វិទ្យាស្ថានប៉ាស្ទ័របារាំងថា អ្នកជំងឺកូវីដ១៩ ទោះក្នុងកម្រិតខ្សោយក៏អាចមានប្រព័ន្ធការពារខ្លួន
វិទ្យាស្ថានប៉ាស្ទ័របារាំង ទើបបានប្រកាសឲ្យដឹង កាលពីថ្ងៃអង្គារទី២៦ឧសភា អំពីលទ្ធផលសិក្សាថ្មីមួយ ស្តីពីការផលិតប្រព័ន្ធអង់ទីក័រការពារខ្លួន របស់មនុស្សដែលឆ្លងមេរោគកូរ៉ូណាថ្មី។ យោងតាមការសិក្សានេះ អ្នកជំនាញបារាំង បានរកឃើញថា អ្នកដែលឆ្លងមេរោគកូរ៉ូណាវីរុសថ្មី ទោះបើមិនមានរោគសញ្ញា ឬអាការៈជំងឺក៏ដោយ តែសរីរាង្គពួកគេបានផលិតនូវប្រព័ន្ធអង់ទីក័រ ហើយប្រព័ន្ធអង់ទីក័រនោះ អាចមានកម្លាំងការពារមិនឲ្យឆ្លងសារជាថ្មី ក្នុងរយៈពេលយ៉ាងហោច៤០ថ្ងៃ។
ចុះផ្សាយនៅថ្ងៃ៖
ស្តាប់ - ០២:៤០
អ្នកជំងឺកូវីដ១៩ ទោះបីក្នុងអាការៈស្រាល មិនធ្ងន់ធ្ងរ ក៏សរីរាង្គកាយ អាចបង្កើតនូវប្រព័ន្ធអង់ទីក័រ ដើម្បីការពារខ្លួនបានដែរ។ នេះគឺជាការសន្និដ្ឋានរបស់ក្រុមអ្នកជំនាញ នៃវិទ្យាស្ថានប៉ាស្ទ័របារាំង សហការជាមួយមន្ទីរពេទ្យសកលវិទ្យាល័យទីក្រុងស្ត្រាសបួរ។
លោក Arnaud Fontanet អ្នកទទួលបន្ទុកផ្នែកសុខភាពរួម នៃវិទ្យាស្ថានប៉ាស្ទ័រ បានលើកឡើងថា នេះគឺជាដំណឹងមួយដ៏ល្អ។ អ្នកជំនាញរូបនេះបន្ថែមថា កន្លងមកយើងបានដឹងថា អ្នកជម្ងឺកូវីដ១៩ ដែលមានអាការៈជំងឺធ្ងន់ គឺសរីរាង្គកាយអាចចាប់ផ្តើមផលិតប្រព័ន្ធអង់ទីក័រ នៅរវាងថ្ងៃទី១៥ បន្ទាប់ពីស្តែងចេញជារោគសញ្ញា។ តែពេលនេះ អ្វីដែលយើងបានដឹងបន្ថែមទៀត គឺថា អ្នកជំងឺកូវីដ១៩ ដែលមិនឈឺធ្ងន់ ក៏សរីរាង្គកាយអាចផលិតប្រព័ន្ធអង់ទីក័រ នៅរវាងថ្ងៃទី១៥ បន្ទាប់ពីចេញរោគសញ្ញាដែរ ប៉ុន្តែប្រព័ន្ធអង់ទីក័រ អាចមានទំហំតិចជាង ឬខ្សោយជាង។
លោក Olivier Schwartz អ្នកជំនាញផ្នែកមេរោគ និងប្រព័ន្ធការពារខ្លួន នៃវិទ្យាស្ថានប៉ាស្ទ័រ ដែលបានចូលរួមក្នុងការសិក្សានេះដែរ បានបន្ថែមថា យោងតាមលទ្ធផលអង្កេត គឺអង់ទីក័រដែលមានក្នុងអ្នកជម្ងឺកូវីដ១៩កម្រិតស្រាល អាចមានកម្លាំងទប់ទល់ជាមួយមេរោគ បានយ៉ាងហោច៤០ថ្ងៃ។ ក្នុងរយៈពេលនេះ គឺមានន័យថា អ្នកជំងឺនោះអាចរួចផុតពីការឆ្លងមេរោគសារជាថ្មី។ យោងតាមអ្នកជំនាញរូបនេះ អ្វីដែលជាកម្មវត្ថុបន្តទៅទៀត ក្នុងការតាមដាន គឺត្រូវស្វែងយល់ អំពីកម្លាំងឆ្លើយតបក្នុងរយៈពេលវែង នៃប្រព័ន្ធអង់ទីក័រនេះ ទល់នឹងមេរោគកូរ៉ូណាថ្មី (Sars-CoV-19)។
សូមបញ្ជាក់ថា ការសិក្សានេះ គឺអ្នកជំនាញវិទ្យាស្ថានប៉ាស្ទ័របារាំង បានធ្វើទៅលើបុគ្គលិកមន្ទីរពេទ្យនៅទីក្រុងស្ត្រាសបួរចំនួន១៦០នាក់ ដែលពួកគេសុទ្ធតែបានឆ្លងជំងឺកូវីដ១៩ ក៏ប៉ុន្តែស្ថិតក្នុងអាការៈស្រាល។ តាមរយៈការធ្វើតេស្តឈាម បានបង្ហាញថា នៅរវាងថ្ងៃទី១៥ គិតចាប់ពីពេលឆ្លងមេរោគដំបូង សរីរាង្គកាយរបស់អ្នកជំងឺសឹងតែទាំងអស់ ក្នុងចំណោម១៦០នាក់ សុទ្ធតែបានបង្កើតប្រព័ន្ធអង់ទីក័រ។ បន្ទាប់មក គេបានធ្វើតេស្តឈាមថ្មីមួយបន្ថែមទៀត ដើម្បីស្វែងយល់ពីកម្លាំងរបស់ប្រព័ន្ធអង់ទីក័រទាំងនោះ ដែលបង្ហាញថា នៅរវាងថ្ងៃ២៨បន្ទាប់ពីចេញរោគសញ្ញា ៩៨%នៃអ្នកជំងឺ គឺសរីរាង្គកាយបានផលិតជាប្រព័ន្ធអង់ទីក័រ ដែលមានកម្លាំងសម្លាប់មេរោគកូរ៉ូណាថ្មី។
លោកសាស្ត្រាចារ្យ Samira Fafi-Kremer ប្រធានផ្នែកមេរោគឆ្លង នៅមន្ទីរពេទ្យសកលវិទ្យាល័យស្ត្រាសបួរ បានលើកឡើងថា លទ្ធផលសិក្សានេះ ជាដំណឹងមួយល្អណាស់ ជាពិសេសសម្រាប់ យុទ្ធសាស្ត្រនៃការស្រាវជ្រាវ និងផលិតថ្នាំវ៉ាក់សាំង ប្រឆាំងនឹងមេរោគកូរ៉ូណា ដែលបង្កជំងឺកូវីដ១៩នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ