សន្និសីទអាកាសធាតុត្រូវលើកពេលដោយសារកូវីដ១៩
សន្និសីទអាកាសធាតុរបស់អង្គការសហប្រជាជាតិ (COP26) ដែលគ្រោងធ្វើនៅស្កុតឡែនដ៍ នៅខែវិច្ឆិកាចុងឆ្នាំនេះ ត្រូវលើកពេល ដោយសារតែវិបត្តិកូវីដ១៩។ នេះបើយោងតាមការប្រកាសរបស់រដ្ឋាភិបាលអង់គ្លេស កាលពីថ្ងៃពុធ ដោយមិនបានបញ្ជាក់ទេថា តើសន្និសីទនេះនឹងត្រូវធ្វើនៅថ្ងៃណាវិញពិតប្រាកដ។
ចុះផ្សាយនៅថ្ងៃ៖
“ដោយមើលទៅលើស្ថានភាពនៃការរីករាលដាលកូវីដ១៩នៅទូទាំងពិភពលោកបច្ចុប្បន្ននេះ សន្និសីទអាកាសធាតុ COP26 នៅខែវិច្ឆិកាឆ្នាំ២០២០នេះ នឹងមិនអាចប្រព្រឹត្តធ្វើទៅបានប្រកបដោយប្រសិទ្ធភាពខ្ពស់ និងមានការចូលរួមពីគ្រប់មជ្ឈដ្ឋានបាននោះទេ” នេះជាការបញ្ជាក់ នៅក្នុងសេចក្តីថ្លែងការណ៍របស់រដ្ឋាភិបាលអង់គ្លេសនៅថ្ងៃពុធ ដោយបានបន្ថែមថា សន្និសីទនេះនឹងត្រូវលើកទៅធ្វើនៅឆ្នាំ២០២១វិញ ដោយកាលបរិច្ឆេទថ្មីនឹងត្រូវប្រកាសឲ្យដឹងនៅពេលក្រោយ។
លោកអគ្គលេខាធិការអង្គការសហប្រជាជាតិបានឲ្យដឹងថា លោកគាំទ្រការលើកពេលសន្និសីទនេះ ដោយពិភពលោកទាំងមូលត្រូវផ្តោតអាទិភាពលើការដោះស្រាយវិបត្តិកូវីដ១៩ឲ្យបានជាមុនសិន។
ដូចគ្នាដែរ មន្រ្តីអង្គការសហប្រជាជាតិទទួលបន្ទុកកិច្ចការអាកាសធាតុ ក៏ដូចជាសកម្មជនបរិស្ថានផ្សេងទៀត សុទ្ធតែបានឯកភាពគ្នាថា ការលើកពេលសន្និសីទអាកាសធាតុ គឺជារឿងមួយចៀសមិនផុត ក៏ប៉ុន្តែ ក្នុងពេលជាមួយគ្នា គេក៏បានអំពាវនាវដោយទទូចផងដែរថា រដ្ឋាភិបាលមិនត្រូវភ្លេចនូវការសន្យារបស់ខ្លួន ទាក់ទងនឹងការទប់ស្កាត់ការឡើងកម្តៅនៃភពផែនដីនេះទេ។
លោកស្រីប៉ាទ្រីស្យា អេស្ពីណូសា (Patricia Espinosa) លេខាទទួលបន្ទុកកិច្ចការអាកាសធាតុរបស់អង្គការសហប្រជាជាតិបានលើកឡើងថា កូវីដ១៩ គឺជាការគំរាមកំហែងដ៏ធំ និងបន្ទាន់មួយ ដែលមនុស្សជាតិត្រូវប្រឈមក្នុងពេលបច្ចុប្បន្ននេះ ក៏ប៉ុន្តែ យើងក៏មិនត្រូវភ្លេចដែរថា បញ្ហាអាកាសធាតុ គឺជាការគំរាមកំហែងកាន់តែធំជាងនេះទៅទៀត ដែលមនុស្សជាតិត្រូវប្រឈមនៅក្នុងរយៈពេលវែងទៅមុខ។
គួរបញ្ជាក់ថា សន្និសីទ COP26 នៅស្កុតឡែនដ៍នេះ ត្រូវបានគេគ្រោងធ្វើរយៈពេល ១០ថ្ងៃ ដោយមានមនុស្សចូលរួមប្រមាណជា ៣ម៉ឺននាក់ ក្នុងនោះ មានថ្នាក់ដឹកនាំប្រទេសជុំវិញពិភពលោកប្រមាណជា ២០០នាក់ ដើម្បីជជែកគ្នារកវិធីទប់ស្កាត់ការកើនឡើងនៃសីតុណ្ហភាពមធ្យមលើភពផែនដី។
ក្រុមអ្នកជំនាញរបស់អង្គការសហប្រជាជាតិបានទាញនូវសេចក្តីសន្និដ្ឋានមួយ កាលពីឆ្នាំ២០១៨ថា ដើម្បីបញ្ចៀសនូវវិបត្តិអាកាសធាតុ ពិភពលោកទាំងមូលចាំបាច់ត្រូវតែនាំគ្នាផ្លាស់ប្តូរ ទាំងរបៀបរស់នៅក្នុងសង្គម និងទាំងម៉ូដែលសេដ្ឋកិច្ច។ ការបញ្ចេញឧស្ម័នកាបូនិចចាំបាច់ត្រូវកាត់បន្ថយឲ្យបាន ៤៥% នៅត្រឹមឆ្នាំ២០៣០ ហើយត្រូវកាត់បន្ថយការបញ្ចេញឧស្ម័នកាបូនិចឲ្យដល់កម្រិត ០ នៅត្រឹមឆ្នាំ២០៥០ ទើបគេអាចទប់ស្កាត់មិនឲ្យសីតុណ្ហភាពមធ្យមលើភពផែនដីកើនឡើងលើសពី ១,៥អង្សារ នៅចុងសតវត្សរ៍នេះ ស្របទៅតាមអ្វីដែលគេបានព្រមព្រៀងគ្នា នៅក្នុងកិច្ចព្រមព្រៀងក្រុងប៉ារីស កាលពីឆ្នាំ២០១៥៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ