បារាំងអះអាងថា បានគ្រប់គ្រងវិបត្តិកូវីដ១៩
បារាំងប្រកាសថា ជំងឺរាតត្បាតកូវីដ បានថមថយ មកនៅត្រឹមកម្រិតមួយដែលគេអាចគ្រប់គ្រងបាន។ តាមប្រធានក្រុមប្រឹក្សាវិទ្យាសាស្រ្តដែលជាអង្គភាពពិគ្រោះយោបល់សម្រាប់រដ្ឋាភិបាលបារាំង នៅពេលករណីឆ្លងមេរោគកូរ៉ូណាបានធ្លាក់ថយចុះ គេក៏មានធ្យោបាយគ្រប់គ្រាន់ ផងដែរ ដើម្បីគ្រប់គ្រង ករណីឆ្លងជំងឺកូវីដ១៩។ បារាំងដែលមានករណីឆ្លង ជាង ១សែន ៥ម៉ឺន និងមនុស្សស្លាប់ដោយសារកូវីដ ជិត៣ម៉ឺននាក់ បានបើកទីក្រុង ចាប់ផ្តើមសេដ្ឋកិច្ចរបស់ខ្លួន ឡើងវិញ បណ្តើរៗ ចាប់តាំងពីថ្ងៃទី ១១ឧសភាមក។
ចុះផ្សាយនៅថ្ងៃ៖
ស្តាប់ - ០២:១១
តាមសាស្រ្តាចារ្យ Jean François Delfraissy ប្រធានក្រុមប្រឹក្សាវិទ្យាសាស្រ្ត សម្រាប់រដ្ឋាភិបាល មេរោគកូរ៉ូណានៅតែសកម្មក្នុងតំបន់មួយចំនួន នៅប្រទេសបារាំង ប៉ុន្តែ វាឆ្លងក្នុងល្បឿនយឺត។ ករណីឆ្លងថ្មីមេរោគកូរ៉ូណា បានធ្លាក់ចុះពី ៨ពាន់នាក់ នៅដើមខែមីនា មកនៅជាង ១ពាន់នាក់ ក្នុងមួយថ្ងៃ នាពេលសព្វថ្ងៃនេះ។
តាមប្រធានក្រុមប្រឹក្សាវិទ្យាសាស្រ្ត ករណីឆ្លងថ្មី នៃជំងឺកូវីដ ធ្លាក់ចុះ គួរឲ្យកត់សំគាល់ ដោយមកពីមានវិធានការបិទទីក្រុង ដាក់មនុស្សឲ្យនៅក្នុងផ្ទះ ដែលបានទប់ស្កាត់ច្រើនមិនមានការចម្លងមេរោគកូរ៉ូណា។ មួយវិញទៀត គេអាចថា មកពីមេរោគកូរ៉ូណាអាចចុះថយ ឥទ្ធិពលដោយសារកំដៅថ្ងៃ។
គិតមកដល់ថ្ងៃព្រហស្បតិ៍ បារាំងមានមនុស្សស្លាប់ថ្មី ដោយសារជំងឺកូវីដ ចំនួន ៤៤នាក់ ក្នុងមួយថ្ងៃ ដែលធ្វើបារាំងមានមនុស្សស្លាប់ដោយសារកូវីដ សរុប ២៩០៦៥នាក់។ ចំនួនអ្នកជំងឺដែលត្រូវចូលព្យាបាលនៅមន្ទីរពេទ្យធ្លាក់ចុះ ចំណែកគ្រែនៅបន្ទប់សង្រ្គោះបន្ទាន់ ក៏ចាប់ទំនេរច្រើនឡើងវិញ។
ករណីឆ្លងថ្មីធ្លាក់ថយចុះចំនួន នឹងជួយសម្រាលបន្ទុករបស់មន្ទីរពេទ្យ ដើម្បីអាចព្យាបាលអ្នកជំងឺដោយប្រសិទ្ធិភាព។ ចំនួនឆ្លងមេរោគកូរ៉ូណាថ្មីធ្លាក់ចុះ ចំណែកមធ្យោបាយព្យាបាល និងឧបករណ៍ធ្វើតេស្តរកអ្នកឆ្លងថ្មី ក៏មានគ្រប់គ្រាន់។ ការណ៍នេះធ្វើឲ្យគេគិតថា គេអាចគ្រប់គ្រងបានវិបត្តិកូវីដ។
ទោះបីជាជំងឺកូវីដ ស្ថិតនៅក្រោមការគ្រប់គ្រង ប៉ុន្តែ ប្រធានក្រុមប្រឹក្សាវិទ្យាសាស្រ្តបានអំពាវនាវកុំឲ្យប្រជាជនបារាំងភ្លេចខ្លួន និងត្រូវបន្តអនុវត្តគម្លាតសង្គម ពាក់ម៉ាសជាប្រចាំ និងយូរតទៅទៀត នៅពេលប្រើមធ្យោបាយដឹកជញ្ជូន។
នៅក្នុងសេចក្តីប្រកាសផ្តល់យោបល់ របស់ខ្លួនកាលពីថ្ងៃព្រហស្បតិ៍ក្រុមប្រឹក្សា វិទ្យាសាស្រ្តបានបង្ហាញផែនការស្តីពីវិធានការមួយចំនួន ដើម្បី ទប់ស្កាត់ការឆ្លងជំងឺកូវីដ នៅរយៈពេលប៉ុន្មានខែខាងមុខ។ នៅពេលចំនួនអ្នកឆ្លងធ្លាក់ចុះដោយមកមានវិធានការបិទខ្ទប់មនុស្សក្នុងផ្ទះ អស់ ២ខែ ក្រុមប្រឹក្សាវិទ្យាសាស្រ្ត លើកនេះ មិនផ្តល់យោបល់ឲ្យគេចាប់ដាក់មនុស្សនៅក្នុងផ្ទះដូចមុនទេ ព្រោះថា ធ្វើដូច្នេះ វាមិនត្រឹមតែប៉ះពាល់ដល់សេដ្ឋកិច្ច ប៉ុន្តែ វាប៉ះពាល់ដល់សិទ្ធិមនុស្ស ដែលប្រជាជនបារាំង ពិបាកនឹងអាចទទួលបានជាលើកទី២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ