បារាំងប្រកាសរឹតបន្តឹងបម្រាមមិនឱ្យពលរដ្ឋចេញក្រៅផ្ទះ និងមានទោសដាក់ពន្ធនាគារ
នៅបារាំង រដ្ឋាភិបាលបានបន្តរឹតបន្តឹងបម្រាមហាមមិនឱ្យពលរដ្ឋចេញពីផ្ទះ និងបញ្ជាក់កាន់តែលម្អិតពីករណីពិសេសមួយចំនួន ដូចជាលំហាត់ប្រាណជាដើម។ ចំណែកការផាកពិន័យជាប្រាក់ ចំពោះជនល្មើសបម្រាម គឺកាន់តែធ្ងន់ជាងមុន និងមានទោសដាក់ពន្ធនាគារថែមទៀតផង។ ការសម្រេចថ្មីនេះ ប្រកាសដោយលោកនាយករដ្ឋមន្ត្រី អេឌ័រ ហ្វីលីព (Edouard Philippe) នៅយប់ថ្ងៃចន្ទ ទី២៣មីនា។
ចុះផ្សាយនៅថ្ងៃ៖
មួយសប្តាហ៍មកហើយ ដែលពលរដ្ឋបារាំងត្រូវបង្ខាំងឱ្យនៅ តែក្នុងផ្ទះ។ នាយករដ្ឋមន្ត្រីបារាំង ចេញមុខលម្អិតពីបម្រាមបង្ខាំងពលរដ្ឋ ឱ្យកាន់តែច្បាស់ជាងមុន។ បើតាមលោក អេឌ័រ ហ្វីលីព, ការធ្វើលំហាត់ប្រាណ ពិសេសការរត់ហាត់ប្រាណក្រៅគេហដ្ឋាន អាចធ្វើទៅបាន តែម្តងគត់ក្នុងមួយថ្ងៃ ដែលរយៈពេលយ៉ាងច្រើនបំផុត កម្រិតមួយម៉ោងប៉ុណ្ណោះ ហើយក្នុងរយៈចម្ងាយតែ១គីឡូម៉ែត្រប៉ុណ្ណោះពីផ្ទះ។
ផ្សារលក់ដូរនៅតាមទីធ្លាសាធារណៈ ឬហៅសាមញ្ញថា ផ្សារមេឃ គឺត្រូវហាមឃាត់។ មិនតែប៉ុណ្ណោះ ហាងលក់ទំនិញមួយចំនួន ក៏នឹងបិទដែរ។ ប្រមុខរដ្ឋាភិបាល បានប្រគល់សិទ្ធសម្រេចមួយចំនួន ទៅថ្នាក់ឃុំសង្កាត់ ជាអាជ្ញាធរមូលដ្ឋាន ថាត្រូវបិទហាងលក់ទំនិញណាមួយ ឬក៏កំណត់ចំនួនម៉ោង ដែលអាចបើកលក់ដូរបាន។
បម្រាមថ្មីរបស់រដ្ឋបារាំង រឹតតែតឹងតែងនិងច្បាស់លាស់ជាងមុន។ ប្រសិនបើជនណាមិនគោរពបម្រាមបង្ខាំងរបស់រដ្ឋអំណាចនោះទេ ការផាកពិន័យ គឺកាន់តែធ្ងន់ធ្ងរជាងមុន ទៅទៀត។ លោកនាយករដ្ឋមន្ត្រីបារាំង បានបញ្ជាក់ថា ប្រាក់ផាកពិន័យចំពោះជនល្មើស អាចចាប់ពី១៣៥អឺរ៉ូ ឡើងទៅ ១ពាន់៥រយអឺរ៉ូ ក្នុងករណីល្មើសផ្ទួនគ្នា រង្វង់រយៈពេល១៥ថ្ងៃ។ ប្រសិនបើមិនរៀងចាល ជនល្មើសដែលរំលោភបម្រាម ចំនួន៤ដង ក្នុងរយៈពេល៣០ថ្ងៃ គឺអាចត្រូវផាកពិន័យដល់ ៣ពាន់៧រយអឺរ៉ូ ហើយមានទោសដាក់ពន្ធនាគារ ចំនួន៦ខែ ទៀតផង។
គួរជ្រាបដែរថា ក្រុមប្រឹក្សារដ្ឋបារាំង ជាតុលាការកំពូលផ្នែករដ្ឋបាល ពីថ្ងៃអាទិត្យកន្លងទៅ បានសម្រេចឱ្យរដ្ឋាភិបាលបញ្ជាក់លម្អិតពីវិធានការរឹតត្បឹតក្នុងការធ្វើដំណើរ ការបង្ខាំង និងវិធានការសុខភាព ព្រោះថា ចំណាត់ការនិងពាក្យមួយចំនួនរបស់រដ្ឋអំណាច ហាក់មានន័យទូលំទូលាយពេក។ ការសម្រេចរបស់ ក្រុមប្រឹក្សារដ្ឋបារាំង គឺក្រោយមានការប្តឹងពីសំណាក់សហជីពវេជ្ជបណ្ឌិតវ័យក្មេង ដែលគិតថា ការដាក់បម្រាមលើកមុន ធូរស្រាល ពេក វានាំឱ្យមេរោគរីករាលដាល ហើយនិងប៉ះពាល់ដល់ជីវិតប្រជាជន។
មកទល់ពេលនេះ បារាំង បានប្រទេសក្នុងកម្រិតអាសន្នថ្នាក់ជាតិ ដ្បិតថា ចំនួនអ្នកឆ្លងកូវីដ១៩ ចំនួនសរុបបានកើនឡើងជិត២ម៉ឺននាក់ ហើយអ្នកស្លាប់ សរុបជាង៨៦០នាក់ ក្នុងនោះ មានគ្រូពេទ្យនិងវេជ្ជបណ្ឌិត ៥នាក់ផង បានស្លាប់។ ចំនួនអ្នកស្លាប់ នៅថ្ងៃចន្ទ ទី២៣មីនា មានស្លាប់ ១៨៦នាក់ តែក្នុងមួយថ្ងៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ