ្វើកំណែទម្រង់ច្បាប់អន្តោប្រវេសន៍ បើកទ្វារស្វាគមន៍ប្រជាជនហុងកុង ដែលកាន់លិខិតឆ្លងដែនពិសេស របសអង់គ្លេស។ ពាក្យសន្យានេះ អង់គ្លេសហ៊ាននិយាយគឺហ៊ានធ្វើ។
សូមបញ្ជាក់ថា រដ្ឋាភិបាលអង់គ្លេសនឹងធ្វើការកែប្រែច្បាប់អន្តោប្រវេសន៍ ដើម្បីជួយសម្រួលដល់ប្រជាជនហុងកុង ក្នុងការធ្វើចំណាកស្រុក។ យោងតាមច្បាប់អង់គ្លេស ប្រជាជនហុងកុងដែលកើតមុនឆ្នាំ១៩៩៧ ពោលគឺមុនពេលអង់គ្លេសប្រគល់ហុងកុងទៅឲ្យចិនវិញ គឺពួកគេមានសិទ្ធិស្នើសុំលិខិតឆ្លងដែនពិសេស របស់អង់គ្លេស BN(O)។ បច្ចុប្បន្នមានប្រជាជនហុងកុង ដែលកាន់លិខិតឆ្លងដែននេះ ប្រមាណ៣៥០០០០នាក់។ តែរដ្ឋាភិបាលអង់គ្លេស អះអាង អ្នកហុងកុងដែលបំពេញលក្ខខណ្ឌ ទទួលបានលិខិតឆ្លងដែននេះ គឺមានប្រមាណជិត៣លាននាក់ទៀត។
យោងតាមច្បាប់ចាស់ អ្នកកាន់លិខិតឆ្លងដែនពិសេសនេះ អាចចូលដីអង់គ្លេសរយៈពេល៦ខែ។ តែការធ្វើកំណែទម្រង់ថ្មី គឺរដ្ឋាភិបាលអង់គ្លេស និងបើកឲ្យអាចស្នាក់នៅ៥ឆ្នាំ បន្ទាប់មកទៀត អាចសុំសញ្ជាាតិអង់គ្លេសតែម្តង នៅពេលដាច់ឆ្នាំទី៦។ ទោះយ៉ាងណា កាលពីសប្តាហ៍កន្លងទៅ លោករដ្ឋមន្ត្រីការបរទេសអង់គ្លេសបានលើកឡើងថា អង់គ្លេសបើកទ្វារទទួលប្រជាជនហុងកុងមែន តែបើចិនមិនបើកទ្វារឲ្យធ្វើដំណើរចេញ ក៏អង់គ្លេសមិនដឹងថាត្រូវធ្វើដូចម្តេចដែរ៕
គួរកត់សំគាល់ថា វិធានាការបើកផ្លូវ ទទួលស្វាគមន៍ប្រជាជនហុងកុង ឲ្យមករស់នៅសុំសញ្ជាតិអង់គ្លេសនេះ បានធ្វើឲ្យរដ្ឋាភិបាលចិនខឹងច្រឡោតជាខ្លាំង។ ស្របពេលដែលថ្លែងថ្កោលទោសអង់គ្លេស លោកទូតចិនប្រចាំទីក្រុងឡុងដ៍ បានលើកឡើងថា ចិននឹងចាត់វិធានការឆ្លើយតបវិញឲ្យសមស្រប។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ