IEA៖ កូវីដ១៩ នឹងធ្វើឲ្យការបញ្ចេញឧស្ម័នកាបូនិកធ្លាក់ចុះខ្លាំងបំផុតនៅឆ្នាំ២០២០នេះ
ទីភ្នាក់ងារថាមពលអន្តរជាតិ (IEA) នៅថ្ងៃព្រហស្បតិ៍ ទី៣០ មេសានេះ បានឲ្យដឹងថា វិបត្តិកូវីដ១៩ ទំនងជានឹងធ្វើឲ្យការបញ្ចេញឧស្ម័នកាបូនិកក្នុងវិស័យថាមពលធ្លាក់ចុះខ្លាំងបំផុតនៅឆ្នាំ២០២០នេះ។ បើយោងទៅតាមការព្យាករណ៍របស់ IEA ការបំភាយឧស្ម័នកាបូនិក អាចនឹងធ្លាក់ចុះរហូតដល់ប្រមាណជា ៨ % នៅឆ្នាំនេះ ដោយសារតែការធ្លាក់ចុះដ៏កម្រនូវតម្រូវការធ្យូងថ្ម ប្រេងនិងឧស្ម័ន។
ចុះផ្សាយនៅថ្ងៃ៖
ស្តាប់ - ០២:៣០
ទីភ្នាក់ងារថាមពលអន្តរជាតិ លើកឡើងបែបនេះដោយផ្អែកតាមការវិភាគទៅលើតម្រូវការថាមពលអគ្គិសនីក្នុងរយៈពេលជាង ១០០ ថ្ងៃ អំឡុងពេលដែលប្រទេសនៅជុំវិញពិភពលោកបិទទ្វារ និងបង្ខាំងឲ្យពលរដ្ឋនៅតែក្នុងផ្ទះ ក្នុងគោលបំណងគ្រប់គ្រងការឆ្លងរាតត្បាតជំងឺកូវីដ១៩។
ទីភ្នាក់ងារថាមពលអន្តរជាតិ បានព្យាករថា តម្រូវការថាមពលសកល នឹងធ្លាក់ចុះចំនួន ៦% ក្នុងឆ្នាំ ២០២០នេះ ពោលគឺធ្លាក់ចុះ ៧ ដង ច្រើនជាងក្នុងអំឡុងវិបត្តិហិរញ្ញវត្ថុឆ្នាំ ២០០៨ និងជាការធ្លាក់ចុះខ្លាំងបំផុត ចាប់តាំងពីសម័យសង្គ្រាមលោកលើកទី ២។
ការធ្លាក់ចុះនៃតម្រូវការថាមពលនេះ បណ្តាលមកពីប្រទេសអ្នកប្រើប្រាស់ថាមពលធំៗ លែងប្រើប្រាស់ថាមពលច្រើនដូចមុន ក្នុងអំឡុងពេលនៃការរីករាលដាលមេរោគកូរ៉ូណាថ្មី។ តួយ៉ាង ឥណ្ឌាដែលជាអ្នកប្រើប្រាស់ថាមពលធំជាងគេលំដាប់ទី៣ ក្នុងពិភពលោក លែងមានតម្រូវការថាមពលទាំងស្រុងតែម្តងក្នុងរដូវកាលកូវីដ១៩។
ទន្ទឹមគ្នានេះ ការប្រើប្រាស់ថាមពលក៏មានការថយចុះខ្លាំងសម្បើមណាស់ដែរ នៅក្នុងបណ្តាប្រទេសមានសេដ្ឋកិច្ចជឿនលឿនជាច្រើន។ ជាក់ស្តែង នៅសហរដ្ឋអាមេរិក តម្រូវការធ្លាក់ចុះចំនួន ៩% ហើយការធ្លាក់ចុះតម្រូវការថាមពលទំនងជាធ្លាក់ចុះរហូតដល់ ១១% នៅអឺរ៉ុប។
“ នេះ គឺជារឿងដ៏គួរឲ្យភ្ញាក់ផ្អើលជាប្រវត្តិសាស្ត្រមួយសម្រាប់ពិភពថាមពលទាំងមូល”។ នេះគឺជាប្រសាសន៍របស់នាយកប្រតិបត្តិទីភ្នាក់ងារថាមពលអន្តរជាតិ លោក Fatih Birol ដោយបានបន្ថែមទៀតថា ការថយចុះនៃតម្រូវការប្រេង ធ្យូងថ្ម និងឧស្ម័នគឺជារឿងមិនគួរឲ្យជឿឡើយ។
គួរជ្រាបថា ស្របពេលដែលតម្រូវការថាមពលដើរដោយប្រេង ធ្យូងថ្ម ហើយនិងឧស្ម័នមានការធ្លាក់ចុះខ្លាំង គេកត់សម្គាល់ឃើញពីការផ្លាស់ប្តូរដ៏សំខាន់មួយ។ ការផ្លាស់ប្តូរនោះ គឺការងាកមកប្រើប្រភពថាមពលដែលបំភាយឧស្ម័នកាបូនិកទាប ដូចជាថាមពលដើរដោយកម្លាំងខ្យល់ និងពន្លឺព្រះអាទិត្យជាដើម។
និន្នាការថ្មីចុងក្រោយនេះ នឹងអាចធ្វើឲ្យការបញ្ចេញឧស្ម័នកាបូនិកក្នុងវិស័យថាមពលធ្លាក់ខ្លាំង រហូតដល់ប្រមាណជា ៨ %។ ទាក់ទងរឿងនេះ អង្គការសហប្រជាជាតិ បានលើកឡើងថា ការបំភាយឧស្ម័នកាបូនិក ត្រូវតែធ្លាក់ចុះចំនួន ៧,៦% ជារៀងរាល់ឆ្នាំរហូតដល់ឆ្នាំ ២០៣០ ដើម្បីអាចទប់ស្កាត់មិនឲ្យសីតុណ្ហភាពមធ្យមលើភពផែនដីកើនឡើងលើសពី ១,៥ អង្សារ នៅចុងសតវត្សរ៍នេះ ស្របទៅតាមមហិច្ឆតាដែលមាននៅក្នុងកិច្ចព្រមព្រៀងអាកាសធាតុក្រុងប៉ារីសឆ្នាំ២០១៥៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ